←  Jeremiah (10/52)  →
1. Aw, Israel sungkuohai,LALPA hril hi lo ngaithla ro,
2. LALPA chun hieng hin a tih:"Hnam danghai ching dan taphot,Thaw ve di'n inchuk naw ro;Vana inchiknahai chu,Hnam dangha'n an ti angin,Nangni chun ti ve naw ro.
3. Hnam danghai thil chinghai chu,Hmangna bo thil vong a nih:Rama thing an va lak a,Kut themthiemha'n hrei hmangin,Milem an hung ker suok a.
4. Tangkaruo le rangkachakin,Milem chu an cheimawi a,A tluk el nawna dingin,Tubo le thirkil hmangin,Nghet takin an kil khawm a.
5. Leipuia vate ti ding,Tikhai an sie ang a nih:Milem chu an tong thei nawh;Ke an nei ve naw leiin,A puta put son an ngai.Anni chu ti naw unla,Ieng poi an tawk thei naw a,Thil tha an thaw thei bok nawh." tiin.
6. Aw LALPA nangma ang hrim,Mi tu khom an um der nawh;I hrat a, thil i thaw thei a,I hming a ropui bok.
7. Aw, nang hnam tinhai Laltak,Tu'm inza lo an um ding che?Inza i phu hrim a nih,Hnam tina mivarhai leAn lalram sung po poah,Nangma ang an um der nawh.
8. An rengin mi chawlol leHmangna bo an ni vong a,Hmangna bo thing milim chu,An zirtirtu a ni si.
9. Tangkaruo an sut phek chu,Tarsis a'nthokin an lak a,Upaz-a inthokin rangkachak.Themthiem le rangkachak sertuhan,Milim an hung siem suok a,Puon dumpawl le sendukin,Chuonghai chu an inthuomtir a,Sienkhom kuta siem an ni si.
10. LALPA ruok chu Pathien tak,Pathien hring, chatuon Lal a nih.A lungsen pha, hnuoi a'n hning a,A lungsenna inling chu,Hnamhaiin an tuor zo nawh.
11. "An kuomah hieng hin hril rawh: 'Hieng pathienhai, hnuoi le vanhai siemtu khom ni ve lohai hi chu hnuoia inthokin la bohmang an ta, vankhup hnuoia inthokin bohmang vong an tih' tiin" a ta.
12. Sienkhom a thilthawtheinan,Pathienin hnuoi a siem a,A varnaa khawvel indinin,A hriet thiemnan van a zar phar.
13. A rawl a hang insuo pha,Van tui a'n ri hum hum a;Kawl bulah sum hung suokin,Ruo surin kawl a'n leptir a,A thli bawma inthokin,Thli a hung inthe suok hlak.
14. Mi tin an chawlol zo a,Hrietna hrim an nei naw a,Rangkachak sertu phot chu,A milemhan sukzak an tih,Inhlemna thil vong a na,Maniin thuok an nei nawh.
15. An rengin hmangna bo leNuizatbur an ni vong a,An chungthu rel a ni pha,An rengin bohmang an tih.
16. Jakob Chanpuol LALPA ruok chu,Anni ang a ni ve nawh;Thil iengkim Siemtu a na,Israel chu a ro hluotu a na,A hming chu Iengkim LALPA a nih.
17. An inhuol mek ta cheu leiin,In puonthuo zielin tlan suok ro.
18. LALPA chun hieng hin a tih:"Tuta a rama chenghai hi,Ka tham suok tawl ding a nih.An man khawm vong theina di'n,Buoinan hung tlak buok a tih" tiin.
19. Ka hliem chu ka vangduoi ngei!Sukdam ruol ka ni si nawh!"Ka natna a ni tlat leiin,Keiman ka tuor el ma naw'n!"Tiin kei ka'n hnem fawm a.
20. Ka puon in a chim ta a,A thlungna a chat vong tah.Ka nauhai an thuoi hmang a,Puon in mi zarpektu ding,Tu khom an um ta si nawh.
21. Beram vengtuhai hlak chun,An hmuingil theina dinga,LALPA hang rawn nachang khom,An hriet teu teu bok si nawh.Chuleiin, an beram ruol,An inchek dar vong a nih.
22. Ngai tu, ri a hung tlung chu,Hmar tieng panga inthokaBuoina ri rapthlak tak chu;Judai khawpuihai sukramin,Sihal ruol chengna hmunah,An inchangtir ding a nih.
23. Mihriem nun hi aw LALPA,Ama thua nung a ni naw a,Mihriem chun ama le ama,A'n thuoi thei nawh ti ka hriet.
24. Aw LALPA, mi thunun la,Sienkhom lungsenin ni loin,Zaidam takin mi thunun rawh,Chuong naw chun thi el ka tih.
25. Nangma pom ve nuom nawtu,I hming lam ve nuom nawtu,Hnam dang mihai chunga chun,I lungsenna bun thla lem rawh.Jakob sungkuohai fa zoin,An ram an suktlaran a,An fak ram rit an ta hi.
←  Jeremiah (10/52)  →