←  Jeremiah (16/52)  →
1. LALPA thu chu ka kuomah a hung tlung a:
2. "Nuhmei i nei ding a ni naw a, hi hmuna hin nau le te i nei ding a ni bok nawh" tiin.
3. Hi hmuna pieng naunu le naupahai le anni hringtu nu le pahai chungthua chun LALPAN hieng ang hin a tih:
4. Hripuiin thing an ta, tu khomin phumin sun naw ni hai a, an ruong chu tuolah hmunhnok angin indar a tih. Kawlhnam le tampuiin thi bok an ta, an ruong chu chungleng vatehai le ramsahaiin tlan an tih.
5. LALPA chun hieng hin a tih: "Khawsawt ina ruoi an siemnaah lut naw la, sun dingin fe naw la, anni chu ta bok naw rawh, hieng mihai laka hin ka malsawmna hai, hmangaina hai le lainatna hai chu ka lak kir ta si a," ti hi LALPA thu suok a nih.
6. "Hi rama hin mi lien le mi chinhai thing an ta, tu khomin phumin sun naw ni hai a, anni sunnain tu khomin lu vaw kol bok naw ni hai.
7. Mithi sunhai ralna dingin tu khomin fak ding pe naw ni hai a, an nu amanih an pa amanih lei khomin, anni hnemna dingin tu khomin dawn ding pe naw ni hai.
8. "Chun, ruoi thena hmuna hrim hrim anni lai thunga kil ve dingin i lut ding a ni nawh.
9. Iengkim LALPA, Israel Pathien chun hieng hin a hril: 'Ngai ta, i mithmu le i dam sung ngei hin hlimna le lawmna ri le mo le moneitu rawlhai khom hi hmuna inthok hin sukre vong ka tih' tiin.
10. "Hieng thuhai po po hi mihai kuoma i hril pha chun annin, 'Ieng leiin am hieng ang lawma sietna hi LALPAN kan chungah a thaw el am a na? Iem kan thaw suol a um? LALPA ei Pathien chungah ieng suol am kan thaw hrim hrim a?' ting an tih.
11. Chun, nangin, 'In thlatuhaiin mi maksan a, Pathien danghai hnot a, an rong bawl a, anni be a, mi fesan a, ka dan an zawm naw lei a nih.
12. Nangni hlak chun tuklul insuoa in lungrila ritlona chu zawm lemin, in thlatuhai neka nasa lemin in thaw nawk pei si a.
13. Chuleiin, hi rama inthok hin nangni le in thlatuhai khoma an la hriet ngai lo rama chun ka hnot suok ding cheu a na, chu taka chun a sun a zanin pathien danghai rong bawl in ta, ka ditsakna hmu naw ti niu' ti hi LALPA thu suok a nih.
14. Chun, LALPA thu suok chun hieng hin a hril: "Mihaiin, 'Aiguptaa inthoka Israel nauhai thuoi suoktu LALPA hringna salin' ti ta loa,
15. Hmar tieng ram le a hnot darna rama inthoka Israelhai hung thuoi suoktu LALPA hringna salin' tia in inkham hun a la hung tlung ding a nih. An thlatuhai kuoma ka pek rama chun ka thuoi kir tawl nawk ding a ni si a" tiin.
16. "Ngamantu tam tak ko ka ta, anni chun man tawl an tih. Sapeltu tam tak tir bok ka ta, anni chun muol le tlang tin le lungpui kak kara mihai khom chu hung pel suok an tih.
17. An um dan po po ka hmu vong a, ka lakah thup a um naw a, an suolnahai khom ka mita inthoka thup a um bok nawh.
18. Hringna nei lo milem tirdakuma a ram an sukporche lei le ka rochung ram chu an pathien lem tirdakuma an suksip leiin, an ritlona le suolna chungah a let hniin thungrul ka tih" ti hi LALPA thu suok chu a nih.
19. Aw LALPA, Ka hratna le ka kulpui,Lungzing nia ka belbul,Kawlkawdonga inthokin,Hnam tin i kuomah hung an ta,"Kan thlatuhai rochung chu,Hmangna bo der pathien lem,Milem siem fawm el an nih.
20. Miin mani pathien ding,A siem fawm thei am a ni?Chuong ang milem siem fawm chu,Pathien an ni thei si nawh"Tiin la hung hril an tih.
21. Chuleiin, tu tum khom hin,Ka hratna le thilthawtheina,Hang inhriettir nawk ka tih.Ka hming hi LALPA a nizie, Chu chun hung hre tang an tih.
←  Jeremiah (16/52)  →