←  Jeremiah (29/52)  →
1. Hi hi Jerusalema inthoka Nebukadnezzarin Babulon tienga sala a thuoi upa hai, thiempu hai, zawlnei hai le mi dang hai laia a dam la um sunhai kuoma Jerusalema inthoka zawlnei Jeremia lekhathon chu a nih.
2. Chu chu lal Jehoiachin le lalnu nu hai, lal ina thoktu hai, Judai ram le Jerusalema thuoitu hai, mi themthiem hai le thirsu haiin Jerusalem an suoksan hnung kha a nih.
3. Chu lekha chu Safan naupa Elasa le Hilkia naupa Germaria hai, lal Zedekia-in Babulona lal Nebukadnezzar kuoma a tirhai chu a'n chawitir a. Hieng hin a ziek a:
4. Hi hi Iengkim LALPA, Israel Pathienin Jerusalema inthoka Babulona sala an thuoihai kuoma a hril chu a nih:
5. "Inhai bawlin umhmun khuor unla, thlaihai chingin a tharsuok fa ro.
6. Nuhmei pasal inneiin, naupa le naunuhai nei unla, in naupahai nuhmei ding zongpek unla, in naunuhai pasal ding zongpek bok ro, nangni anga thla an hung nei ve theina dingin. Chu taka chun hung pung unla, kiem tieng pan naw ro.
7. Sala ka thuoina cheu khuo ta dinga muongna le hmuingilna chu zong ro. Chu ding chun LALPA kuomah hni ro; a hmuingil chun nangni khom in hmuingil ve ding a ni si a.
8. A nih, hi hi Iengkim LALPA, Israel Pathien hril chu a nih: "Nangni laia zawlneihai le aisanthiemhai hlemin um naw ro. An mang an hril cheu chu ngaithla naw ro.
9. Ka hmingin khel thu an hril cheu a ni kha. Anni chu ka mi tirhai an ni nawh" ti hi LALPA thu suok a nih.
10. Hi hi LALPA hril chu a nih: "Babulon ta dinga kum sawmsari a tlingtla pha leh hung kan ka ti cheu a, hi hmuna thuoi kir nawk ding cheua ka thu tiem inzaum tak chu hung hlen ka tih.
11. In hmuingilna ding dam, thil tha lo in chunga a tlung nawna ding dam, beiseina neia hma tieng in thlir theina ding dama in ta dinga ka remruothai chu ka hriet," ti hi LALPA thu suok a nih.
12. "Chun, ka hming lamin, ka kuomah hung tongtai in ta, lo ngaithlang ka ti cheu.
13. Mi zong in ta, in lungril po poa in mi zong huna chun mi hmung in tih.
14. Nangni mi hmu theiin um tang ka ta, hnam tin lai le ram tina ka hnot darna cheu hmuna inthok chun thuoi khawm nawkin, in saltangnaa inthokin thuoi kir ka ti cheu" ti hi LALPA thu suok a nih.
15. Nangni chun, "LALPAN Babulon rama khom kan ta dingin zawlnei a mi'n dinpek" in ti khom a ni el thei.
16. Davida lalthungphaa thunghai le Jerusalema la chambang, Babulon tienga sala thuoi sa ve lo in unauhai chungchang thu LALPAN a hril chu hieng ang hi a nih.
17. A nih, Iengkim LALPA chun hieng ang hin a tih: "An chungah kawlhnam dam, tam dam le hripui dam inlengtir ka ta, theichang hrut, fak tlak der lo angin siem ka tih.
18. Kawlhnam le tam le hripuiin hnot zui ka ta, hnuoia lalram po po intentir ka ta, mi tongsie le pangzat phur an ta, ka sukdarna hnam po po hmusit le hal kawng ning an tih.
19. An kuomah ka thu hriltu ding ka siehlaw zawlneihai ka tir ka tir khoma an lo ngaithlak nuom si nawh. Nangni saltanghai khomin in ngaithlak chuong bik nawh" ti hi LALPA thu suok a nih.
20. Chuleiin, Jerusalema inthoka Babulona ka thon hmang, nangni saltang po pohai, LALPA thu hi ngaithla ro.
21. Ka hming sala in kuoma khel thu hril hlaktu Kolai naupa Ahab le Maseia naupa Zedekia chungthua Israel Pathien, Iengkim LALPA hril chu hi hi a nih: "Babulon lal Nebukadnezzar kutah peng ka ta, in mithmu ngeiah anni chu sukhlum a tih.
22. Anni lei chun Judai rama mi Babulona saltang po po chun, 'Babulon lalin meia a raw hlum Zedekia le Ahab angin LALPAN i chungah thaw ve raw se' ti hi tongsie inphurna tonglamkeiah hung hmang pha hiel an tih.
23. Israel rama chun thil invet thlak tak an thaw a, an tuolbawmhai nuhmei an uirepui a, ka hming salin, ka thupek ni si loin, khel thu an hril a. Chu chu kei a hmutu le hrepuitu chu ka nih" ti hi LALPA thu suok a nih.
24. Nehelam mi Semaia kuomah hi thu hi hril rawh.
25. "Israel Pathien, Iengkim LALPA chun hieng hin a tih: Nangma thuin thiempu Maseia naupa Zefania kuomah lekha i thon a, thiempu dang po pohai le Jerusalema mipuihai kuomah a kawpi i thon tawl a. Zefania kuoma chun,
26. LALPA tempul enkoltu dingin LALPAN Jehoiada aiin thiempuah a ruot che a, mi invet, zawlnei inti taphothai chu thir kol i'n buntir ding i nih.
27. Ieng dinga Anathot khaw mi Jeremia, in kuoma zawlnei anga hung insal kha i zil naw am a na?
28. Babulona dam lekha a hung thon a, 'In sal intang sung ding hi a sawt ding a ni leiin in bawlin umhmun khuor unla, huonhai siemin a tharsuok chu fa ro' dam a hung ti a nih" tiin.
29. Thiempu Zefania-in Semaia lekhathon a hmu chun Jeremia kuomah a chawi a, a tiem a.
30. Chu phing leh LALPA thu chu Jeremia kuomah a hung tlung a:
31. "Hi thucha hi saltanghai kuomah thon rawh: Nehelam mi Semaia chungthua LALPA thu suok chu hi hi a nih: Semaia kha ka tir ni si loin thil dam a hril lawk a, khel thu a'n ringtir cheu a.
32. Chuleiin, LALPA chun hieng hin a tih: Nehelam mi Semaia le a thlahai chu hrem ngei ngei ka tih. Ka laka hel thu a hril leiin hieng a mihai lai hin tu khom dam khawsuok um naw ni hai a, ka mihai ta dinga thil tha ka thaw dinghai khom hmu phak bok naw nih' ti hi LALPA thu suok a nih", tiin.
←  Jeremiah (29/52)  →