←  Jeremiah (22/52)  →
1. LALPA chun hieng hin a tih, "Juda lal inah zu fe la, hi thu hi zu hril rawh:
2. Aw, Juda lal, Davida lalthungphaa inthung, nangma le i thoktuhai le hi kotkhara hung lut hlak i mihai leh, LALPA thu suok hi lo ngaithla ro.
3. LALPA chun hieng hin a tih: Indik tak le fel takin ro rel unla; sukdudatu kuta inthokin rok tuokhai chu san suok unla; mikhuolhai, fahrahai le hmeithaihai neksawr le an chunga indik lo taka thaw ching naw unla; hi hmuna hin poi tawk lo thisen insuo bok naw ro.
4. Hi thu hi fimkhur taka in zawm chun, Davida lalthungphaa inthung lalhai chu tawlailir amanih le sakor amanih chunga hai chuongin, an thoktuhai le mipuiin zuiin, hi in kotkhara hin lut hlak an tih.
5. Amiruokchu, hieng thupekhai hi in zawm naw chun hi lal in hi tlu ram vong a tih ti keima ngei insalin ka hril a nih ti hi LALPA thu suok a nih' tiin."
6. LALPA chun Juda lal in chungthu chu hieng ang hin a hril:Ka ta dingin Gilead ang el leLebanon tlang sip ang ni la khom,Thlalerin siem ka ti che a,Khawpui rausan hnung angin.
7. Suksetu ding hung tir ka ta,Hreipui hung chawi seng an ta,I sidar tha thahai phur an ta,Meipuiah ti hlut hlut an tih.
8. "Chun, hnam danghai, hi khawpui hung pal tlangtuhai chun, 'Ieng dinga hieng ang lawma LALPAN hi khawpui chunga hin a thaw el am a na?' tiin indon tuong an tih.
9. An Pathien, LALPA thuthlung chu maksana hnam dang pathienhai be a, an rong an bawl lei a nih' tiin don an tih.
10. Lal thi chu ta naw unla,A um naw chu sun naw ro;Saltang chu sun rak lem ro,A pieng le murna ramah,Hung kir ta ngai naw ni a,Hmu khom hmu ta bok naw nih.
11. Juda lal Josia naupa Salum,i a pa Josia hung thlaktu, hi hmuna inthoka thuoi hmanga um chu hung kir nawk ta ngai naw nih, ti hi LALPA thu suok a nih.
12. Sala an thuoinaa an siena hmuna chun thing a ta, hi hmun hi hung hmu nawk ta ngai naw nih.
13. "Felnawnaa lal in bawl a,Indik loa insawng bawltu,A ram mihai sor hrep a,An hlaw pe si lotu chu,A chung a va hang pik ngei!
14. In ropui tak bawl ka ta,Pindan chunghnung lien tak leh;Tukver lien tak siem ka ta,Sidar thing phek bel ka ta,Rong senin nal vong ka tih'Titu chung ngei chu a pik.
15. Sidar thing in i bawl leiin,Inlal lemah i'n ngai a ni?I pa khan fak le dawn ding,A tlasam hlak am a ni?Indik taka a thaw leiin,A hmuingil an nawm a ni?
16. Mi pasie le tlasamhai,Chungthu a rel fel hlak a,Iengkimah a tluong a ni kha.Chuong ang chu nang ngei khomin,I mi hriet dan ding an naw maw?Ti hi LALPA thu suok a nih.
17. Sienkhom hlepruk dan ding le,Poi tawk lo thisen insuoa,Neksawra laklui danhai,Lungrilin i mel ran si.
18. Chuleiin, Juda lal Josia naupa Jehoiakim chungthu chu LALPAN hieng ang hin a hril:'' 'A poi ngei maw, unaupa!A poi ngei maw, unaunu!'Tiin sun naw ni hai a;'I pam ngei maw, ka lalpa!I ropuina a pam ie!'Tiin sun bok naw ni hai.
19. Sabengtung phum ang elin,Jerusalem kul puo tieng,A ruong chu kei phit an ta,Tuola chun dehawn an tih.
20. Lebanon tlangah kaiin,Chu tak a'nthok chun khek la,Basan chen thangkhawk raw se;Abarim tlangah tap rawh,I'n zompuihai po po kha,An bohmang vong ta si a.
21. I ngai i sukmuong lai khan,Fimkhur di'n ka'n fui che a,'Ngaithla naw ning' i ti si.I tleirawl lai a'nthok a,Chu chu i um dan a na,Ka thu i ngaithlak nuom nawh.
22. I berampuhai po po,Thliin len hmang vong a ta,I'n zompuihai po po khom,Salah intang vong an tih.I ritlonahai leiin,Chu pha chun muolpho taka,Hmaimawkin la um i tih.
23. Lebanon Ngaw Runaj cheng,Sidar ina bu khuortu,Nau hase ang topa na,Natnan a bawm pha chea,I nat tuor inrum ding chu,Ieng am top am ning a ta!
24. "Nang Jehoiachink hi Juda lal Jehoiakim naupa, ka suoi namna kutsebi khom ni la, ka kuta inthokin ka phawi suok ding che a nih.
25. That dinga zongtu che, Babulon lal Nebukadnezzar kuta le Kaldaihai kuta ngei chun pe suok ka ti che.
26. I piengna ni lo ram dangah nang le i nu, a hringtu che hi pei suok ka ta, chu taka chun thing in tih.
27. Kir nawk in chak em emna rama chun kir nawk ta naw ti niu" tiin.
28. Hi Jehoiachin hi bel koi dar,Mi hnawl hnung a ni naw maw?Ama le a thlahai chu,An hriet ngai lo rama chun,Ieng leia an pei suok am?
29. Aw ram, aw ram, aw ram,LALPA thu hi lo ngai rawh!
30. Hieng hin LALPA chun a hril:Nau nei der naw ang elin,Hi mipa hi inchik rawh:Pa hmuingil lo ding a na, A thlahai laia tu khom,Mi hmuingil um naw ni a,Davida lalthungphaah,Tu khom inthung naw ni a,Judai ram chungah tu khom,Inlal ngai bok naw ni hai,"Tiin LALPA chun a puong.
←  Jeremiah (22/52)  →