Jeremiah (27/52)  

1. Juda lal Josia naupa Zedekia inlal tan hlimin LALPA kuoma inthokin hi thu hi a hung tlung a.
2. LALPA chun, "Ringkol le a hrui siem la, i ringah bat rawh.
3. Edom lal hai, Moab lal hai, Amon lal hai, Tura lal hai le Sidon lal hai kuoma chun Jerusalema Juda lal Zedekia kuoma an palai hung tirhai hmangin an kuomah thu thon rawh.
4. Hieng thu hi an puhai kuoma hril dingin hril rawh: Israel Pathien, Iengkim LALPA chun hieng hin a tih:
5. Ka thilthawtheina ropui tak leh ka ban pharin hnuoi le mihriemhai le a chunga um ramsahai hi ka siem a, ka pek nuom nuom kuomah ka pek a.
6. Tu khom hin ka rongbawltu Babulon lal Nebukadnezzar kutah hi ram po po hi ka pek tah a, ramsahai khom ama rong bawl dingin ka pek tah bok a nih.
7. Ama tlakran hun a tlung hma chun hnam po poin ama le a nauhai le a tuhai rong bawl an ta, chu hnunga ruok chu a siet hun hung tlung a ta, hnam hrang hrang le lal tum tumin an thu hnuoiah sie ve thung tang an tih.
8. "Amiruokchu, hnam amanih ram amanih tu khom Babulon lal Nebukadnezzar ringkol bat nuom lo le a rong bawl nuom lo an um chun chuonghai chu amain a tukdol hmain kawlhnam le tam le hripuiin keiman hrem tawl ka tih.
9. In zawlnei hai, aisanthiem hai, mang hril fie thiem hai, rau ko thiem hai le dawithiem haiin in kuomah, 'Babulon lal rong bawl naw ti niu' an ti chun an thu ngaithla naw ro.
10. Keiin in rama inthoka hla takah ka hnot suok theina ding cheu le in bohmang theina dingin in kuomah khel thu an hril hlak a nih" ti hi LALPA thu suok a nih.
11. Amiruokchu, Babulon lal ringkol bat a, a rong bawl nuomtu hnam chu an ram ngaiah inumtir ka ta, a hnuoi inlet an ta, chu taka chun cheng zing an tih'" ti hi LALPA thu suok a nih.
12. Chun, Juda lal Zedekia kuomah chu thu char chu hieng hin ka hril a: Babulon lal ringkol bat unla, ama le a mihai rong bawl unla, chuongchun hring in tih.
13. Babulon lal rong bawl nuom lo hnam chungthu LALPAN a hril tah ang khan, ieng leiin am kawlhnam hai, tam hai le hripui hai leiin nang le i mihai chu in thi ding?
14. Zawlnei tu khomin in kuomah, 'Babulon lal rong bawl naw ro' an hung ti chun ngaithla naw ro, in kuoma khel thu an hril mei mei a ni lem.
15. Anni chu ka tir an ni naw a, ka hming salin khel thu an hril hlak a, nangni le in kuoma thu hung hriltuhai chu hnot suok a, ka sukbohmang theina ding cheuin' ti chu LALPA thu suok a nih.
16. Chun, thiempuhai le mipuihai kuoma khom ka hril bok a. LALPA chun hieng hin a tih: In kuoma zawlnei tu khomin, 'Ngai ro, Babulona inthokin LALPA tempula bur le belhai chu an hung chawi kir nawk vak ding a nih' an ti chun awi naw ro, khel thu an hril cheu a nih.
17. Anni chu ngaithla naw unla, Babulon lal rong bawl unla, hring in tih. Ieng leiin am hi khawpui hi sukrama a um ding chu?
18. Zawlnei an ni a, LALPA thu an kuomah a um a ni chun, LALPA tempul le Juda lal in le Jerusalema bur le bel la umhai chu Babulon tienga tol a ni nawna dingin Iengkim LALPA kuomah ngen lem raw hai se.
19. Chuong ang chun Iengkim LALPAN dar ban hai, dar tuizem hai, thilthuta hmang tawlailir hai le bur le bel, khawpuia an maksanhai chungchang thu chu a hril a ni kha.
20. Babulon lal Nebukadnezzar-in Juda lal Jehoiakim naupa Jehoiachinp le Judai ram le Jerusalema mi tha po po Babulon tienga sala a thuoi khan chuonghai chu a lak sa naw hrim a nih.
21. A nih, LALPA tempul le Juda lal in le Jerusalema thil maksana la umhai thu kha Iengkim LALPA, Israel Pathien chun a hril a nih.
22. "Chuonghai chu Babulon tieng lakin um an ta, anni ka hung kan hma po chu chutaka chun um zing an ta, keiin la kir nawk ka ta, hi hmuna hin sie kir nawk ka tih" ti hi LALPA thu suok a nih.

  Jeremiah (27/52)