←  Jeremiah (11/52)  →
1. Hi hi Jeremia kuoma LALPA thu hung tlung chu a nih:
2. Hi thuthlungin a bitukhai hi ngaithla la, Judai ram le Jerusalema chenghai kuomah hril rawh.
3. LALPA, Israel Pathien chun hieng hin a hril: "Hi thuthlunga thu bitukhai ngaithla nawtu chu tongsie phurin um raw se.
4. Chuonghai chu Aigupta ram, rawtuina meia inthoka in thlatuhai ka hung thuoi suok laia an zawm dinga thu ka pekhai chu a nih. An kuomah, 'Ka thu awiin ka hril taphothai hi zawm unla, ka mihai ning in ta, kei khom in Pathien ning ka tih.
5. Chuongchun, nenetui le khuoizu luongna ram, in thlatuhai kuoma inkham meua pek ka lo tiem chu hlen suok ka tih' ka ta, chu chu voisuna in hluo ram hi a nih" a ta. Chun, kei chun, "Amen, Aw LALPA" tiin ka don a.
6. LALPA chun ka kuomah, "Judai ram khuoa hai le Jerusalem kotthlera hai hieng thu po po hi puong rawh: "Hi thuthlunga thu bitukhai hi zawm ro.
7. Aigupta rama inthoka in thlatuhai ka hung thuoi suok nia inthoka voisun chen hin, 'Ka thu zawm ro' tiin ka hril zing tawl a.
8. Sienkhom, an awi nuom naw a, an ngaisak bok nawh; chuong nek hmanin lulul takin an lungrila ritlona chu an zawm lem hlak. Zawm dinga ka pek thuthlung thuhai chu an zawm naw leiin chuong thil po poa tongsie chu an chungah a hung tlung tah a nih" tiin.
9. LALPA chun ka kuomah, "Juda mihai le Jerusalema chenghai hin thil phierruk an nei a.
10. An thlatuhai, ka thu ngaithla nuom nawtuhai suolna tieng chun an kir nawk a, pathien danghai zuiin an rong an bawl a, Israel sungkuo le Juda sungkuohai chun an thlatuhai kuoma ka thuthlung chu an bawsiet tah a nih.
11. Chuleiin, LALPA chun hieng hin a tih: Ngai ta u, an pumpel thei lo ding sietna chu an chungah ka hung intlungtir ding a nih. Mi ko khek hai sien khom, don tawl naw ning.
12. Sietnan a hung tlak buok pha chun, Judai rama khuohai le Jerusalema chenghai chun rimtui rawa an biek hlak pathienhai chu ko khek an ta, chuonghai chun sietna laka chun hung thangpui naw ni hai.
13. Aw Juda, khuo i nei zat hiela tam pathien i nei a, thil inzakumthlak tak el, Baal hmaa rimtui i rawna ding maicham khom Jerusalem kotthler zat hiel i nei bok hi.
14. Chuleiin, hieng mihai hi tongtaipek naw la, an ta dingin ka kuomah dawvan hung kai naw rawh, an beidong huna khom an mi kona chu ka don naw ding a ni si a" tiin.
15. "Mi tam tak suolpui hlak siin,Ka hmangai chun ka tempulah,Ieng am a thaw reng reng a na?Sa ser i hung inhlanhai leiin,Hremna pumpel i'n ringa maw?Ritlona i thaw pha pha leh,Inhoi i ti chauh hlak si a" tiin.
16. Oliv thing hring le mawi,Kur thluka ra tha insuo hlak',Tiin LALPAN a ko hlak che.Sienkhom thlipui anga nasa,Meipui inrum hum huma chun,A raw hmang ding che a na,I kauhai kang hmang a tih.
17. Israel sungkuohai le Juda sungkuohaiin suol thaw a, Baal kuomah rimtui inhlan a, nangni phuntu cheu, Iengkim LALPA chu lungsen dinga in cho phawk leiin, nangni ngeiin in chunga sietna in intlun thu chu a hung puong a nih.
18. That tuma an mi phierrukna chu LALPAN a mi'n hriettir leiin ka hriet a, chuong lai chun an thilthaw po po chu a mi'n hmutir a.
19. Kei chu that dinga an thuoi beramte nunnem tak ang ka ni leiin hieng anga an mi lo phierruk thu khom hi ka lo hriet der si nawh:"Thing chu a ra leh phur ei ta,Hringmi khawvela inthok hin,Ama chu sat thlang ei ta,Tu khom hriet ta lo dingin,A hming khom sukbo ei tih."
20. Sienkhom aw Iengkim LALPA,Rorelna fel kengkawtu,Sungril le lungril fietu,Iengkimthawthei i ni leiin,Anni rawi chunga phuba,I lak pha mi'n hmutir rawh,Ka chungthu hi i kuomah,Iengkim ka'n koltir si a.
21. Chuleiin, Iengkim LALPA chun, "I hringna la tumtu Anathot mihai, 'Kan kuta i thi nawna dingin LALPA hmingin thu hril ta naw rawh' tituhai kuoma chun hieng hin a tih:
22. Anni chu hrem tawl ka ta, tlangvalhai chu kawlhnamin thing an ta, an naunuhai le naupahai chu tamin thing an tih.
23. Anathot mihai ka hrem kum a tlung pha chun an chungah sietna ka hung intlungtir ding a ni leiin a thi mahla tu khom um naw ni hai' tiin" a ta.
←  Jeremiah (11/52)  →