←  Jeremiah (33/52)  →
1. Lal in vengtuhai inkulna huong sunga Jeremia an intangtir lai chun LALPA thu voi hnina chu a kuomah a hung tlung nawk a.
2. "Hnuoi indintu, duong suoktu le suknghettu LALPA, a hming khom LALPA chun hieng hin a tih:
3. Mi hung ko la, don ka ti che a, thil ropui le i zong suok phak ngai lo dinghai chu hril ka ti che.
4. LALPA, Israel Pathien chun hieng hin a tih: Babulont mihaiin an inhuolna cheu laka thang khawna ding le kul suknghetna dingin in inhai le lal in chen thiek hiel inla khom,
5. Babulon mihai chu hung lut tho an ta, ka lung inling leia ka sukhlumhai ruong chun hi khawpui hi sip a tih, an ritlona leiin hi khawpui laka hin ka hmel ka thup ding a ni si a.
6. "Amiruokchu, damna le hrilselna hung intlungtir nawk ka tih. Ka mihai chu sukdam ka ta, muongna le himna hnienghnar takin tlan an tih.
7. Juda le Israel chu an saltangnaa inthokin hung thuoi kir ka ta, a hmaa an nina ang bokin suknghet nawk ka tih.
8. Chun, ka laka an suolna chu tleng fai ka ta, ka laka an helna po po chu ngaidam ka tih.
9. Hi khawpui chungah hin that insuo a, hmuingilna le muongna hnienghnar taka ka vurzie hretu le hmutu hi hnuoia hnamhai chun maktiin anni chu tiin inthin an ta, chuonghai hmaa chun hi khawpui hi kei mi sukhlimtu, suklawmtu le mi chawimawitu hung ni tang a tih.
10. LALPA chun hieng hin a tih: 'Hi hmun rausan le ram tah hnung tia an hril hlak le Judai ram khawpui hai, Jerusalem kotthler ram ta hnung, sa le mihriem an cheng ta nawna hmuna an hril ngeia hin,
11. hlimna le lawmna ri hai, mo le moneitu rawl ri hai, LALPA tempulah,LALPA kuomah lawmthu hril ro,LALPA chu a tha si a,A ngilneinan kumtluong a daitia inthawina thilhlan an inhlan rihai chu la hung hre nawk in tih. A ram vangneina chu a hmaa ang bokin ka tungding nawk ding a ni si a' ti hi LALPA thu suok a nih.
12. "Iengkim LALPA chun hieng hin a tih: Mi le sa an cheng ta nawna hmun rausan le khawpui ram hnung hmun tina chun ran tlatna hmun hring hung um nawk a ta, chuong hmuna hai chun berampuhan an beramhai intlattir an tih.
13. Tlang ram khuoa hai, phai ram khuoa hai, sim tieng khawpuia hai, Benjamin rama hai, Jerusalem le a se vela hai le Judai ram khawpuia hai berampuhaiin an beramhai la hung tiem nawk mol mol an tih' ti hi LALPA thu suok a nih.
14. " 'Ngai ta, Israel sungkuo le Juda sungkuo laka ka thu tiem inzaum tak chu ka hlen suok ni ding a hung tlung mek a nih' ti hi LALPA thu suok a nih.
15. Chu ni le chu huna chun,Davida zungzama inthokin,Felna Zar inder suoktir ka ta,Ama chun fel tak le indik takin,A ramah ro hung rel a tih.
16. Chuong nia chun Juda chu,Sanhimin um tang a ta,Jerusalem khawpui khom,Him takin um tang a tih.'LALPA, Kan Felna chu'Ti hi a hming ning a tih.'
17. LALPA chun hieng hin a tih: "Davida chun Israel sunghai lai lalthungphaa inthung ding mi invai ngai naw nih;
18. thiempuhai, Levi chia mihai khomin ka hmaah inthawina pumraw thilhlanhai le bu le bal thilhlanhai inhlan zingtu ding mi invai bok naw ni hai" tiin.
19. LALPA thu chu Jeremia kuomah a hung tlung a:
20. "LALPA chun hieng hin a tih: 'Sun le zan ta dinga thuthlung ka ruothai ve ve hi sukdanglam a, a hung tlung hun ding taka tlung lo dinga sun le zan in siem thei a ni chun,
21. ka rongbawltu Davida kuoma a lalthungpha hluotu ding mi a nei zing dingzie thu ka thlung chu sukdanglam thei ni chauh a tih; chuong ang bokin ka rongbawltu Levi chihai le thiempuhai kuoma ka thuthlung khom thiek thei ni chauh a tih.
22. Ka rongbawltu Davida thlahai le ka hmaa rongbawltu Levi thlahai khom vana arasi tiem seng lo ang le tuipui kama tieu vut tiem seng lo ang elin sukpung ka tih."
23. Chun, LALPA thu chu Jeremia kuomah a hung tlung a:
24. " 'LALPA thlang sungkuo hnihai ram chu a suksiet tah' tia mihai hril hi i lo hriet ve hlak am? Chuong ang chun ka mihai chu hmusitin hnama khom an tiem sa ve ta naw a nih.
25. LALPA chun hieng hin a tih: Sun le zan kuoma ka thuthlung hi a nghet naw a, hnuoi le van um dan ding ka ruot hi a nghet naw a ni chauhin,
26. Jakob thlahai le ka rongbawltu Davida thlahai chu pei hmang ka ta, Abraham hai, Isak hai, Jakob thlahai chunga roreltuah a thlahai chu inumtir naw ning. An vangneina chu tungdingin, ka lunginsiet tawl ding a ni si a" tiin.
←  Jeremiah (33/52)  →