←  Jeremiah (30/52)  →

---

1.

Jeremia kuoma LALPA thu hung tlung chu:

2.

"Hi hi LALPA, Israel Pathien hril chu a nih: 'Ka thu hril po po che hi lekhabuah ziek thla rawh.

3.

Ngai ta, ka mi Israel le Juda saltanghai ka thuoi kir nawk hun le an thlatuhai rochung dinga ram ka peka ka tungding tawl nawk hun chu a hung tlung mek a nih' ti hi LALPA thu suok a nih.

4.

Israel le Juda chungthua LALPA thuhai chu hieng hi a nih:

5.

LALPA chun hieng hin a tih:" 'Thlaphang tap rawl ka hriet,Muongna ni lo, lungphang ri.

6.

Indonin hang en vel tu'm,Pasalin nau an nei thei maw?Chuong ni si chun ieng lei a,Nuhmei nau hase ang a,Pasalthahan an tai dom a,An hmai a dang am a na?

7.

Chu ni rapthlak dingzie chu,A tlukpui um thei naw nih.Jakob beidong ni a na,Sienkhom san suok ning a tih.

8.

Chu ni chun, an ringkol bat chu suktliek ka ta, a hrui chu sukchat ka ta, ram dang mihaiin anni chu rongbawltuah hmang ta ngai naw ni hai.

9.

LALPA an Pathien le an lal dinga ka tungding ding Davida rong chu bawl lem tang an tih, Iengkim LALPA chun a tih.

10.

Chuleiin, aw ka siehlaw Jakob,Lungphang hrim hrim naw la,Aw Israel, zam der naw raw khai,Ti hi LALPA thu suok chu a nih."Ram hla takah um la khom,San suok ngei ngei ka ti che a,I saltangna rama inthokin,I thlahai chu san suok ka tih.Muongna le himna hmunah,Jakob chu cheng nawk a ta,Thlabarin um ta naw nih.

11.

Umpuiin hum ka ti che,Ti hi LALPA thu suok a nih.Ka sukdarna cheu hnamhai,An rengin sukram lang khom,Sukram vong nawng ka ti cheu.Thunun ka ti cheu a,Sienkhom a hun tawk chauin;Hrem lo chun suok naw ti niu."

12.

LALPA chun hieng hin a tih:"I hliemna sukdam ruol an nawh,A be sukdam thei a ni nawh.

13.

I panna sukdam dingin,Enkoltu che an um naw a,Damdawi hrim a um bok nawh.

14.

I'n koppuihai po po khan,An theinghil vong ta che a,Ngaisak che an um tah nawh.Hmelma angin ka vuok che a,Mi tawrot angin ka hrem che,I bawsietna a tam em a,I suolna a nasa si leiin.

15.

Ieng dinga i hliemna leiaI tap khek ringot am a na?I natna sukdam ruol an nawh;I bawsietna a tam lei le,I suolna a nasat leiin,Hieng po po hi i chungah,Ka hung intlungtir a nih.

16.

Nangma fa ramtuhai chu,Fak ramin um veng an ta,In hmelmahai po po chu,Salah la'n tang veng an tih.A hung roktuhai cheu chu,Mihaiin rok veng an ta,Rallaka latuhai che chu,Rallakin la veng an tih.

17.

Sukhrisel nawk ka ti che a,I hliemhai sukdam ka tih,"LALPA thu suok chun a tih,'Tu ngaisak hlaw lo Zion,Mi hnot suok hnung' an ti che leiin.

18.

LALPA chun hieng hin a tih:Jakob puon ina chenghai,Hung intuoi thar nawk ka ta,Anni lunginsiet ka ta,An muol le tlang ngeia chun,An khawpui tlu ram hnung chu,Hung indin thar nawk ka tih.

19.

Chu mihaia inthok chun,Lawmthu hrilna hlahai leLawmna ri hung suok a ta,Anni chu sukpung ka ta,Tlawm tieng pan ngai naw ni hai.Anni chu chawisang ka ta,Endong ni ta nawng an tih.

20.

Tuta hmaa ang bokin,An nauhai hung pung an ta,An khaw tlanga chenghai chu,Ka hmaah phun nghet ka ta,Anni neksawrtu taphot chu,Keiman hrem pei tawl ka tih.

21.

Anni mi le sa ngei chu,An thuoitu hung ning a ta,An roreltuhai khom chu,Anni mi bok ning an tih.Ka bulah hung thuoi ka ta, Aman mi hnai tang a tih.Keimain ka fiel naw chun,Tu'n am mi hnai ngam a ta?Ti hi LALPA thu suok a nih.

22.

Chun, ka mihai ning in ta,Kei in Pathien chu ning ka tih.

23.

En ta, LALPA lungsenna thlipui,Thlipui intur ngul el chu,Mi rilohai nuoi dingin,A hung hrang thla ding a nih.

24.

A thil tum a hlen hma chun,LALPA lungsen intur chu,A lamlet naw ding a nih.Ni la hung tlung dinga chun,Hi hi la hre thiem in tih.

---

←  Jeremiah (30/52)  →