←  Jeremiah (12/52)  →

---

1.

Aw LALPA, ka chungthuhai,I kuoma ka hung intlun changin,Indik takin i thaw hlak.Sienkhom ka vuivaina thu chu,Ka hung hril tho ding a nih:Ieng leia mi suolhai hi,An hmuingil hlak am a na?Ieng leia mi depdehai,Inhoi taka an um hlak?

2.

I phun a, zung an kei a,Inthangin an hung ra a,An hmurah i hnai zing a,An lungrilah i hla si.

3.

Aw LALPA, i mi hriet a,Nangin i mi hmu zing a,Ka ngaituo zing che ti khom,Enin i fie vong hlak kha.That ding beram ang elin,Anni rawi hi hnuk suok la,Thata an um ni ding khom,Nangma chun hung ruot ta rawh.

4.

Ieng chen am ram hi tawlin,Hna tinreng an vuoi vong ding?A chengtuhai ritlona leiin,Ramsahai an ram zo a,Vate khom an thi zo tah.Chu baka chun mihaiin,"Ei chungah ieng am a tlung,Ti dam chu en hlak a tim!"An ti hiel ta che a nih.

5.

Mi leh in intlansiek hmana,An hneban che a ni chun,Sakor dam leh lem lem chu,Iengtin am in intluk ding?Hmun hima hman i'n sui thlu chun,Jordan ramngawpuia lem chu,Iengtin am i che ta ding?

6.

I unau le sunghai chenin,An lo inphatsan ta che a,An dem luoi luoi che a nih.An lo biek tha che khomin,Anni chu ring ta naw rawh.

7.

Ka in chu suoksan ka ta,Ka ro khom maksan ka tih;Ka hmangai chu hmelma kutah,Ka pek suok ta ding a nih.

8.

Ka rochan ka tihai hlak,Ram hnuoia keipui angin,An lo inchang zo tah a,An mi'n rum khum dur dur a,Ka theida zawng tak a nih.

9.

Ka rochanhai chu vate ang,Muin la dinga a vel lai zing,Vate dangin an ching hron,An lo ni ta hiel naw maw?Ramsa po po ko khawm la,A fa dingin hung thuoi rawh.

10.

Berampuhan ka grep huon,Chilin an suksiet zo a,Ka lo tha tak el khom chu,Ram tawl an inchangtir zo.

11.

Rausan hmunah an siem a,Tawlin a thing bor bor a,Tu ngaisak a hlaw ta nawh.

12.

Tlang ram kol sen vunga chun,Sukramtu invak an ta,A ram dung le khanga mihai,LALPA kawlhnamin lem a ta,A him tu khom um naw nih.

13.

Bu chi chu the veng an ta,Sienkhom hling chauh sik an ta,Chau hnepin inrim sien khom,Ieng khom hlawkpui naw ni hai.LALPA lungsen inling lei chun,An sik sun khom inzapui an tih.

14.

Hi hi LALPA hril chu a nih: "Ka mi Israelhai kuoma ro hluo ding ka pek ram lo la hektu an tuolbawm ram rilohai chu an rama inthokin pot dok ka ta, anni laia Juda sungkuo umhai khom chu la suok ka tih.

15.

Ka lak suok hnung chun anni chu lunginsiet nawk ka ta, an rochan ram sengah hung thuoi nawk ka tih.

16.

Kha hmaa Baal hminga inkham dan ka mihai lo zirtir hlaktu ni hai sien khom, ka mihai um dan anga khawsa ve a, 'LALPA hringna salin kan intiem' tia ka hminga an inkham ve pha chun, ka mihai lai indin tawl ka tih.

17.

Sienkhom ka thu ngaithla nawtu hnam taphot chu pot suok ka ta, sukbo ka tih" ti hi LALPA thu suok a nih.

---

←  Jeremiah (12/52)  →