←  Jeremiah (24/52)  →
1. Nebukadnezzar, Babulon lalin Judahai lal Jehoiakim naupa Jehoiachin le Juda hotuhai, mi themthiemhai le thirsuhai leh Jerusalema inthoka Babulon tieng sala a thuoi hnung khan LALPA tempul hmaa theichang bawm hni inthut chu LALPAN a mi'n entir a.
2. Bawm pakhata chun theichang tha tak, a ra hmin hmasa ang chu a um a, bawm danga chun theichang tha lo, fak tlak lo khopa sie a lo um a.
3. LALPA chun ka kuomah, "Jeremia, ieng am i hmu a?" a ta. Kei chun "Theichang ka hmuh. A then chu a tha hle a, a then chu fak tlak loa sie a nih" ka ta.
4. Chun, LALPA thu chu ka kuomah a hung tlung a.
5. "LALPA, Israelhai Pathien chun hieng hin a tih: Juda lal saltanghai, Kaldaihai rama an thatna dinga ka tir suokhai chu, hieng theichang ra tha ang hin ka en tawl ding a nih.
6. An thatna dingin an chungah mit inlen zing ka ta, hi rama hin thuoi kir nawk ka ta, anni chu thiek hmang loin tungding ka ta, phawi hmang loin phun lem ka tih.
7. Kei hi LALPA ka nizie an mi hriet theina dingin lungril peng ka tih. Ka mihai ning an ta, kei an Pathien ning ka ta, an lungril po po leh keima tieng an hung ngha kir nawk ding a ni si a.
8. "Theichang tha lo, fak thei lo khopa sie ang hin Judahai lal Zedekia le a thoktuhai le Jerusalema la chambang, hi rama la umhai le Aigupta rama chenghai chu nghatsan tawl ka tih.
9. Ka hnot hmangna khawlai rama khom mihai tirdak le theida dingin siem tawl ka ta, mi vin le hal kawng, mi nuizat le tongsie phurin um an tih.
10. Anni le an thlatuhai kuoma ram ka peka inthoka sukbohmang anni hma khat chu anni lai kawlhnam le tam le hripui inlengtir ka tih" tiin.
←  Jeremiah (24/52)  →