←  Jeremiah (28/52)  →
1. Juda lal Zedekia inlala inthoka a kum lina, thla nganaq chun Azur naupa zawlnei Hanania, Gibeon mi chun thiempuhai le mipui po po hmaah LALPA tempula chun a mi biek a, ka kuomah, "
2. Iengkim LALPA, Israel Pathien chun hieng hin a tih: Babulon lal ringkol chu suktliek ka tih.
3. Babulon lal Nebukadnezzarin LALPA tempula inthoka bur le bel a lak po po chu kum hni sungin hi hmuna ngei hin hung inthaktir nawk vong ka tih.
4. Hi hmuna hin Juda lal Jehoiakim naupa Jehoiachin le Babulona fe Juda mi sala intanghai po po chu hung thuoi kir nawk vong ka ta, Babulon lal ringkol chu ka suktliek ding a nih' ti hi LALPA thu suok a nih" tiin.
5. Chu phing leh zawlnei Jeremia chun LALPA tempula ngir thiempuhai le mipuihai hmaa chun zawlnei Hanania chu a don a.
6. Ama chun, "Amen, chuong ang chun LALPAN thaw sien ni ding maw! LALPA tempula bur le belhai le saltanghai chu i hril ang chun LALPAN thawin hi hmuna hin hung intlungtir nawk vong raw se.
7. Amiruokchu, nangma le mipuihai hriet phak ngeia ka hril hi lo ngaithla rawh.
8. Kha hma daia inthok tah khan, nangma le keima inlang hma khan zawlneihai chun ram tam tak le lalram tam tak chunga indona dam, sietna dam le hripui dam hung tlung ding thu an hril lawk hlak a.
9. Muongna hun hung tlung ding zawlnei hrilhai chu a hung tlung indik chun, ama chu LALPA tir ngei a nih ti chieng el a tih" a ta.
10. Zawlnei Hanania chun zawlnei Jeremia ringkol bat lai chu a lak thlak a, a suktliek a.
11. Mipui po po hmaa chun Hanania-in, "Hieng hin LALPA chun a tih: Hieng ang bok hin Babulon lal Nebukadnezzar ringkol chu kum hni sung ngeiin hnamhai po po ringa inthokin suktliek ka tih' a ti a nih" a ta. Chu phing leh zawlnei Jeremia chun a maksan ta a.
12. Zawlnei Hanania-in zawlnei Jeremia ringkol bat a suktliek hnung chun LALPA thu chu a hung tlung a,
13. "Fe la, Hanania kuomah hieng ang hin va hril rawh: Thing ringkol i suktliek a, chu ai chun thir ringkol i siempek lem a.
14. Hieng ang hin Israel Pathien, Iengkim LALPA chun a hril: Babulon lal Nebukadnezzar rong an bawl theina dingin hieng hnam po po hi thir ringkol i'n battir a nih; ama rong bawl an ta; ram hnuoia ramsahai chen khom ama ka pek bok a nih, tiin.
15. Chun, zawlnei Jeremia chun zawlnei Hanania kuomah, "Ngai rawh, Hanania, LALPAN a tir awzawng naw che! Hieng mihai hi khel thu inringtir i tum mei mei a ni lem.
16. Ngai ta, hnuoi chunga inthok hin ka sukbohmang dai ding che a nih' ti hi LALPA thu suok a nih. LALPA laka helna thu i tlang insampui leiin tu kum ngei hin thing i tih" a ta.
17. Chuongchun, chu kum thla sarinaa chun zawlnei Hanania chu a thi ta a.
←  Jeremiah (28/52)  →