Jeremiah (20/52)  

1. LALPA tempula hotu tak, Imer naupa thiempu Pasurin Jeremia thu hrilhai chu a lo hriet a.
2. Chuongchun, thiempu Pasur chun zawlnei Jeremia chu mi a'n vuoktir a, LALPA tempula Benjamin Kotkhar Chuonchunga chun kol inbuntirin ripah a hren a.
3. A zinga Pasurin Jeremia kol bun a sut lai chun Jeremian, "Pasur, LALPAN i hming hi a thlak ta a, Magor-Misabib tia ko ni lem tang i tih.
4. LALPA chun hieng hin a tih: Ngai ta, nangma le i ruolhai po po ta dingin mi tibaiumah siem ka ti che a, hmelmahai kawlhnama i ruolhai an sam thluk lai chu i mit ngeiin hmung i tih. Judahai po po Babulon lal kutah pe vong ka ta, ama chun Babulon tieng sala a thuoi naw po kawlhnamin that a tih.
5. Chu bakah, khawpui hausakna po po hai, a thaw suok le thar suok po po hai, a ro hlu po po hai le Juda lalhai rosum po po hai chu hmelmahai kutah peng ka ta, anni chun rok an ta, lang an ta, Babulon tieng hawn vong an tih.
6. Chun, nang Pasur chu, i ina cheng po pohai leh, salah intang i ta, Babulon tieng thuoi an ti che a, chu taka chun thing i ta, khel thu i'n ba hlak i ruolhai po po leh chu taka chun phum an ti che" a ta.
7. Aw LALPA, nangin i mi hlem a,Hlemin ka um let der a ni hi.Ka nekin i hrat lem si a,Ka dol zor der a ni hi.Sunnithlaka mi cheksolin,Mi tinin an mi nuisaw.
8. Ka hang khek ve zat hlak chun,Inpawngnekna thuhai leSietna thu ngot ka puong si.LALPA thu ka puonghai chun,Nuizatbur mi'n changtirin,Mi hal kawng a mi'n hlawtir.
9. "Ama sam sa ta naw ningah,A hmingin hril ta ngai naw ning"Tia ka hang hril hlak chun,Ru sunga mei thun angin,I thu chun ka lungrilah,Mei angin a mi hlieu a,Ka pai tok tok thei naw a,Ka topui thei hlol si nawh!
10. Sir tina mi deusawin,"Titna ringot hril hlakpa,I hril phot ripawt kan tih"Tiin an mi nuisaw a,Ka hril suol an inchan a,Chu chun kei chu mi khita,Phuba lak an tum a nih.
11. Sienkhom mi hrat le huoisen,LALPAN a mi umpui leiin,Mi sukdudatuhai chu,Mi hne loin tlung an ta,An tum hlawsam der an ta,Kumkhuoin muolpho an ta,An muolpho hmingsietna chu,Theinghil ni ta ngai naw nih.
12. Aw Iengkim LALPA,Mi indik chu bi chieng a,Lungril le ngaituonahai,Thlithlaia en fie hlaktu,An chunga i phuba lak chu,Mit ngeiin mi'n hmutir rawh,Ka chungthu hi i kutah,Ka'n koltir vong ta si a.
13. LALPA kuomah hla sak ro!LALPA inpakin chawimawi ro!Mi suolhai kuta inthokin,Thangpui ngaihai hringna chu,San suokin a hum si a.
14. Ka hung pieng thlakna ni chu,Tongsie phurin um raw se!Ka nu'n a mi nei ni chu,Malsawmin um naw raw se!
15. "Nau pasal i nei!" ti a,Ka pa kuomah hung hril a,A lungril suklawmtu chu,Tongsie phurin um raw se.
16. Lungsietna nei der lo a,LALPA sukram khuo angin,Chu mi khom chu um sien la,Zingkar tap ri ngaithla sien,Sun chang pha leh indo ri.
17. Sulah mi lo sukhlum sien,Sul chu ka thlan ning a ta,A mi von song el ding bah!
18. Buoi le lungngaina tuor a,Ka nihai inzak taka,Hmang zo nawk el ding chauin,Ieng leia sul a'nthokin,Ka pieng reng reng am a na?

  Jeremiah (20/52)