Jeremiah (35/52)  

1. Juda lal Josia naupa Jehoiakim inlal laia Jeremia kuoma LALPA thu hung tlung chun:
2. "Rekab sungkuohai chu LALPA tempul sunga pindan pakhatah hung dingin fiel tawl la, dawn ding uoiin pe rawh" tiin a mi hril a.
3. Chuongchun, Habazinia naupa Jeremia naupa Jaazania le a unauhai le an naupahai po po le Rekab sungkuo po po kuoma chun ka fe a.
4. An rengin LALPA tempula Pathien mi Igdalia naupa Hanan naupahai pindana chun ka hung thuoi a, chu pindan chu tempul hotuhai pindan bul, kotkhar vengtu Salum naupa Maaseia pindan chunga um a nih.
5. Chun, Rekab sungkuoa pahai hma senga chun berbu le no iemani zat, uoiin sung sip chu ka sie a, "Uoiin hi dawn ro khai" ka ti a.
6. Nisienlakhom, anni chun, "Uoiin chu kan dawn ngai nawh. Kan thlatu Rekab naupa Jonadab chun, 'Nangni le in thlahai tu khomin kumkhuoin uoiin in dawn ding a ni nawh;
7. inhai bawlin, thlaihai chingin, grep huonhai in siem ding a ni bok naw a, in umna rama hin in dam sawt theina dingin in dam sungin puon inah cheng ro,' tiin thu a mi pek a nih.
8. Chuongchun, kan thlatu Rekab naupa Jonadab-in tongbaua thu a mi'n cha po po- kan dam sunga keini le kan nuhmeihai le kan naupahai le naunuhaiin uoiin dawn lo ding dam,
9. kan chengna ding in bawl lo ding dam, grep huon siem lo ding dam, thlai ching lo ding- tihai dam chu kan zawm a,
10. puon ina hai kan um lem a, kan thlatu Jonadab thupek po po chu awiin kan zawm vong a nih.
11. Chun, Babulon lal Nebukadnezzarin ram a hung bei lai khan, 'Thaw ro, Kaldai sipai ruol le Aram sipai ruolhai laka ei him theina dingin Jerusalemah tlan ei tiu' kan ta, kan hung a, kan cheng ve el tah a nih" an ta.
12. Chun, LALPA thu chu Jeremia kuomah a hung tlung nawk a.
13. "Israel Pathien, Iengkim LALPA chun hieng hin a tih: Judai rama mihai le Jerusalema mihai kuomah fe la, an kuomah, LALPA chun, 'Ka thuhai a inthoka thil tha inchukin in zawm naw ding am a nih?' a ti a nih.
14. Rekab naupa Jonadab chun a nauhai kuomah uoiin dawn lo dingin thu a pek a, an thlatu thupek chu inza em ema zawmin voisun chen hin uoiin an dawn naw a nih. Kei chun voi tam ka hril non ka hril non ta cheu a, sienkhom ka thu hrim in zawm nawh.
15. Ka rongbawltu zawlneihai chu in kuomah ka hung tir ka hung tir hlak a. In kuomah, 'Mi tinin in um dan suol maksan unla, in thil thawhai thlakin insiem thar unla, pathien danghai rong bawl dingin zui naw ro. Chuongchun, nangni le in thlahai kuoma ka pek rama hin cheng in tih' tiin an hril hlak cheu a, sienkhom in bengkhon naw a, in mi ngaithlak nuom bok nawh.
16. Rekab naupa Jonadab thlahai ruok chun an thlatu thupek an zawm a, hi mihai ruok hin chu ka thupek an ngaithlak si nawh.
17. Chuleiin, Iengkim LALPA, Israel Pathien chun hieng hin a tih: Ngai ro, Judai ram le Jerusalema chenghai po po chungah sietna hung intlun dinga ka lo hril tahai po po kha ka hung intlungtir ding a nih. An kuomah thu ka hril a, an mi ngaithlak nuom si naw a, anni ka ko leh an mi don bok si nawh" tiin.
18. Jeremia chun Rekab thlahai kuomah, "Iengkim LALPA, Israel Pathien chun hieng ang hin a tih: 'In thlatu Jonadab thupek zawm a, a thu suok po po zui a, a ti dan ang taka in thaw leiin,
19. Rekab naupa Jonadab chun kumkhuoin ka hmaa rongbawla ngir ding mi invai ngai naw nih' ti hi Iengkim LALPA, Israelhai Pathien thu suok a nih" tiin a hril tawl a.

  Jeremiah (35/52)