←  Jeremiah (15/52)  →

---

1.

LALPA chun ka kuomah,"Mosie le Samuel khom ka hmaah hung hai sien, ka lungrilin hi mihai tieng hi ngha chuong naw nih. Ka hmu phak loah hnot suok la, fe hmang dai raw hai se.

2.

Khaw la'm kan fe ding?' tia an indon che chun, an kuomah hieng ang hin hril rawh:Hieng ang hin LALPAN a tih:'Thi dinga ruothai chu thinaah,Kawlhnam tuor ding chu kawlhnamah,Tampui tuor ding chu tampuiah,Saltang ding chu saltangnaah' tiin.

3.

"LALPA chun hieng hin a tih: 'Suksetu dingin thil chi li tir ka tih- sukhlumtu ding kawlhnam, an ruong fen hmangtu dingin ui, fa zo le sukraltu dingin chungleng vatehai le hnuoia ramsa kolhai.

4.

Jerusalema Juda lal Hezekia naupa Manase thilthaw leiin hnuoia lalhai po po tirdakah siem tawl ka tih.

5.

" Aw Jerusalem.Tuin am a lunginsiet ding che?Aw, Jerusalem,Tuin am a ta ta ding che? I chanchin indon dingin,Tu hrim am chawl tang an ta?

6.

Nangin i mi hnawl thlak a,I hnungtol deu deu pei si.Chuleiin, sukse ding chein,I chungah kut thlak ka ta,Zai daw zozai ta naw ning"Ti hi LALPA thu suok a nih.

7.

Khaw tin kul kot bula chun,Cheiruongin vaw dar ka ta,Sietna le lusunnain,Ka mihai tlak buok a tih,An nun dan an thlak si nawh.

8.

Hmeithai pung deu deu an tih,Tuipui tieu neka tamin.Sun chang lai tak suksetu,Tlangvalhai lai tir ka ta,Beidongna le thlaphangnan,Hung nangching thut tawl a tih.

9.

Sal sari hringtu nu chu,Thidangin tlu hlum a ta,Sun lai a ni liem a ta,Hming sein muolpho a tih.A thi bang la um po chu,Kawlhnama sukhlum dingin,Hmelma kutah peng ka tih"Ti hi LALPA thu suok a nih.

10.

Ram pum do le khing dinga,I mi nei kher kher hi chu nu,Ka chung a va hang pik ngei!Tu khom inpuktir loin,Tu ta puk lo khom ni lang,Tongsie an mi'n phur vong si.

11.

LALPA chun hieng hin a tih: "A san tha tak a um chun,San him ngei ka ti cheu a,Siet ni le lungzing niah,Hmelmahai chu in hmaah,Hung inkuntir ngei ka tih.

12.

"Hmar tienga thir le dar chu,Tu'n am suktliek thei an ta?

13.

Ka mihai suolna leiin,An ro hlu le sum po po chu,Rallak sumah peng ka tih.

14.

Hmelma ram hriet ngai loah,Salah thuoi an ti cheu a,Ka lungsen chu chok a ta,Chu chun hlieu hrep a ti cheu" tiin.

15.

Aw LALPA, nang chun i hriet,Mi hre zingin, mi kan la,Mi sukdudatuhai chungaKa phuba chu mi lapek rawh.Nang chu i dawthei leiin,Mi la hmang ve lul naw la,Nangma leia ka tuorzie kha,Mi hrepek zing lem hlak rawh.

16.

I thuhai ka dong pha leh,Kei chun ka fak miel miel a,Ka ta dinga lawmna leLungril sukhlimtu a nih.Aw Lalpa, Iengkim Pathien,I hming puttu ka ni si a.

17.

Inhoina chentuhai lai,Ka thung ve ngai der naw a,Hlimhlop ka chen ve ngai nawh;Kut i mi'n nghat khum leiin,Makhat chauin ka'n thung a,Lunghnurnain i mi sung sip.

18.

Ieng leia ka nat tuor hi,A re thei der naw'm a na?Ieng leia ka hliem tuor hi,Dam thei loa a um zing?Ka laka hin vadungte,Bel tlak lo le kang el hlak,I'n chang el ding a ni maw?

19.

LALPA chun hieng hin a tih:"I sim chun tungding ka che,Ka rong i bawl theina di'n;Hmangna bo thu hril lo a,Thu tak hriltu i ni chun,Ka thu puongtu ning i ta,Mihai chu nangin pan loin,Annin pan lem an ti che.

20.

Hienghai laka hin kul bang,Dar bangah siem ka ti che.Hung bei hlak an ti che a,Sienkhom hne nawng an ti che,San suok le hum ding chein,I kuomah ka um si a.

21.

Mi rilohai kut a'nthokin,Keiman san suok ka ti che a,Mi nunrawnghai lak a'nthokin,Keiman hum him ka ti che"Ti hi LALPA thu suok a nih.

---

←  Jeremiah (15/52)  →