←  Jeremiah (2/52)  →
1. LALPA thu ka kuomah a hung tlung a:
2. Fe la, Jerusalem hriet ngeiah,Hieng thuhai hi puong dar rawh:'I tleirawl le mo thar laia,I mi suklawm nuomzie kha,Ka theinghil ngai hrim hrim nawh.I mi hmangai em em a,Tuk lo ram thlalera khom,I mi zui hlak a ni kha.
3. Israel chu LALPA ta d'in,Mi thienghlim tak la niin,A tharsuok hmasa a nih;Ama fa ramtuhai chu,Thiem naw changa ruot an na,Sietnain a tlak buok hlak'Tiin LALPA chun a hril.
4. Nangni Jakob sungkuohai,Israel thla po pohai,LALPA thu hi lo ngai ro.
5. Hieng hin LALPA chun a hril:"Inthlatuhan keimaah,Ieng am fel nawna hmuin,An mi fesan dai a na?Hmangna bo milem bein,Hmangna boah an insiem a.
6. Aigupta ram a'nthok a,Thlaler ram tawl pal tlang a,Ram fil, ruom inthuk kar a,Thina hlim le ram tawl hmun,Tu khom inzin ngai nawna,Tu khom cheng ngai nawnaa,Mi thuoi tlangtu LALPA kha,Khaw lai am a um ta a?'Tiin an indon ta nawh.
7. Ram tha le a tharsuokhai,Hnienghnar taka tlan dingin,Keiman ka thuoi lut cheu a,Sienkhom in hung lut hnungin,A ram in sukporche a,Ka rochan in sukmuolpho.
8. In thiempuhai chen khomin,'Khaw lam LALPA a um a?'Ti hrimin an indon nawh.Dan kengkawtuhai khomin,Keima an mi hriet naw a,Thuoituhai ka lakah an hel. Zawlneihan Baal hmingin,In kuomah thu an hril a,Milem hmang lo an zui a.
9. "Chuleiin khing ka ti cheu,In nauhai thlahai chen khom,Ka khing pei ding cheu a nih,Tiin LALPA chun a hril.
10. Kittim thlierkarah fein,A kamhai zu fang ta u'm;Kedarc chen mi tir unla,Ngun takin bi chieng hai sien,Hieng hi an thaw hlak hrim am,Ti dam en fie raw hai se.
11. Pathien tak ni naw sien khom,Hnam danghai chun an pathien,An thlak mei mei hlaka maw?Ka mihai ruok chun an Ropuina,Milem hmangloin an thlak si.
12. Vanhai, in pangzat naw maw?Maktiin inthin hawp ro"Tiin LALPA chun a hril.
13. Ka chungah thil suol pahnih,Ka mihaiin an thaw a:Hringna tui kei mi hnawlin,Tuikhur ding an cho fawm a,Tuikhur kak le fam thla zing,Tui intling thei lo ding chu.
14. Israel chu siehlaw a ni?Vanlunga piengd am a ni?Ieng leia rallak thila,A'n chang el am an ta a?
15. Sakeibaknei inrumha'n,An inhuk khum dur dur a,A ram an sukpawn zo a,A khuohai an raw fai a,Hnung son ram an inchangtir.
16. Memfise le Tapanhes-haiin,I lu an vaw kol rit a.
17. LALPA i Pathien thuoi lai che,Nangin i tlansan leiin,Hieng thilhai hi i chungah,I'n tlungtir a ni naw maw?
18. Sihorf tuihai dawn dinga,Aigupta tieng i pan hi,Iem a na i hlawkpui ding?Eufretis tui dawn ding a,Asuria-a i fe chu,Iem a na i hlawkpui ding?
19. I ritlonan hrem a che a,I hnungtolnan zil a ti che.Tina hlek khom mi nei loa,LALPA i Pathien i tlansan hi,Ieng ang suol kha am a na,Ngaituoin hre suok ta rawh,"Lalpa, Iengkim LALPA chun a tih.
20. Tiena tlanga inthok khan,I ringkol suktliekpekin,I khaidiet ka suktan a,Sienkhom, ka rong bawl loin,Tlang sang thing buk tin hnuoiah,Milem hmaah bokkhupin,I mi hur hmangsan lem a.
21. Grep inziet tak ang leTha tak ang ka phun che a,Ieng leia grep puopaa,I hung inchang am a na?
22. Changala insawp faiin,Sabon innal teu la khom,Porche i kaina lai chu,Ka mitah a'n lang zing tho,Chunghnungtak LALPAN a tih.
23. Porche ka kai hrim hrim nawh,Baal ka hnot zui ngai nawh'Iengtin am i ti thei a?Ruoma i um dan en la,I thilthawhai ngaituo rawh.Sanghawngsei hur lai angin,Ram tinah i tlan vel kha.
24. Ram sabengtung hur laia,A chakna a suok chang a,Thli chen a'n hnam hlak angin,Tuin am i chakna chu, An chel hne ta ding a na?A hung beiseituhaiin,An zong sawl che ngai loin,Anni i hnot lem hlak si.
25. Ram dang pathienhai hnotin,I ke sukna pha naw la,I dang khom suktawl naw rawh.Sienkhom i poisa naw a,'Inhrilin a sawt ta nawh,Ram dang pathien ka ngai a,Ka hnot naw thei naw a nih'Tiin i don lem si kha.
26. "Rukru an man suok pha a,A'n zak em em hlak ang hin,Israel sungkuohai khom,An lalhai le hotuhai, Thiempuhai le zawlneihai,An muolpho vong ta si a.
27. Thing kuomah, 'Ka pa i nih,'Lung kuomah 'I nau ka nih'Tituhai chun hnung nghatin,An hmai an mi'n son nuom nawh.Sienkhom, buoina an tuok pha,'Hung la, mi hung san suok rawh'An ti nawk ang loi bok si.
28. In kutsuok pathienhai chu,Khaw la'm an um zo ta a?Hung san suok raw hai cheu chu!Aw Juda, khuo i nei zat anga tam,Pathien i nei bok si a!
29. Ieng leia in mi khing am?Ka lakah in hel vong si,"Tiin LALPA chun a hril.
30. "I nauhai chu ka hrem a,Sienkhom ieng khom a sawt nawh,That phana'n an hmang chuong nawh.Sakeibaknei hnukrawl angin,Nangni rawi kawlhnam ngei chun,Ka zawlneihai a lem hlak.
31. "Nangni tuta ruoltharhai,LALPA thu hi ngaituo ro:Israelhai ta dingin,Thlaler ka ni am a ni?Thim sa ka chang ta'm a ni?Ieng leia ka mihaiin,'Kan zalen engthawl ta a,I kuom tieng kir nawng kan tih'Tia an hril am a na?
32. Nuhmeiin a'n cheinahai,A theinghil hlak am a ni?Mo khomin a mo thuomhai,A theinghil hlak am a ni?Ka mihai ruok chun ni tam,Tiem seng loa sawt hiel chu,An mi lo theinghil ta si.
33. Ngaizawng zawr i va thiem de!Nawchizorhai chen hiel khom,I zirtir thei an ta hi!
34. Mihaiin i silfenahPoi tawk lo le retheihai,Thisen kai chu an hmu a;I in rok naw hai sien khom,I sukhlum tawl a ni kha.
35. Chuong sa khom chun nang ruok chun,'Ieng khom suksuol ka nei nawh,Ka chungah a lungsen nawh'I la ti ta tal si a.Thiem changa i'n ngai leiin,I chungah ro rel ka tih.
36. I um dan thlak zung zungin,Ieng dinga mi dawr kuol che?Asuria thaw ang bok khan,Aigupta khoma thawin,La sukzak veng a ti che.
37. I lua i kut suiin,Chu hmun chu suoksan i tih,Ringsana i neihai chu,LALPAN a hnawl tawl leiin,Hung thangpui nawng an ti che.
←  Jeremiah (2/52)  →