←  Jeremiah (26/52)  →
1. Juda lal Josia naupa Jehoiakim inlal tan tir lai LALPA thu chu Jeremia kuomah a hung tlung a.
2. "LALPA chun hieng hin a hril a: 'LALPA tempul tuol sungah ngir la, Judai ram hmun hrang hranga inthoka LALPA tempula chawibiek dinga hunghai kuomah thu ka pekhai po po che kha ieng khom hmai nei der loin hril vong rawh.
3. Ngaithla a, an um dan suol maksan khom an um miel el thei a nih. Chuong a ni chun, an suolna leia an chunga sietna intlungtir ka tum chu intlungtir loin ka thu sut ka tih.
4. Chun, nangin an kuomah, 'Hi hi LALPAN a hril: In kuoma ka pek, ka thu in poisa naw a, ka dan khom in zawm bok nawh.
5. In kuoma ka hung tir rop hlak ka zawlneihai thu in poisa naw leiin,
6. hi in hi Siloo angin suksieng ka ta, hnuoi chunga hnam tinreng tongsephurin um a tih' tiin hril bok rawh" tiin.
7. Thiempu hai, zawlnei hai le mipui po po chun LALPA tempula Jeremia thu hril chu an ngaithlak a.
8. Mipuihai kuoma hril dinga LALPAN thu a pek po po a hril zo chun thiempu hai, zawlnei hai le mipui hai chun an man a, "I thi ngei ding a nih.
9. Ieng dinga LALPA hming sala, 'Hi tempul hi Silo ang la ning a ta, hi khawpui hi hluotu um loin la rausan an tih' tia i hril am a na?" an ta. Chuongchun, LALPA tempula chun mipuiin Jeremia chu an bawr luoi luoi a.
10. Hieng thu hi lal ina Juda roreltuhaiin an hriet chun tempulah an hang fe a, LALPA tempul lutna Kotkhar Thara chun an inthung a.
11. Thiempuhai le zawlneihai chun roreltuhai le mipuihai kuomah, "Hi khawpui siet ding thu hi a hril lawk leiin hi pa hi thi tlak a nih. In na ngeiin a hril khom in hriet kha!" an ta.
12. Jeremia chun roreltuhai le mipuihai kuomah, "In thu ngaithlak tah po po ang khan, hi tempul le hi khawpui siet ding thu hi hril dingin LALPAN a mi tir a nih.
13. Chuleiin, tuhin in um dan le chet dan insiem tha unla, LALPA in Pathien thu chu awi ro, chuongchun LALPAN in chunga sietna hung tlung ding a puong tah chu sut nawk a tih.
14. Kei ruok chu in kuta um ka ni hi; indik le tha in ti dan ang angin mi thaw ro.
15. In mi sukhlum chun nangni le hi khawpui le a sunga chenghai chungah poi tawk lo thisen maw chu tlang a tih ti hre ro; LALPA chun in hriet ngeia hieng thuhai hi indik taka hril dingin a mi tir si a" a ta.
16. Chuongchun, roreltuhai le mipuihai chun thiempuhai le zawlneihai kuomah, "Hi mi hi thi ding a ni nawh! LALPA ei Pathien hmingin ei kuoma thu a hung hril a ni hi" an ta.
17. A ram mi upa iemani zat an hung ngir suok a, mipui pungkhawm hmaa chun,
18. "Juda lal Hezekia hun lai khom khan Moreset mi Mika khomin Juda mi po po kuomah, "Iengkim LALPA chun hieng hin a hril:'Zion chu lo anga inlet ning a ta,Jerusalem chu tlu se rem rum a ta,Tempul muol chu chimbukin bawm a tih"tiin a lo hril lawk a ni kha.
19. Juda lal Hezekia le Judahai khan ama chu an sukhlum am a nih? LALPA tiin, LALPA ditsakna an ngen a, LALPAN an chunga sietna intlungtir dinga a puong ta chu a sut nawk a ni naw am a ni? Sietna rapthlak tak chu eini ngeiin ei tong buok tep lem a ni hi!
20. Chun, mi dang, Kiriat Jearim mi, Semaia naupa Uria khomin LALPA hmingin hi khawpui siet ding thu bok hi Jeremia ang hin a hril lawk ve kha.
21. Lal Jehoiakim le a mi lienhai po po le roreltuhaiin an hriet chun Uria chu lalin sukhlum a tum a, sienkhom chu chu Uria-in a lo hriet a, tiin a tlan hmang a, Aigupta ramah a fe a.
22. Lal Jehoiakim chun Aigupta ramah Akbor naupa Elnathan le mi iemani zat a tir a.
23. Uria chu Aigupta rama inthokin an hung thuoi kir a, lal Jehoiakim hmaah an thuoi a, kawlhnamin a sat hlum a, mi naran phumnaah a ruong an pei lut a ni kha" an ta.
24. Chu bakah, Safan naupa Ahikam chun Jeremia chu a tan tlat leiin, that dingin mipui kuomah an pek lut ta naw a nih.
←  Jeremiah (26/52)  →