←  Jeremiah (18/52)  →
1. LALPA thu chu Jeremia kuomah a hung tlung a:
2. "Tho la, belhemtu inah zu fe la, chu taka chun ka thuhai inhriettir ka ti che" a ta.
3. Belhemtu inah chun ka zu fe a, a bel siemna khawlah sin a lo thaw a.
4. Pilpoka bel a siem lai chu a kuta a tawk siet pal pha leh a pilpok bok chu hmangin tha a ti dan ang takin bel dangin a siem nawk pei a.
5. Chuongchun, LALPA thu chu ka kuomah a hung tlung nawk a:
6. "Aw Israel sungkuohai, belhemtu thaw dan ang hin ka thaw thei ve naw cheu am a ni?" ti hi LALPA thu suok a nih. "Aw Israel sungkuohai, belhemtu kuta pilpok ang el hin ka kuta um in nih.
7. Ieng huna khom ram le hnam pot suok a, thiek a, suksiet ka tum thu puong lang khom,
8. chu hnam chun a chungthu ka hril leia thil tha lo a ching chu a nghatsan chun a chunga thil tha lo thaw ka tum chu inkei kir ka tih.
9. Ieng huna khom ram le hnam ka siem ding thu le indin ding thu lo hril tah lang khom,
10. ka thu hril ngaithla lo a, ka mithmuah thil tha lo an thaw chun, an ta dinga thil tha thaw ka tum chu sut nawk ka tih.
11. "Chuleiin, Juda mihai le Jerusalema chenghai kuoma chun, 'Ngai ta u, in lakah thil tha naw phier ka nei a, sietna ka hung intlungtir ding a nih. Mi tinin in thilsuol thawhai chu sim unla, in um dan tha nawhai le thil tha naw in thawhai chu nghatsan ro' tia va hril tawl dingin LALPAN a mi tir a nih.
12. Anni ruok chun, "A tul nawh. Kan nuom ang angin um kan ta, kan nuom leh lulul insuoin suol zom pei kan tih" ting an tih.
13. Chuleiin, LALPAN hieng hin a tih:"Hieng ang hrim hi an um hlak am?Tiin hnam danghai indon hrim ta u!Israel nunghak thienglam chun,Thil pangzatum tak a thaw a nih.
14. Lebanon tlang sipa vur chun,A tlang an kiengsan hlak am?Hla taka inthoka hung luong,A tui dei chu a kang hlak am?
15. Ka mihai ruok chun mi theinghilin,Hmangna bo milem bein,An hmaah rimtui an inhlan a,Chu chun a'n sui thluktir a,Tiena inthoka an hraw hlak,Lampui hlun chu petsanin,Tuk lo lam an hraw ta si.
16. A ram tlaran vong a ta,Mi hmusit inchang a ta,Mi invak vel taphotin,Pangzatin lu thin an tih.
17. Khawsak thlipui ang elin,Hmelma hmaah phin dar ka ta,Sietna an tuok nia chun,Ka hmel inhmutir loin,Tukkhum innghat lem ka tih.
18. Chun, anni chun, 'Thaw ro, Jeremia hi phierruk ei tiu; dan thu mi zirtirtu ding thiempuhai, thurawn mi petu ding mi var hai, thu mi hriltu ding zawlneihai um zing tho an tih. Thaw ro, soisel mur mur ei ta, a hril hrim hrim hi ngaisak nawng ei tiu" an ta.
19. Mi ngaisak rawh, Aw LALPA,Mi hektuhai hril hi lo ngaithla rawh.
20. Tha hi maw suolin an rul hlak?Ka tlakna ding tlakkhur an cho si.An laka i lungsen la kieng dinga,Ka hnipek tawl kha hre zing rawh.
21. An nauhai tampui intuoktir la,Kawlhnam ngei inhmatontir rawh.An nuhmeihai nau boin hmeithai sien,An pasalhai sukhlumin um hai sien,An tlangvalhai khom indonaah,Kawlhnamin thi vong raw se.
22. Mi man tuma, tlakkhur cho a,Ka kea an mi phi awkna ding,Aruka chang an kam leiin,Runtuhai i'n nangtir thut la,An inah khek rong rong raw hai se.
23. Mi that tuma an phierruk dan,LALPA nang chun i hriet vong.An suol thaw hi ngaidam naw la,I mithmuah thai bo naw rawh. I hmaah the thal vong la,I lungsen ni'n soisa hrep rawh.
←  Jeremiah (18/52)  →