←  Jeremiah (32/52)  →
1. Juda lal Zedekia inlala inthoka kum sawmnas le Lal Nebukadnezzar inlala inthoka kum sawm le kum rietnaa chun Jeremia kuomah LALPA thu a hung tlung a.
2. Babulon lal sipaihaiin Jerusalem an inhuol lai a na, zawlnei Jeremia ruok chu Juda lal in vengtuhai inkulnaa chun an intangtir a.
3. Juda lal Zedekia chun Jeremia kuomah, "Ieng leia thil hril lawk i ching am a na? Hieng hin i hril a, 'Hieng hin LALPA chun a tih: Hi khawpui hi Babulon lal kutah ka pek tep a, ama chun a lak ding a nih.
4. Juda lal Zedekia chu Babulon lal kuta inthokin tlan suok naw ni a, a kutah pekin um a ta, hmai intonin, a mit ngeiin hmung a tih.
5. Zedekia chu Babulon ramah thuoi a ta, ama ka kan hma khat chu chu taka chun um zing a tih. Kaldai mihai chu do inla khom hlawtling chuong naw ti niu. Chu chu LALPA thu suok a nih' ti damin ieng leia i hril am a na?" a ta, chu thil leia lung ina a khum a nih.
6. Jeremia chun, "LALPA thu chu ka kuomah a hung tlung a:
7. Ngai rawh, i papui Salum naupa Hanamel chu Anathot khuoa inthokin i kuomah hung a ta, 'Ka lo mi'n chawpek rawh, nang chu laichin hnai le an ro khom khawm thei, a'n chaw ding tak i nih' tiin a hung ngen ding che a nih" tiin.
8. Chuongchun LALPA hril ang ngei chun ka papui naupa Hanamel chu lal vengtuhai inkulna sunga chun a hung a, ka kuomah, 'Benjamin rama Anathot khuoa ka lo inchaw ta la, ka ro khawm theitu i ni leiin a'n tlantu ding tak i na, i ta dingin inchaw el rawh' a ta. Chuongchun, hi hi LALPA thu ngei kha a nih ti ka hriet ta a.
9. Ka papui naupa Hanamel, Anathot khaw mi lo chu ka'n chawk ta a, tangka chu kan hang buk a, tangkaruo shekel sawm le pasari a nih.
10. Inchawkna lekhaa chun ka hming ka ziek a, suoi ka nam a, hrepuituhai hming ka'n inziektir bok a, phahlaa chun tangkaruo chu kan buk a.
11. Inchawkna lekha, inchawk a ni dan le a umzie ziekna le suoi namna kawpi le suoi nam lo kawpi chu ka lak a,
12. chuong lekhahai chu ka papui naupa Hanamel le hrepuitua hming chuonghai mithmua le vengtuhai inkulna huong sunga Juda inthunghai po po mithmua chun Maseia naupa Neria naupa Baruk chu ka pek a.
13. Chuonghai hmaa chun Baruk chu hieng ang hin thu ka pek a:
14. Hi hi Iengkim LALPA, Israel Pathien hril chu a nih: Hieng lekhahai, inchawkna lekha, suoi nam le nam nawhai hi sawt tak a um theina dingin pil belah sie rawh.
15. Israel Pathien, Iengkim LALPA chun, 'Hi rama hin in hai, lo hai le grep huon hai mihaiin an la'n chawk ding a nih, a tih' tiin.
16. Neria naupa Baruk kuoma inchawkna lekha ka pek zo chun LALPA kuomah ka tongtai a:
17. "Aw LALPA Chunghnungtak, i kut thilthawtheina nasa tak chu pharin hnuoi le vanhai i siem a. Ieng khom i ta ding chun thaw harsa a um nawh.
18. Sang tam tak chungah i hmangaina i'n langtir a, an pahai suolna leiin an nauhai i hrem bok a. Aw Pathien ropui le thilthawthei, i hming chu Iengkim LALPA a na,
19. i thiltumhai a lien a, i thilthawhai a ropui a. Mihriem nauhai um dan po po i hmu vong a, mi tin an um dan le thilthaw phu ang peiin lawmman i pek hlak.
20. Aiguptaa khan inchikna le thil mak tam tak i thaw a, tu chen khom hin Israelhai le mihriemhai po po chungah i la thaw zom zing a, chu chu i nina hrim, i hming sukthangtu a nih.
21. I mi Israelhai chu Aigupta rama inthokin inchikna le thil mak leh, i kut thilthawtheina chu pharin, thil rapthlak tak tak thawin i thuoi suok a.
22. Hi ram, nenetui le khuoizu luongna ram, an pi le puhai kuoma pek i lo tiem tah chu i pek a.
23. An hung lut a, an hluo a, sienkhom i thu an awi naw a, i dan an zawm naw a, i thupek angin an thaw bok nawh. Chuleiin, hieng sietnahai hi an chungah i hung intlungtir a nih.
24. "En ta, khawpui inhuolna le lakna dinga hnuoi an sung pawng po po hi? Kawlhnam le tam le hripui leiin khawpui chu a hung beitu Babulon mihai kutah pekin a um ding a ni si a. I hril tahai po po kha i hmu ang hin a hung tlung mek tah a ni hi.
25. Aw LALPA Chunghnungtak, khawpui chu Babulon mihai kutah pek ding ni sien khom, nang ngeiin 'Lo chu tangkain inchaw la, hrepuitu ko rawh' i mi ti bok si a" tiin.
26. Chu zoah LALPA thu chu Jeremia kuomah a hung tlung a:
27. "Kei hi LALPA, mi po po Pathien chu ka nih. Ka ta dingin thaw harsa a um am a ni?
28. Chuleiin, LALPA chun hieng hin a tih: Hi khawpui hi Babulon mihai le Babulon lal Nebukadnezzar kutah ka'n hlan tep a, ama chun lang a tih.
29. Hi khawpui runtu Babulon mihai chu hung lut an ta, rawng an ta, kang dur dur a ta, ka lungsenna cho phawk dinga Baal kuoma rimtui inhlan a, pathien danghai kuomah inthawia dawn ding an bun thlakna in chung po po khom raw chim vong an tih.
30. "Israelhai le Judahai chun an tleirawla inthokin ka mithmuah thil suol naw chu ieng khom thaw an nei nawh. A nih, Israelhai chun kuta an siem fawm milema mi cho phawk naw chu ieng dang khom thaw an nei nawh" ti hi LALPA thu suok a nih.
31. Hi khawpui hi an rela inthoka tu chen hin, ka mithmua inthoka sukbohmang dai awm hrimin, ka lung suksenna ding ngot an thaw ngat ngat a nih.
32. Israel le Juda mipui hai, an lal hai, hotu hai, thiempu hai, zawlnei hai le Juda mi le Jerusalema mi hai chun ka lungsenna ding thil tha lo ngot an thaw a.
33. Ka tieng ngha loin tukhnungkhur an mi'n nghat a, zirtir ngat ngat tawl lang khom an ngaithlak nuom naw a, insiem that an tum bok nawh.
34. Ka hming chuongna in chu sukporche dingin milem tirdakum an lak lut a.
35. Ben Hinom ruomah Baal ta dingin hmun sanghai an bawl a, an naunuhai le naupahai chu Molek kuoma meia inhlan dingin an pek a; chuong thil chu thaw dingin thu ka pek ngai naw a, hieng thil theidaum hi thawin Judahai chu suol inthawtir an tih ti khom ka ngaituonaah a lut ngai hrim hrim bok nawh.
36. Israelhai Pathien, LALPA chun hieng hin a lo hril a: "Hi khawpui hi Babulon lal kutah pek ning a ta, kawlhnam le tam le hripui tuor a tih.
37. Sienkhom, ka lungsen inling laia ka hnot hmangna ram po poa inthok chun anni chu hi hmuna hin hung thuoi khawm nawk ka ta, him takin inumtir ka tih.
38. Ka mihai ning an ta, kei an Pathien ning ka tih.
39. Anni thatna ding le an thlahai thatna ding le kumkhuoa an mi ti song theina dingin, anni chu lungril hmun khat inputtirin zai khatin inluongtir ka tih.
40. An kuomah kumkhaw thuthlung siem ka ta, an thatna ding thaw ma ngai nawng ka ta, an mi nghatsan nawna dingin, mi ti dingin an lungril sukphur zing ka tih.
41. An thatna ding thaw chu ka lawmzawng ning a ta, ka lungril po poin hi rama hin phun nghet tawl ka tih" tiin.
42. LALPA chun hieng hin a tih: "Hi mihai chunga thil tha naw ka'n tlungtir ang bok khan an kuoma thil tha ka tiem po pohai kha intlungtir ka tih.
43. Hi rausan ram, sa le mihriem an cheng ta nawna ram, Babulonhai kuoma pek suok ta hnung ram' in ti ngeia hin mihaiin in le lo inchawin an la bawl nawk ding a nih.
44. Benjamin rama hai, Jerusalem le a sevel khuoa hai, Judai ram khawpuia le tlangram khuoa hai, thlang tieng phai thuta hai le sim tieng khawpuia hai chun mihaiin tangkain lo inchawng an ta, inchawkna lekha ziek an ta, suoi nam an ta, hrepuituhai ko an tih; an vangneina chu ka sukhmuingil nawk ding a ni si a' ti hi LALPA thu suok a nih.
←  Jeremiah (32/52)  →