←  Jeremiah (17/52)  →
1. "Juda suolna chu thir kawlom le lunghlu hmor zum ngei taka an lungril pheka ker a na, an maicham kia khom ker a ni bok.
2. An nauhai khomin thing buk hnuoi le tlang sip tina bawlhmun an siemna le an pathiennu Asera lem thing an phunna hmunhai chu an hung hriet kar vong a nih.
3. A ram dung le khanga i suolna leiin a rama ka tlanghai le i hausakna le rosum po po chu, i hmun sanga bawlhmunhai po po leh, rallak sumah ka pek ding a nih.
4. I bawsietna leiin i chanpuol ka'n rochungtir che ram hi chan i tih. I lakah ka lungsenna chu mei anga a chok zing leiin, i hriet ngai lo ramah i hmelmahai rong bawl i tih," tiin.
5. LALPA chun hieng hin a tih:"Mihriem ringsana neitu,Mihriem hratnaa innghattu,Lungrila LALPA nghatsantu chu,Tongsie phurin um raw se.
6. Thlaler hlobuk ang a na,Vangneina a hung pha khom,Dong ve phak ngai naw ni a,Thlaler ram tawl, tu hluo lo,Chi leilungah cheng a tih.
7. LALPAA ringna nghattu,Ama ringzotu ruok chu,Mi hamtha a va ni ngei!
8. Tui luongna bula thing phun,Vakama zung kei angin,Thal tlung ding a ti naw a,A hnahai a hring zing hlak.Khaw thal kum a poisa naw a,Ra naw kum a nei bok nawh.
9. Lungril hi ieng po neka,Mi hlem hmang chungchuong a na,Beidongum khopin a sie a,hTu'n am hre thiem thei a ta?
10. "Kei hi lungril entu LALPA,Ngaituonahai fie hlaktu,Mi tin an nun dan ang leThilthaw dan ang phu peia,Lawmman pe hlaktu ka nih."
11. Kut tling loa hausa chu,Mani tui ni lo op keutu,Varung ang chauh hi a nih.A vanglaiin a hausaknan,Ama chu la tinsan a ta,Mi invet la hlawng a tih.
12. A tira inthoka chawi sang,Lalthungpha anga ropui chu,Ei tempul hmun hi a nih.
13. Aw LALPA, Israel beisei,Nangma phatsantuhai chu,Sukmuolphoin um an tih.Nangma nghatsantuhai chu,Pilvuta hming ziek angin,An la bohmang ding a nih,Hringna tuikhur LALPA chu,An invak hmangsan si a.
14. Aw LALPA, mi sukdam la,Chuongchun dam ka ta,Mi sanhim la, Chuongchun him ka tih,Ka'n pak hlak chu nang i nih.
15. "Khaw'm a na LALPA thu chu?Tu'n hung hlen sien ni naw ni!"Tiin an hril an hril hlak.
16. Nangma zuitu berampu,Ka nina ka'n phat ngai nawh;Sietna hung intlungtir chu,Ka dit nawh ti i hriet chieng.Ka baua thu suok hrim hrim,Nangin i hriet vong a nih.
17. Mi sukthlabar naw hram rawh,Nang chu siet tuok nikhuo a,Ka'n humhimna i ni si.
18. Mi sukdudatuhai chu,Nangman sukmuolpho tawl la,Kei chu mi sukmuolpho naw.Sukthlabarin um hai sien,Kei chu mi sukthlabar naw.Sietna ni intlungtir la,A letin sukse tawl rawh.
19. LALPA chun hieng hin a mi hril: "Vantlang lutna tieng kul kotkhar, Juda lalhai luta an suokna le Jerusalem kul kotkhar po poa chun fein va ngir rawh.
20. Chun, an kuomah, 'Nangni Juda lalhai, Juda mi po po le Jerusalema cheng, hieng kotkhara lut hlaktuhai, LALPA thu hi lo ngaithla ro.
21. LALPA chun hieng hin a tih: Chawlniin thil phur lo dingin fimkhur unla, Jerusalem kul kotkharah thil phurin lutpui bok naw ro.
22. Chawlniin in ina inthokin phur in phur suok ding a ni naw a, sin hrim hrim in thaw ding a ni bok nawh. In thlatuhai kuoma thu ka pek angin chawlni chu in inser thienghlim ding a nih.
23. Chuong sa khom chun in ngaithlak naw a, in uksak bok nawh; in insuklulul a, inthununna in ngai thei naw a, in donsak bok nawh.
24. LALPA thu suok chun hieng hin a tih: Amiruokchu, ka thu hi in poisa a, chawlniin ieng khom kul kotkhar sungah hung la lut lo a, sin ieng khom thaw loa in inser thienghlim chun,
25. hi khawpui kul kotkhara hin lalhai le hotuhai, Davida lalthungphaa thunghai chu tawlailir le sakora chuonghai le an hnung zuitu mi lienhai, Judai rama mihai le Jerusalema chenghai chu hung lut an ta, hi khawpuia hin cheng song tang an tih.
26. "Chun, Judai ram khawpuihaia inthok dam, Jerusalem sevel khuohaia inthok dam, Benjamin rama inthok dam, thlang tieng tlang thut vela inthok dam, sim tienga inthok damin hung an ta, pumraw thilhlan le inthawina hai, bu le bal thilhlan le rimtui hai le lawmna thilpekhai chu LALPA tempula chun hung inhlan an tih.
27. Amiruokchu, phur ieng khom Jerusalem kul kotkhara phur lut loa chawlni inser thienghlim dinga ka hril ang cheua in thaw naw vai chun, kul kotkharah thel ruol lo mei insuoktir ka ta, a kul po po kang hmang vong a tih" tiin.
←  Jeremiah (17/52)  →