←  Jeremiah (36/52)  →
1. Juda lal Josia naupa Jehoiakim inlala inthoka kum linaa chun Jeremia kuomah LALPA thu a hung tlung a:
2. "Lekhabu ziel la la, chu taka chun i kuoma ka thu hril tah po po, Israel chungthu dam, Juda chungthu dam, hnam po po chungthu dam, Josia hun laia i kuoma ka hrila inthoka voisun ni chena thil tlunghai po po chu ziek thla rawh,
3. Juda sungkuohai chun an chunga sietna intlungtir ka tum po po chu hrea an um dan suolhai an sim takduoiin; an sim chun an ritlona le suolna chu ngaidam ka tih" a ta.
4. Chuongchun, Jeremia chun Neria naupa Baruk chu a ko a, a kuoma LALPA thu hril po po chu a hril a, savun lekhaah Baruk chun a lo ziek thlak pei a.
5. Jeremia chun Baruk kuomah, "LALPA tempula fe thei lo dinga khuokhir ka ni si a.
6. Chuleiin, nang fe la, ka tongbaua inthoka LALPA thu ka hril, lekhabu ziela i ziek kha chawi la, bu nghei niah LALPA tempula um mipuihai hriet ngeiah tiem suok rawh; Juda mi, an khuoa inthoka hunghai po po hrieta khom tiem suok bok rawh.
7. Mihaiin an um dan suolhai inlamlet a, LALPA hmaah ngaidam an inhni takduoiin, ka ti a nih. LALPA thu puong, a mihai laka a lungsen inling dan hi a rapthlak em si a" a ta.
8. Chuongchun, Neria naupa Baruk chun zawlnei Jeremia hril ang chun lekhabua LALPA thuhai chu LALPA tempula chun a tiem suok ta a.
9. Juda lal Josia naupa Jehoiakim inlala inthoka kum ngana thla kuonaau chun Jerusalema mi po po le Judai ram khaw tina inthoka Jerusalema hung mi po po chun LALPA hmaa bu nghei thu an puong a.
10. Baruk chun LALPA tempul lutna Kotkhar Thar chuonchunga ziektu Safan naupa Gemaria pindana inthokin Jeremia thu dong lekhabua um chu mi po po hrietah a tiem a.
11. Safan naupa Gemaria naupa Mikaia'n lekhabua mi LALPA thuhai po po a hriet chun,
12. lal inah a fe thla a, ziektu pindana chun a lut a, chu taka chun hotu po po chu an lo inthung a. Chuonghai chu ziektu Elisama hai, Semaia naupa Delaia hai, Akbor naupa Elnathan hai, Safan naupa Gemaria hai, Hanania naupa Zedekia hai le hotu danghai an nih.
13. Mikaia chun mihai hrieta Barukin lekhabua mi a tiem thuhai chu a hriet ang angin a hril tawl a.
14. Hotuhai po po chun Kushi naupa Selemia naupa Nethania naupa Jehudi chu Baruk kuomah an tir a, "Mihai hrieta i tiem lekhabu chu chawiin hung rawh" tia hril dingin thu an incha a. Chuongchun, Neria naupa Baruk chu lekhabu ziel chawiin a hung a.
15. Anni chun, "Inthung la, kan hriet ngeiah tiem ve raw khai" an ta, Baruk chun a tiem tan ta a.
16. Chuong thuhai an hang hriet chun tiin an inen a. Baruk kuoma chun, "Hieng thu po po hi lal kan hril ngei ngei ding a nih.
17. Hieng thu po po hi iengtinam i ziek thlak a na? Jeremia-in a hril che a ni? tiin an indon a.
18. Baruk chun, "Ni e, aman a hril a, keiin savun lekhaah lekhatuiin ka lo ziek thlak a nih" a ta.
19. Hotuhai chun Baruk kuomah, "Fe la, Jeremia leh inbi hmang ro; tu khomin in umna hre naw raw hai se" an ta.
20. Ziektu Elisama pindanah lekhabu ziel chu an sie hnungin lal tuolzawla chun lal kuomah an fe a, an thu hriet po po chu an hril a.
21. Lal chun lekhaziel chu la dingin Jehudi a tir a, ziektu Elisama pindana inthok chun a hung lak a, lal le a bula ngir hotuhai hrieta chun a tiem a.
22. Thla kuona a ni ta a, lal chu a thlasik ina chun a hmaa thuka mei chu awiin a'n thung a.
23. Jehudiin thlep thum amanih thlep li amanih a tiem zo chun lal chun a chemtein lekhabu ziel chu a at bong a, thuka chun a hmatiemin a renga a raw hmang vong chenin a deng lut pei a.
24. Lal le a thoktuhai, hieng thu po po ngaithlatuhai chun tit hmel an put naw a, silfen kei thler khom an um bok nawh.
25. Elnathan hai, Delaia hai le Gemaria hai chun lekhabu ziel chu raw hmang lo dingin lal kuomah an ngen raka chu a sawt chuong nawh.
26. Chuong nek hmanin, lal chun a naupa Jerameel le Azriel naupa Seraia le Abdeel naupa Selemia hai chu ziektu Baruk le zawlnei Jeremia hai chu man dingin a tir a. Sienkhom, anni pahni chu LALPAN a thupruk a.
27. Jeremia thu hril sawng Barukin a lo ziek thlak po po lalin a raw hmang hnung chun LALPA thu Jeremia kuomah a hung tlung a:
28. "Lekhabu ziel dang la la, lekhabu ziel hmasaa thu po po, Juda lal Jehoiakimin a raw hmang tahai chu ziek thla nawk vong rawh.
29. Chun, Juda lal Jehoiakim chungchang thua chun hieng hin hril rawh: LALPA chun hieng hin a tih: 'Babulon lal chu hung ngei a ta, hi ram hi suksein, hi taka um a mi le sahai hi sukbohmang vong a tih' tia ziekna lekhabu chu nangin, 'Ieng dinga chuong thil chu i ziek am a na?' tiin lekhabu ziel chu i lo raw hmang a.
30. Chuleiin, Juda lal Jehoiakim chungthua chun LALPAN hieng ang hin a tih: Davida lalthungphaa inthung ding mi nei naw ni a, a ruong khom sun ni lum em ding le zana vur del dingin pei suok an tih.
31. Chun, a ritlona leiin ama le a thlahai le a rongbawltuhai chu hrem ka ta; anni le Jerusalema chenghai le Juda mihai chunga sietna hung tlung ding ka puong tahai, an ngaithlak nuom lo po po chu hung intlungtir ka tih" tiin.
32. Chuongchun, Jeremia chun lekhabu ziel dang a lak a, ziektu Baruk, Neria naupa chu a pek a, ama chun Jeremia baua inthoka thu a hmaa lekhabua a ziek ta po po, Jehoiakimin meia a raw hmanghai chu a ziek suok nawk vong a, chuonghai baka chun thu inang iemani zat a bel sa bok a.
←  Jeremiah (36/52)  →