←  Jeremiah (19/52)  →
1. Chun, LALPA chun ka kuomah, "Fe la, belhemtu pil bel va'n chaw la, khawtlang upahai le thiempuhai thuoi la,
2. belhemtuhai lutna kotkhar bula Ben Hinom ruoma chun fe thla la, chu taka chun i kuoma thu ka hril ding che hi puong rawh.
3. Hieng ang hin hril rawh: 'Juda lalhai le Jerusalema chenghai, LALPA thu hi lo hre ro. Israelhai Pathien, Iengkim LALPA chun hieng hin a tih: Ngai ta u, hi hmuna hin sietna ka hung intlungtir ding a na, a hre taphot na nghor a tih.
4. Hieng mihai hin an mi zamsan a, hi hmun hi an sukporche a, anni le an pahai le an lalhai khomin an la hriet ngai lo hnam dang pathienhai an lak lut a, an kuomah an inthawi a, hi hmun hi poi tawk lo thisenin an suksip a.
5. Chun, ka thupek le thaw dinga ka hril khom ni lo, ka ngaituonaa khom la lut ngai lo thil thawin, Baal ta dinga an nauhai pumraw thilhlana an inhlan theina dingin bawlhmun, hmun sang an indin bok a.
6. Chuleiin, ngai ta, hi hmun hi Tofet amanih Ben Hinom Ruom amanih ti ta loa Insamna Ruom an la ti lem ni ding chu a hung tlung ding a nih.
7. " 'Hi hmuna hin Judai ram le Jerusalema mihai thil tumhai chu suktlol vong ka ta, that tuma zongtu an hmelmahai kawlhnamah tlung an ta, an ruonghai chu chungleng vatehai le hnuoia ramsahai bu dingin peng ka tih.
8. Hi khawpui hi nuoi hmat ka ta, mi nuizatburah siem ka ta, a fe pel taphotin a hliem tuor lei chun maktiin inchek khum an tih.
9. An naupahai le naunuhai sa infaktir ka ta, an hringna la tumtu hmelmahaiin an inhuol tom beidong lai chun anni le anni sa infa ton an tih.
10. "Chun, i fepuihai mithmuah bel chu vaw koi i ta,
11. an kuomah, 'Iengkim LALPA chun hieng hin a tih: belhemtuin bel a vuok koi a, siem that nawk ruol a ni naw ang hin, hi hnam le hi khawpui hi bel ang hin vaw dar ka tih. An mithihai chu Tofet-ah phum an ta, a hmun khomin keng naw nih.
12. Hieng ang char hin hi hmun le hi khawpuia chenghai chunga hin thaw veng ka ta, hi khawpui hi Tofet angin siem ka tih' LALPA chun a tih.
13. Jerusalema inhai le Juda lalhai in po po, in chunga rimtui raw a, van lengruol le pathien dang dang be a, dawn thilhlanhai an bun suokna hmun po po chu Tofet hmun ang boka tirdakumah inchang veng a tih" tiin.
14. LALPAN thu hril dinga a tirna hmun Tofet-a inthok chun Jeremia chu a hung tung a, LALPA tempul inhuonna sunga chun a ngir a, mipuihai kuomah,
15. "Hi hi Iengkim LALPA, Israelhai Pathienin a hril chu a nih: 'Ngai ta u, thil tha lo ka hrilhai po po kha hi khawpui le khaw dang po po chunga hin ka hung intlungtir ding a nih, insuklulul a, ka thu an ngaithlak naw leiin' tiin" a ta.
←  Jeremiah (19/52)  →