←  Jeremiah (23/52)  →
1. "Ka ran tlatna hmuna beramhai suksetu le sukdartu berampu chu a chung a va hang pik ngei" ti hi LALPA thu suok a nih.
2. Chuleiin, LALPA, Israelhai Pathien chun ka mihai enkoltu berampuhai kuomah hieng thu hi a hril: "Ka ran ruolhai sukdar a, hnot hmang a, in enkol tha naw leiin, in thilthaw indik naw leiin ka hrem ding cheu a nih," ti hi LALPA thu suok a nih.
3. "Ka ran ruol, hlaa la um sunhai chu ka hnot darna hmuna inthokin thuoi khawm nawk ka ta, an huongah tla nawk an ta, chu taka chun nasa takin hung pung an tih.
4. Anni enkoltu ding berampu sieng ka ta, tiin an thla phang ta naw ni a, tu khom inhmang um ta nawng an tih" ti hi LALPA thu suok a nih.
5. "Ngai ta, Davida ta dinga felna kau zar ka hung insuopek hun ding chu a hung tlung ding a nih" ti hi LALPA thu suok a nih. Ama chu lalah inthung a ta, var takin a ram pumah indik tak le fel takin hung thawng a tih.
6. Ama huna chun Juda chu sandamin um a ta, Israel chu him takin um a tih. A hmingah EI FELNA LALPA tiin ko an tih.
7. "Chuongchun, chu hun chu a hung tlung ding a ni tah" ti hi LALPA thu suok a nih. "Chu pha chun, 'Aigupta rama inthoka Israelhai thuoi suoktu LALPA hringna salin' ti ta loin,
8. Hmar tieng ram le a hnot darna ram po poa inthoka Israel thlahai hung thuoi khawm nawktu LALPA hringna salin' tiin thu inkham lem tang an tih. Chu pha chun anni rama ngei um tang an tih" tiin.
9. Zawlneihai chungthua chun:Ka lung hi a koi dar a,Ka ruhai an inthin a.Zu rui ang el ka ni ie,Zuin a chie zor ang el. Chu chu LALPA thaw a na,A thu thienghlim lei a nih.
10. Ram chu uiretnan sipin,Tongsie phur a ni leiin,A ram phekin a tawl a,Thlalera hmun hringhai khom,A hung tawl zo ta vong a,Zawlneihan lam suol hrawin,An thilthawtheina kol chu,Fel naw takin an hmang si.
11. "Zawlneihai le thiempuhan,Pathien an poisa naw a,Ka tempul sunga chen khom,Ritlona thil ka hmu si"Tiin LALPA chun a hril.
12. Chuleiin an lampui khom,Hung innal deu deu a ta,Thimah hnot lut ning an ta,Chu chun intol thlung an tih.Ka hrem hun a tlung pha chun,Sietnain vur tawl ka tih"Tiin LALPA chun a hril.
13. "Samaria zawlneihai lai,Thil tirdakum ka hmu a,Baal thu an hril tawl a,Israelhai an thuoi hmang.
14. Jerusalema zawlnei lai,Thil rapthlak tak ka hmu a,Uirea khel hringpuiin,Thil suol thawtuhai kut chu,Sukhrattuah an thang a,Tu khomin an ritlona,Ban an tum naw pha a nih.Jerusalem mihai hi,Ka ta ding chun Sodom leGomorra mi ang an nih.
15. Zawlneihai chungchanga Iengkim LALPA thu suok chu hi hi a nih:"Bu kha in faktir tawl ka ta,Tur tui indawntir tawl ka tih,Jerusalema zawlneihai leiin,Pathien ngaisak nawna lungril,A ram pumah a'n leng si" tiin.
16. Iengkim LALPA chun hieng hin a hril:" Zawlneihai thu hril awi naw ro,Beiseina lem petuhai hi.LALPA baua an dong ni lo,An lungrila an suongtuo thil,In kuomah an hril hlak si a.
17. Kei mi hmusittu kuomah,'I ta dingin thang a tih'Tiin an hrilpek rop a;An lungril nuomzawng hnota,Lulul insuohai kuomah,'Sietna i chungah tlung naw nih'Tiin an hrilpek bok hlak.
18. LALPA remruotna hmunah,A tu am thang ve hlakin,Ama hmu le a thu hrein,An ngaithlak tah hrim hrim a?
19. LALPA lungsenna thlipui chu,En rawh a hung hrang ding a nih,Thawngaleivir a hung thla,Mi suolhai lu nuoi dingin.
20. A lungrila a thil tum,A hlen kim zo hma khat chun,LALPA lungsen kir naw nih.A ni a hung tlung pha chun,Iengkim la hre chieng in tih.
21. Hieng zawlneihai hi ka tir nawh,Anni thu a nih an invirpui;An kuomah thu ka hril nawh,Anni thu a nih an hril.
22. Ka remruotnaa thang ve,An lo ni chu ni sienla,Ka mihai kuomah ka thu,An puong dar tah ding a na,Thil tha naw an thaw lakah,Inlamlettir tang an tih.
23. "Hla taka um Pathien ni loin, hnaitea um Pathien ka ni lem" ti hi LALPA thu suok a nih.
24. "Ka hmu thei lona dinga inbiru thei tu am an um ding a na?" ti hi LALPA thu suok a nih. "Kei hi hnuoi le van hluo siptu ka nih" ti hi LALPA thu suok a nih.
25. " 'Mangah ka mang, mangah ka mang' tia ka hminga khel hril hlaktu zawlneihai thu hril chu ka hriet.
26. Zawlnei khelhlip, mani suongtuona thu hril hlakhaiin hieng ang lungril hi ieng chen am an put ding a na?
27. Anni le anni mang inhril tuoin, an thlatuhaiin Baal an biek leia ka hming an theinghil ang khan, ka mihai chu ka hming intheinghiltir an tum a nih.
28. Mang neitu zawlnei chun a mang chu hril sien la, ka thu hretu zawlnei ruok chun ka thuhai chu ringum takin puong raw se. Bu tak le bupawlin ieng am inangna an nei a?" ti hi LALPA thu suok a nih.
29. "Ka thu hi mei ang le lung vuok nawina tubo ang a ni naw am a ni?" ti hi LALPA thu suok a nih.
30. "Chuleiin, ngai rawh, ka thu ni awm taka an ruolhai thu hril sawng hlak zawlneihai hi ka do a nih" ti hi LALPA thu suok a nih.
31. "Ngai ta u, zawlnei mani phuokfawm hril tlor a, 'LALPAN a tih' ti hlaktuhai hi ka do a nih" ti hi LALPA thu suok a nih.
32. "A nih, ka tir le ruot khom ni lo, mang tehlem mei mei hrila khel muhluma ka mihai thuoi hmang ching hlak zawlneihai hi ka do takzet a nih. Ka mihaiin tangkaipuina hlek khom an nei nawh" ti hi LALPA thu suok a nih.
33. "Hieng mipuihai laia mi tuin amanih, zawlnei tuin amanih, thiempu tuin amanih 'LALPA thucha chu ieng am a na?' tia an indon cheu chun, 'Nangni hi a thuchal chu in na, ka pei hmang ding cheu a nih' ti hi LALPA thu suok a nih, tiin in don ding a nih.
34. Zawlnei amanih, thiempu amanih le tu el khomin, 'Hi hi LALPA thucha chu a nih' a ti chun ama le a sungkuohai hrem ka tih.
35. Nangni laia in ching tak chu, 'LALPAN iengtin am a don? LALPAN iengtin am a hril?' tia in ruolhai amanih in sunghai amanih in indon kuol hi a nih.
36. Amiruokchu, 'LALPA thucha' ti ruok chu hril ta naw ro; mi tinin in hril chu nangni thucha a ni leiin, Iengkim LALPA, ei Pathien, Pathien hring thucha chu in keilet mei mei a nih.
37. Zawlnei kuoma chun, 'LALPAN iengtin am a don che? LALPAN iengtin am a hril a?' tiin indon ro.
38. 'LALPA thucha chu' in ti vai chun, LALPA chun hieng hin a tih: 'LALPA thucha chu in ti ding a ni nawh' ka ti sain 'LALPA thucha chu a nih' in ti leiin,
39. ngai ro, ka pot suok ngei ding cheu a na, ka kuoma inthokin pei hmang ka ti cheu, nangni le in pahai kuoma ka lo pek tah hi khawpui leh hin.
40. Chun, kumkhaw muolphona le inzakna theinghil thei ruol lo chu in chungah hung intlungtir ka tih" tiin.
←  Jeremiah (23/52)  →