←  Jeremiah (31/52)  →
1. "Chu hnunga chun kei hi,Israelhai Pathien ni tang ka ta, Anni khom ka mihai ning an tih" Ti hi LALPA thu suok a nih.
2. LALPA chun hi thu hi a hril:"Kawlhnama thi mahlahai chun,Thlalerah ditsakna hmung an ta,Keima hungin, Israelhai chu,Chawl hadamna peng ka tih."
3. Tien lai khan chu ei kuomah,LALPA a hung inlang hlak a,Ei kuomah hieng hin a hril a:Hmangai tawp loa hmangaiin,Laina takin ka kei hnai che a.
4. Aw Israel nunghak thienglam,Indin thar nawk ka ti che a,Tungdingin um nawk i ta,I khuongte leh inthokin,Hlim takin lam nawk i tih.
5. Samari tlang dung tluonin,Grep huon siem nawk i ta,Loneituhan ching an ta,Annin a ra tlan an tih.
6. Efraim tlangrama ngei chun,"Thaw ro, Zion-ah feng ei tiu,LALPA ei Pathien kuomah"Tia vengtuhai an khek ni,A la hung tlung ding a ni si.
7. LALPA chun hieng hin a tih:Jakob ta di'n lawm hla rem ro,Hnam laia ropui tak ta dingin,Inring taka khek suokin,Chawimawiin puong suok unla,"Hlaa um sun i mi Israelhai chu,LALPA, nangin humhim rawh" tiin.
8. "En ta u, hmar tieng rama inthokin,Anni chu hung thuoi ka ta,Kawl kil tawp chena mi khom,An rengin thuoi khawm ka tih.Mitdel dam le kebai dam,Nuhmei nau pai inrik dam,Nau hase invoi mek dam,Anni lai chun thang an ta,Mi tam tak hung khawm an tih.
9. Mitthli pumin hung an ta,Chuonga ka thuoi kir lai chun,Tongtai mol mol tawl an ta,Vadung kam hmun ruol remah,An insui nawna dingah,Anni chu thuoi tawl ka tih.Israelhai pa ka na,Efraim chu ka nau lutir a nih.r
10. Khawvela hnam po pohai,LALPA thu lo ngaithla ro;Tuipui ral ram hla takah,A thuhai chu puong dar ro.Israelhai sukdartu chun,A lak khawm nawk ding a na,Berampuin a beramhai,A veng angin veng a tih.
11. Jakob chu LALPAN intlan a ta,Anni nek daia hrat lem,Kut a'nthok san suok a tih.
12. Zion tlang sipah chuongin,Hlimna hla hung sak an ta,Bu hai, uoiin hai, hriek hai,Beram ruol le bawng ruolhai,Hnienghnar taka hung vurtu,LALPA chungah lawm an tih.An hringna chu tuia chawm zing,Huon hring dup ang ning a ta,Lungzingin um tah naw ni hai.
13. An nunghakhai lam an ta,Tlangvalhan hung zawm an ta,A tar a zur hlim an tih.An lusun chu lawmnaahInchangtir lem tang ka ta,Lungngaina nekin hlimna,Thlamuongnan vur lem ka tih.
14. Thiempuhai hrai tlai ka ta,Ka hausak hnienghnarna chun,Ka mihai sung sip ka tih,Ti hi LALPA thu suok a nih.
15. LALPA chun hieng hin a tih:"Rama khuoa ri an hriet chu,Lusun tap khek rong rong a nih;Rakilin a nauhai a ta a,An um ta si naw leiin,Thlem tlai ruol hrim a ni nawh."
16. LALPA chun hieng hin a tih:" I tap lai bang ta raw khai,I mitthli khom hul ta raw se,I thilthaw'n lukhawng neiin,Hmelma rama inthokin,An hung kir nawk ding a nih"Ti hi LALPA thu suok a nih.
17. "Hma tieng beisei ding i nei,I nauhai chu an ram ngeiah,An hung kir nawk ding a nih"Ti hi LALPA thu suok a nih.
18. "Efraim inrum ri chu ka hriet:'Bawng tuoi hel sawi ang elin,Nangin i mi thunun a,Thununin ka um ta hi.Mi siem thar la, hung kir ka tih,LALPA ka Pathien i ni si a.
19. Invak hmang ka sim ta a,Ka hung inhriet chieng hnungin,Poitiin awm ka chum a;Ka tleirawl suolna phurin,Inzakin ka hmai a mawk' tiin.
20. Efraim chu ka nau dit tak,Ka lawmna a ni naw maw?Ka khak chang um rop sien khom,Ka theinghil ngai hrim hrim nawh.Lungrilin ka thlakhla a,Ka lunginsiet hle a nih"Ti hi LALPA thu suok a nih.
21. Lam inchiknahai siem la,Lam kawkhmunahai tar rawh.I lamlien hraw en ngun rawh. Aw Israel nunghak thienglam,I khuo tieng hung kir nawk rawh.
22. Aw, nang naunu lepchie,Ieng chen am i'n vak rawlai ding?LALPAN hnuoi hi a letlingin,A lo siem danglam am an ta,Nuhmeiin pasal a leng lem el hi?
23. Iengkim LALPA, Israel Pathien chun hieng hin a tih: An saltangnaa inthoka ka thuoi kir tawl pha chun Judai ram le a khawpuia chenghai chun hieng ang tongkam,'Aw nang tlang thienghlim,Felna a chengna tlangpui,LALPAN malsawm che raw se'ti hi la hmang nawk an tih.
24. Judai ram le a khawpuia hai chun mi po po chu cheng tlang an ta, loneituhai le beram vengtuhai chu cheng tlang an tih.
25. Chauhai chu sukhar ka ta, tamsawlhai chu hrai tlai ka tih" tiin.
26. Chuongchun, ka hang har a, ka ngha vel a. Ka mang chu inhoi ka ti hle a.
27. Ngai ta u, Israel sungkuo le Juda sungkuohai ka phun nawk ding hun le an ran ruolhai ka sukpung nawk ding hun chu a hung tlung ding a nih.
28. Phawi dok le kei thluk a, the zap le suksiet dinga ka'n chan ang khan anni ka tungding hun le phun nawk ding hun chu ka mel kai zing a nih" ti hi LALPA thu suok a nih.
29. Chuong nia hai chun mihaiin,'Pahaiin grep thur an fak a,An nauhai ha a suktim'ti dam hi ti nawk ngai tah naw ni hai.
30. Chuong nek hmanin, mi tinin mani suol thaw thipui an ta, grep thur fatu ha chu tim lem tang a tih.
31. "Ngai ta u, Israel sungkuo le Juda sungkuo leh thuthlung thar ka siem ding hun chu a hung tlung ding a nih" ti hi LALPA thu suok a nih.
32. Aigupta rama inthoka an thlatuhai kuta chela ka thuoi suok laia ka thuthlung ang kha ni ta naw nih. An ta dinga lu ka ni zing khomin chu thuthlung chu an bawsiet a ni kha" ti hi LALPA thu suok a nih.
33. "Chu ni a hung tlung pha chun, Israelhai chu thuthlung thar siempui ka ta, an ngaituonaah ka danhai sieng ka ta, an lungrilah ziek bok ka ta, an Pathien ning ka ta, anni chu ka mihai ning an tih.
34. Tu khomin mani tuolbawmhai amanih unau amanih kuomah, "LALPA chu hre rawh" tiin zirtir ta naw ni hai a, a chin taka inthoka a lien tak chenin, an rengin mi hre vong tang an tih. An ritlonahai chu ngaidamin, an suolnahai chu hre zing ta naw ning" ti hi LALPA thu suok a nih.
35. LALPA chun hieng hin a hril:"Sun elvartu dinga nisa petu,Zan elvartu dinga thla le arasi petu,Tuipui inrum dinga chokthotu chu-A hming Iengkim LALPA a nih.
36. Hieng thu ruothai po po hi,Ka hmua an bo hun chauin,Israel thlahai khom chu,Hnam an nina a'nthokin,Ka hmaah bo chauh an tih" tiin.
37. LALPA chun hieng hin a hril:"Van khi inkhi thei a ni pha,Hnuoi thut zong suok a ni pha chauh,Israel thlahai khom chu,An thilthaw leiin hnawl ka tih" tiin.
38. "Hananel kulbing sanga inthoka a Kil Kotkhar chen bawl thar a ni ding hun chu a hung tlung mek a nih" ti hi LALPA thu suok a nih.
39. "A'n khina hrui chu Gareb tlang chenin tlun takin fe thleng a ta, Goa tieng kawi a tih.
40. Mithi ruong le vut peina ruom pumpui le khawhnawm po po, Kidron vadung chenin, sak tieng Sakor Kotkhar kil chen chu LALPA ta dinga ser thienghlim ning a ta, a khawpui chu sukdar le thiek ni ta ngai naw nih" tiin.
←  Jeremiah (31/52)  →