←  Jeremiah (34/52)  →
1. Babulon lal Nebukadnezzar le a sipai ruol po po le a hnuoia ram po poa lalhai le an sipaihaiin Jerusalem le a se vela khuohai an bei laia LALPA thu Jeremia kuoma hung tlung chu:
2. "LALPA, Israel Pathien chun hieng ang hin a tih: 'Juda lal Zedekia kuomah fe la, a kuomah hieng hin hril rawh: 'Hi hi LALPA thu chu a nih. Hi khawpui hi Babulon lal kutah ka pek tep ta a, ama chun meiin rawng a ta,
3. a kuta inthokin intal suok naw top i tih. Man ning i ta, a kutah peng an ti che a, bau ngeiin inbiekpui i ta, Babulon ramah thuoi a ti che.
4. Aw Juda lal Zedekia, LALPA thutiem hi ngaithla pei rawh. I chungchang thua chun LALPAN hieng hin a tih: kawlhnamin thi nawng i ta, thlamuong takin chawl lem i ta,
5. i hmaa lal lo thi tah i pi le puhai ang bokin nang khom an sunna le inzanain rimtui rawpek an ti che a, 'Aw Pu' tiin sun an ti che' ti hi keima ngeiin ka tiem a nih' ti hi LALPA thu suok a nih" tiin.
6. Zawlnei Jeremia chun chuong thuhai po po chu Jerusalema Juda lal Zedekia chu a hril a.
7. Babulon lal sipai ruolin Jerusalem an inhuol lai chun Judai rama kul nei khuo dang an la lak naw chu Akis le Azeka hai chauh a ni tah.
8. Hebrai mi bawipa amanih bawinu amanih nei po poin an bawihai insuo vong dinga Lal Zedekia-in Jerusalema um mipuihai chu thu a thlungpui hnungin Jeremia kuomah LALPA thu a hung tlung a.
9. Chu dungzui chun, mi tinin Hebrai mi bawi an neihai chu a nuhmei a pasalin an insuo ding a na, tu khomin mani Juda chanpuihai hrim hrim bawiah an sie ding a ni ta nawh.
10. Chuong ang chun hotuhai le mipuihai chun an bawi kol senghai chu insuo zalen an remti a, an insuo a.
11. Amiruokchu, iemani chen hnungah an lungril an thlak a, an bawi insuohai chu la kirin bawiah an siem nawk ta a.
12. Chuongchun, LALPA thu chu Jeremia kuomah a hung tlung a.
13. "Hi hi LALPA, Israel Pathien hril chu a nih: In pi le puhai Aigupta bawia inthoka ka hung thuoi suok lai khan thu ka thlungpui a.
14. An kuomah, 'Tu khomin in unaupa Hebrai mi, in kuomah an hung zora in inchawk chun, kum ruk in rong a bawl pha, a kum sarinaah in insuo zalen ding a nih' tiin ka hril a. In thlatuhai chun ka thu an ngaithlak naw a, an mi uksak bok nawh.
15. Tu lai hnai el khan inlamletin ka mithmuah thil indik in thaw a, mi tinin in unau chanpuihai chu in insuo zalen a. Ka hming put tempula chun ka hmaah thuthlung in siem a.
16. Amiruokchu, in lungril in thlak a, in nuom dan ang taka in insuo in bawinu le bawipahai chu in thuoi kir a, ka hming in suksiet a, in bawia sie nawk dingin in lak lui tawl nawk tah hi.
17. "Chuleiin, LALPA chun hieng hin a tih: Ka thu in zawm naw a, in unau chanpuihai chu zalenna in pek nuom nawh. Chuleiin tu hin kawlhnam le tampui le hripuiin zalen taka a nuoi dingin zalenna ka pek cheu a, hi hnuoia lalramhai po po tirdak kai in tih.
18. Ka thuthlung bawsetuhai po po le ka hmaa an thutlung zawm si lohai chu bawng tuoi tan bong, a bong kara fe thleng ang charin siem veng ka tih.
19. Judai ram le Jerusalema hotu hai, roreltu hai, thiempu hai le a rama cheng hai po po, bawng tuoi tan bong kara fe thlenga thu an thlung hlen lotuhai chu,
20. that tuma zongtu an hmelmahai kutah peng ka ta, an ruonghai chu chungleng vate le hnuoia ramsahai tlan ding chauh ning a tih.
21. "Juda lal Zedekia le a rawihai chu that tuma zongtu an hmelmahai le Babulon lal sipai ruol, anni tinsantuhai kuta chun peng ka tih.
22. Hi khawpuia hung kir nawk ding hin thu peng ka ta, hung bei nawk an ta, lang an ta, raw ram vong an tih. Judai ram khawpuihai chu hluotu um loin sukram ka tih" ti hi LALPA thu suok a nih.
←  Jeremiah (34/52)  →