←  Jeremiah (3/52)  →
1. "Miin nuhmei ma sien la,Suokin pasal dang nei sien,A nuhmei chu a ko nawk ding?A ram a sukporche vong naw ding?Nang khom nawchizor ang elin,Ngaizawng i kop rawn em em a,Ka kuomah i kir nawk ding maw?"Ti hi LALPA thu suok a nih.
2. Tlang kol lul tieng khi thlir la,An zalpui nawna che hmun hrim,Khaw lai am a um reng reng a?Thlalera cheng Arab mi angin,Zalpui ding nghakin lam sirah,I thung ngat ngat hlak a ni kha.I hurna le ritlonain,Ram i sukporche zo ta hi.
3. Chu lei chun ruo a sur naw a,Thal ruo hrim khom a sur naw hi.Chuong sa khom chun hmai suksain,Zakmaw nawchizor ang elin,Inzak hmel hrim i put naw hih.
4. Tu el khom khan mi hung koin,"Ka naupang laia inthoka,Mi hmangaitu ka Pa i nih;
5. I lung i suksen zing ding maw?Kumkhuoin a sen el ding maw"Tiin i hung tong a ni kha!Sienkhom a suol theipatawpin,Suol i la thaw zom zing tho"
6. Lal Josia inlal laiin LALPAN ka kuomah, "Hnung tol hmang Israel thilthaw kha i hmu am? Tlang sang tinah fein, thing buk tin zar hnuoiah a uire a.
7. Hieng ang thil a thaw hnung hin ka kuom tieng hung kir nawk naw ni'm ka lo ti a, sienkhom a hung kir chuong naw a, a zuorpuinu mi ringum lo Juda khomin a hmu a.
8. Hnung tol hmang Israel chu makna lekha ka pek a, a uiretna zozai lei chun ka tir hmang a. Chu chu a zuorpuinu mi ringum lo Juda-in a hmu zing sa khomin a mi ti chuong naw a, a fe suok a, a va uire ve a.
9. Israelhai uiretna chu ienga khom ngai loin, a ram chu sukporchein, thing le lung bul bein a uire a.
10. Chuong sa khom chun a zuorpuinu Juda chu ringum loin a um a, a lungril taka thaw loin ka kuom tieng a hung kir tehlem a" tiin LALPA chun a hril.
11. Chun, LALPA chun ka kuomah hieng ang hin a hril a: Mi ringum lo Israel chu a zuorpuinu mi hlem hmang Juda nek chun fel lemah a'n ngai a nih.
12. Hi thu hi hmar tieng va puong dar ro:'Mi ringum lo nang Israel, Hung kir rawh, LALPAN a tih;Mel rum ta naw ning chengah,Zangai thei tak ka ni si a,Lungsen kumkhuo naw ningah'Ti hi LALPA thu suok a nih.
13. LALPA i Pathien helsanin,Thing buk zar tin hnuoia hai,Ram dang pathienhai lakah,Indawin i'n phalrai a,Ka thu hril i zawm nuom nawh,Ti hi pomin inpuong rawh"Ti hi LALPA thu suok a nih.
14. "Nangni mi ringum nawhai, hung kir ta ro" ti hi LALPA thu suok a nih. "Kei hi in pasal ka na, a thlangtu cheu ka nih. Nangni laia mi khawpuia mi pakhat le sungkuoa inthokin mi pahnih ka thlang ding cheu a na, Zion-ah thuoi ka ti cheu.
15. Ka lung tuok mi berampuhai peng ka ti cheu a, anni chun hrietna le hriet thiemnain keithuoi an ti cheu.
16. Chu huna nasa taka mi in hung pung pha chun, 'LALPA thuthlung bawm' in kol lai hun kha ngai ta nawng in ta, hre fu ta bok nawng in ta, Thuthlung Bawm siem nawk ngai ta bok naw nih.
17. Chu pha chun Jerusalem chu 'LALPA Lalthungpha' ti hung ni tang a ta, hnam tinhai chu LALPA hming chawimawi dingin Jerusalemah hung an tih. An lungril suol le lululna chu put zing ta naw ni hai.
18. Chu nia chun Juda sungkuohai le Israel sungkuohai chu infin an ta, in thlatuhai hluo dinga ka rochung rama chun hmar tienga inthokin hung tlang an tih.
19. "Keima ngeiin hieng hin ka hril kha:'Ka nauhai anga en a,Ram ditum tak chu pe a,Hnam tu khom hluo neka tha,Ram inrochungtir cheu a,Kei mi zui hi ma loa,'Pa' tia in mi ko hi,Ka lo beisei hlak a na.
20. Sienkhom, nuhmei ringum lo,Pasal uiresantu angin,Aw, Israel sungkuohai,In mi uiretsan si a"Ti hi LALPA thu suok a nih.
21. Tlang kol vula inthoka,Israelhaiin thil ngenaAn tap ri chu ka hriet a,LALPA an Pathien theinghilin,Lam naw tieng an pet ta si.
22. "Nangni mi ringum lohai,Ka kuom tieng hung kir ta ro;In hnung tolna lungril chu,Keiin lo sukdam ka tih.""Ni e, hung kir ngei kan tih,Kan LALPA, Pathien i nih.
23. Muol le tlanga inthoka,Kan milem biek so ri hi,Inhlemna vong a lo nih;Nang chu LALPA kan Pathien,Israelhai sandamna,I lo ni takzet si a.
24. Kan tleirawl lai a'nthok khan,Kan thlatuhai inrim ra,Beram ruol le bawng ruolhai,An naupa le naunu chenin,Inzakna hre phak der lo,Milem biekna mei meiah,Kan lo seng ral hlak si a.
25. Ei muolphona chu silin,Inzak takin zal ei tiu.LALPA ei Pathien chungah,Eini le ei thlatuhan,Thil suol ei thaw hlak si a;Ei tleirawla inthoka,Voisun hunhai chen khomin,LALPA ei Pathien thu chu,Ei zawm nuom ngai si naw" in tih.
←  Jeremiah (3/52)  →