←  Jeremiah (14/52)  →
1. Khaw inthal ding chungthua,LALPA hril chu hi hi a nih:
2. "Judai ramin a sun a,Khawpuihai a ngui ruoi a,A ram chu an ta khum a,Jerusalema inthokin,Tap ri a so veng vung a.
3. Mi lienha'n an siehlawhai,Tui chawi dingin an tir a,Tuikul tieng an pan tawl a,Sienkhom tui hrim an hmu nawh.An tuibel leh hrilhaiin,Beidong takin an kir a,An lu puon an khup khum a.
4. Ruo a sur der naw leiin,Hnuoi chu a hung kak tuor a,Lo neituhan hrilhaiin,An lu puon an khup khum a.
5. Phula zasukpui khomin,Pet ding a nei naw leiin,A te chu a maksan a.
6. Ram sabengtunghai khom chu,Tlang sang filah an ngir a,Sihal inthuok ang topin,An inthuok ve hlop hlop a,Ram hring an thlirna lamah,An mithai a chau zo tah.
7. Kan suolnan mi hek sien khom,I hming leiin Aw LALPA,Mi hung thangpui lul raw khai.Kan hnungtolna a tam a,I lakah kan suol a nih.
8. Aw, Israelhai Tlumte thlir,Beidong huna Sandamtu,Hi ramah mikhuol anga,Zan khat chauh riek ding ang a,Ieng dinga um am i na?
9. I chi-ai ve am an ta?Ieng leia mi san thei lo,Pasaltha anga i um?Sienkhom nang chu aw LALPA,Keini lai i um zing a,I hming puttu kan ni a,Mi maksan tawl naw hram rawh!
10. Hi mihai chungchanga hin,LALPA chun hieng hin a hril:"Invak hmang inhoi an ta,An ke an thunun ngai nawh.Chu lei tak chun anni hi,LALPAN a lawm tawl naw a,An ritlozie a hriet zing a,An suol leiin hrem a tih" tiin.
11. LALPA chun ka kuomah, "Hieng mihai thatna ding hin hnipek naw rawh.
12. Bu nghei hai sien khom an rawl lo ngaithla naw ning; pumraw thilhlan le bu le bal thilhlan an hung inhlanhai khom lo pom bok naw ning. Chuong nek hmanin, kawlhnam le tampui le hripuiin ka sukbohmang tawl ding a nih" a ta.
13. Kei chun, "E khai, LALPA Chunghnungtak, i zawlneihai po poin, 'Kawlhnam tuok naw ti niu a, tam khom tuor bok naw ti niu. Hi hmuna hin muongna hlun ka pek lem ding cheu a nih' tiin i thu an lo hril rop hlak si a" ka ta.
14. LALPA chun, "Zawlneihaiin ka hmingin khel an hril hlak a ni chu. Anni chu ka tir naw a, ka ruot naw a, ka biek tawl bok nawh. An thil hmu khom ni lo, hmangna bo thumvawra an thil dong le an lungril suongtuona mei mei an hrilpek cheu a ni chu" a ta.
15. Chuleiin, LALPA chun hieng hin a hril: Ka tir khom ni hlei lo, ka hming sala, 'Hi rama hin kawlhnam le tam tlung naw nih' tia hriltu cheu zawlneihai chu kawlhnam le tamin bohmang an tih.
16. Chun, an chungthu an hril mihai chu tam le kawlhnam inleng lei chun Jerusalem kotthlerah pei suokin um an ta, anni le an nuhmeihai, an naunuhai le naupahai chun phumtu hrim nei naw ni hai. An phu ang hrimin an chungah sietna ka bur khum ding a ni si a.
17. "Hi hi an kuomah hril rawh:'Ka mi, ka naunu thienglam chun,Siet derna khop kut tuok a,Hliempui na tak a tuor leiin,Ka mitthli hi sun le zanin,Chawl loin luong zing raw se.
18. Ramhnuoiah ka va suok leh,Kawlhnama an thathai ruong,Zal thlek thluk ka va hmu a;Khawpui sungah ka lut leh,Tampuia thi ka hmu bok a.Zawlneihai le thiempuhai khom,Hriet lo ram an pan zo tah' tiin."
19. Juda chu i hnawl der el an ta?Zion khom i tirdak am an ta?Sukdam thei naw hiel khop a,Ieng dinga i mi'n tuortir am?Muongna hun kan beisei a,Thil tha ieng khom a tlung nawh,Damna hun kan beisei a,Thlaphangna chauh a tlung lem.
20. Kan suolzie hi aw LALPA,I hmaah kan inphat nawh,Kan thlatuhai suolzie khom;Kan lo suol takzet si a.
21. I hming leiin mi thim naw la,I lalthungpha ropui tak chu,A muolpho phal lul naw rawh.Kan kuoma i thuthlunghai kha,Hre zingin bawse naw hram rawh.
22. Hnam dang pathienhai lai hin,Ruo hung tir thei tu'm an um?Vanin a'n surtir am a ni?Ni lo e, nangma i nih,Aw kan LALPA kan Pathien.Kan beisei nang chauh i nih:Hieng thil po po thawtu chu,Nangma chauh i ni si a.
←  Jeremiah (14/52)  →