←  Jeremiah (25/52)  →
1. Juda lal Josia naupa Jehoiakim inlala inthoka a kum lina chun Judai rama mihai po po chungthua LALPA thu chu Jeremia kuomah a hung tlung a; chu chu Babulon lal Nebukadnezzar inlal kum khatnam a nih.
2. Chuongchun, zawlnei Jeremia chun Judai rama um po po le Jerusalema cheng po po kuomah chu thu chu a hril a:
3. Kum sawmhni le kum thum sung, Amon naupa Juda lal Josia inlal kum sawm le kum thumnaa inthokin tu chen hin LALPA thu chu ka kuomah a hung tlung hlak a, chuonghai chu ka hril ka hril hlak cheu a, sienkhom in ngaithlak si nawh.
4. Chun, LALPAN in kuomah rongbawltu zawlneihai a hung tir a hung tir hlaka chu an thu in ngaithlak naw a, an hrilhai in poisa bok nawh.
5. Anni chun, "Mi tin mani suolna lampuia inthok le thil tha naw thaw in chingnaa inthokin hung kir un la, LALPAN nangni kuoma le in thlatuhai kuoma tiena tlanga inthoka kumkhuoa dinga a pek cheu rama chun cheng thei in tih.
6. Pathien danghai be ding le an rong bawl dingin zui naw unla, in kuta siem milemhaiin mi cho lungsen naw unla, chuongchun sukna nawng ka ti cheu" tia LALPA hril chu in kuomah an puong hlak a ni kha.
7. "Nisienlakhom, in mi ngaithlak naw a, in kuta siem thilhaiin in mi cho phawk a, nangni le nangni chungah thil tha lo in intlun hlak" ti hi LALPA thu suok a nih.
8. Chuleiin, Iengkim LALPA chun hieng hin a hril: "Ka thu in ngaithlak si naw leiin,
9. hmar tienga hnamhai le ka siehlaw Babulon lal Nebukadnezzar chu ko ka ta, hi ram le a sunga umhai le a kawl vela hnam chenghai po po chu hung bei an tih. Sukbohmang vong tawl ka ta, mi pangzat le endong ning an ta, kumkhuoin tlu ram an tih.
10. Hlimna le lawmna ri hai, mo le moneitu rawl ri hai, bu rawt ri hai le khawnvar eng hai po po suktawp vong ka tih.
11. Hi ram pumpui hi rausan ramah inchangtir ka ta, Babulon lal rong kum sawmsari sung bawl an tih.
12. "Kum sawmsari a'n voi pha leh Babulon lal le a hnam, Kaldai mihai chu an suolna leiin hrem ka ta, kumkhuoin sukram ka tih" ti hi LALPA thu suok a nih.
13. "Ka hril tah po pohai, hi lekhabua ziek po pohai le hnamhai chungthua Jeremia hril lawk po pohai chu, chu ram chunga chun hung intlungtir ka tih.
14. Hnam tum tum le lal ropui tak tak hai chun anni chu salah thuoi ve thung an ta, an thilthaw ang pei le an kut sinthaw ang phu peiin ka thungrul ding a nih" tiin.
15. LALPA, Israelhai Pathien chun ka kuomah hieng hin a tih: "Hi ka lungsenna uoiin no hi ka kuta inthokin la la, ka tirna ding che hnamhai chu indawntir rawh.
16. Dawn an ta, pem tliei tliei an ta, anni lai kawlhnam ka'n lengtir ding a ni leiin invet zo an tih" tiin.
17. Chuongchun, LALPA kuta no chu ka lak a, a mi tirna hnamhai po po chu ka'n dawntir a.
18. Jerusalem le Judai ram khuoa hai fein, an lalhai le hotuhai chu ka'n dawntir a, chu taka inthoka voisun ni chen hin rausan hmun, mi pangzat, nuisaw le tongsephur an hung ni ta pei a nih.
19. Chun, Aigupta ramah fein, Faraw le a mi lienhai, thoktuhai le mipuihai chu kan biekpui a, chu no tiuma mi chu an dawn bok a,
20. anni bakah a rama cheng ram dang mihai khomin an dawn a. Chuongchun, Uz rama lalhai dam; Palestina rama lal po po, Askelon le Gaza le Ekron khuoa lalhai le Asdod khuoa maksana la umhai dam;
21. Edom le Moab le Amon thlahai dam;
22. Tura le Sidona lalhai le tuipui kam rama lalhai dam;
23. Dedan hai, Tema hai, Buz hai le ram hlaa chenghai dam;
24. Arabia rama lalhai po po le thlalera ram dang mi chenghai po po dam;
25. Zimri hai, Elam hai le Media hai lalhai dam;
26. hmar tieng lalhai, hmun hla le hnaia mihai le hnuoia lalram po poin an dawn seng a. An renga an dawn hnung chun Sesak laln khomin dawn veng a tih.
27. Chun, Iengkim LALPA, Israelhai Pathien chun hieng hin hril rawh a mi tih: Dawn unla, inrui unla, inluok unla, tlu unla, tho ta naw ro, nangni lai kawlhnam ka hung tir ding a ni si a.
28. Sienkhom, i kuta inthoka no chu la nuom loa an dawn nuom bok naw chun, an kuomah hieng hin hril rawh: 'In dawn ngei ding a nih' ti hi Iengkim LALPA thu suok a nih.
29. En ta u, ka hminga ko khawpui chunga khom sietna ka'n tlungtir tan a, nangni lem chun hremna pumpel thei in inring hrim hrim am a ni? Hremna pumpel naw top in tih, hnuoi chunga chenghai po po chungah kawlhnam ka'n let ding a ni si a' ti hi Iengkim LALPA thu suok a nih.
30. "Chuleiin an kuomah hieng thuhai hi puong la, hieng ang hin hril rawh:LALPA chu van sanga inthok,A hung khek suok ding a na,A chengna thienghlim a'nthok,Hi ram hi inrum khum a tih.Grep sawrtuhai khek ang elin,Hnuoia chenghai po po hi,A hrawk khum ding a ni si.
31. A thangkhawk ri so vel chun,Kawl kil chen nghor suok a tih;Hnuoia hnamhai po po chu,LALPAN a khing ding a na,Hringmihai ro rel a ta,Mi rilohai po po chu,Kawlhnamin sukhlum a tih'Ti hi LALPA thu suok a nih.
32. Iengkim LALPA chun hieng hin a tih:"En ta, sietna runpui chu,Hnam tin chungah a tlung ie;Hnuoi hmun tawpa inthokin,Thli sie a hung inthok saw!"
33. Chu nia LALPA mi thathai chun hnuoi tawpa inthoka hnuoi tawp chen dap suok an ta, sun lo, lak khawm lo le phum loin um an ta, hnuoi chungah hmunhnok angin pei dar an tih.
34. Berampuhai, tap rak unla,Inring takin khek rong rong ro;Beram ruol hmathuoituhai,Hnuoiah intal top top ro.Thata in um ni a tlung,Belhemtu bel ang el a,Deng dar in ni ding ni chu.
35. Berampuhai ta dingin,Tlan hmangna a um naw a,Beram ruol thuoitu ta dingin,Suok ngaina a um ta nawh.
36. Berampu rawl chu ngai ro,Ran ruol thuoitu tap ri chu;An tlatna hlobet hmun chu,LALPAN a sukram mek a;
37. LALPA lungsenna leiin,Tlatna hmun hring muongum chu,Rausanin a um mek si.
38. Sakeibaknei ang elin,A buzawl suoksan a tih;Neksawrtu kawlhnam lei leLALPA lung intur leiin,An ram a ram zo ta si.
←  Jeremiah (25/52)  →