←  Jeremiah (13/52)  →
1. Chun, LALPA chun ka kuomah, "Fe la, puon kawnghren inchaw la, chu chun i kawngah inhren la, sienkhom tui intawktir der naw rawh" a ta.
2. Chuongchun, LALPA thu angin puon kawnghren chu ka'n chawk a, ka kawngah ka hren a.
3. Chun, LALPA thu chu ka kuomah a hung tlung nawk a,
4. "I kawnghren inchawk, i kawnga i hren kha sut la, Eufretisg vadungpui pan la, chu taka chun lungpui kuo karah thup rawh" tiin a mi hril a.
5. Chuongchun ka fe a, LALPA mi hril ang chun Eufretis-a lungpui kuo kara chun ka thup a.
6. Ni iemani zat hnung chun LALPAN, "Fe la, Eufretis vadung pan la, hrenpuon i thup kha la suok rawh" a ta.
7. Chuongchun, Eufretis vadung tieng chun ka fe a, hrenpuon chu ka siena hmuna inthok chun ka pur dok a, sienkhom a lo hmon vong ta a, ienga ding khomin a tlaktlai ta nawh.
8. Chun, LALPA thu chu ka kuomah a hung tlung a:
9. "Hieng ang bok hin Judahai chapopui le Jerusalemhai suongtawlol chu ka suksiet ding a nih.
10. Hi hnam rilo, ka thu ngaithla nuom lo a, anni tuklulna lungril zuia pathien danghai rong bawl le be lemtuhai hi, hi hrenpuon, ieng ding khoma hmang tlak ta lo ang bok hi an nih.
11. Hrenpuon chu kawngah ka vet zing ang hin Israel sungkuo pumpui le Juda sungkuo pumpui hi ka mihai, ka hmingthangna, mawina le ropuina ni dinga ka kuoma um tlat dinga ka siem an ni a, sienkhom ka thu an ngai si nawh.
12. "An kuomah hieng hin hril rawh: 'Hieng hin LALPA, Israel Pathienin a hril: Uoiin peng po po chu uoiin thun sip ro' ti hi. Chun, tu khomin, 'Uoiin peng tin sung sip ding chu ka hriet nawa i ngai a ni?' an ti chun,
13. nangin hieng hin hril tawl rawh: 'LALPA chun hieng hin a tih: Hi rama cheng po po, Davida lalthungphaa inthung lalhai dam, thiempuhai dam, zawlneihai dam le Jerusalema chenghai po po chu hrai rui hrep tawl ka tih.
14. Anni le anni invaw hmattir ka ta, pahai le nauhai chu insuol an tih. Anni chu hla loa ka sukbohmang theina dingin lunginsietna le zangaina le lainatna insuo naw ning.
15. Na dawin ngaithla unla,A tu khom chapo naw ro,LALPA thu suok a ni hi.
16. LALPA in Pathien chawimawi ro:Inthimna a hung tir hma,Tlang thimah insui thlu a,In ke pen a'n phet hma hin;Var in beisei lai zingin,Beidongna thimpui zingin,Thim sa inchangtir a tih.
17. In ngaithlak chuong naw ruok chun,In chaponahai leiin,Arukin tang ka ti cheu;LALPA beram dit ruolhai,Sala thuoi an ni ding chu,Lung na takin tang ka ta,Mitthliin mi'n sil a tih.
18. Lal le a nu kuoma chun,'In lalthungphaa inthok khan,Khai leh, hung tum thla ta ro;In lallukhum khumhai kha, Lak thlak a ni ta ding si'Tiin an kuomah hril rawh.
19. Sim tieng khuohai po po chu,Tu khom suok thei lo dingin,Inhuolin dang chep an ta,Tu khom suok thei naw ni hai.Juda mihai po po chu,Sala thuoiin um an ta,An rengin intang an tih.
20. Hmar tieng son mit inlen la,A hunghai saw hei thlir rawh.I beram ruol enkolhai,I uongpui em em hlak kha,Khaw lai am an um ta a?
21. Ruol thaa i siem kha LALPAN,Nangma runtuah a sie pha chun,Nuhmei nau hase angin,Na i ti hle naw ding maw?
22. Ieng leiin am hieng thil hi,Ka chungah a tlung a na?'Tia i'n don a ni chun,I suolnahai lei a nih:I puonbil an hlimpek che a,An soisak che a ni kha!
23. Ethiopia miin a rong,A thlak thei hlak am a ni?Keite khomin a zie tiel,A thup thei hlak hrim hrim maw?Thil suol thaw chinghai khomin,Thil tha an thaw thei ngai nawh.
24. "Thlaler thliin a len hmang,Bu si vuong dar ang elin,Ka sukdar ding cheu a nih.
25. Nangin kei mi theinghil a,Pathien dang i biek leiin,Chu chu i chan dinga tlu,Keiman ka ruot chu a nih;Ti hi LALPA thu suok a nih.
26. "Kei ngeiin i puonbil chu,I hmai inkhum hiel khopin,Ka hlimpek ding che a na,I zamaw inlang a tih.
27. Tlang tin le phul hmuna hai,Uirea hur kawdak a,Zakmaw taka inzor a,Tirdakum i thawhai kha,Ka phawk suok vong ta si che.Aw Jerusalem, i chung a pik!Ieng chen am i porche ding?
←  Jeremiah (13/52)  →