←  James (5/5)    
1. Nangni mi hausahai, ngaithla ro, in chunga rinumna nasa tak hung tlung ding lei hin tap unla, khek rong rong ro.
2. In hausaknahai chu a rem zo tah a, in puonhai khom hangthimin an fak siet zo tah.
3. In rangkachak le tangkaruo hai khom an nghar-ek zo tah a, a nghar-ek chu in thiem nawzie suklangtu a na, meiin thil a kang hmang angin, in taksa la fa zo a tih. Ni hnuhnunga hin ro in khawl khawm hnur a.
4. Ngai ta u, in loa sinthawtuhai hlaw in hrenpekhai chu an khek suok a, bu siktuhai beidong khek ri chun Iengkim Lalpa na a tlung tah.
5. Hnuoia hin inhoi ti tak le nuomtawlin in um a, inthat runpui niaa dinga inchawm thau mei mei in ni tawl hih.
6. Mi Indik chu thiem naw in inchangtir a, in that a, ama hlak chun a dodal si naw cheu.b
7. Chuongchun, unauhai, Lalpa hung hma khat sel takin um ro. Lo neituin a lo tharsuok a nghak dan hi ngaituo hlak ro; thar hmasa le thar hnuhnungc a nghak fan fan hlak hi.
8. Nangni khom sel takin um unla, lungril nghet tak put ro, Lalpa hung nawkna ding a hnai ta si a.
9. Unauhai, thiem naw changa in um nawna dingin inchier khum naw ro. Ngai ta u, roreltu chu kotkhar bulah a um ta zing a nih.
10. Unauhai, Lalpa hminga thuhriltu zawlneihaiin sel taka an tuor dan kha entonah hmang ro.
11. Sel taka tuortu chu mi hamthaa kan ngai a nih. Joba tuorselzie le Lalpan a tawpa a thaw dan khom in hriet. Lalpa chu zangaina le lunginsietnaa sip a ni si a.
12. Chuong po po baka chun ka unauhai, inkham ngai naw ro, van amanih hnuoi amanih, thil dang amanih salin inkham naw ro. "A nih" in ti chu "A nih" ni sien, "A ni nawh" in ti chu "A ni nawh" ni el raw se, chuong naw chun thiem naw chang hlauh rawi in tih.
13. Nangni lai vangduoina tuok an um am? Tongtai raw se. Hlim an um am ? Inpakna hla sak raw se.
14. Nangni lai damnaw an um am? Kohran upa inkotir sien la, Lalpa hminga hriek nalin tongtaipek raw se;
15. ring tlata tongtaina chun damnaw chu sukdam a ta, Lalpan keitho a ta, thil suol a lo thaw tah khom ngaidam a tih.
16. Chuongchun, in suolhai thupha inchawi tuo unla, intongtaipek tuo unla, sukdamin um in tih. Thahnemngai taka mi indik tongtaina chun thil ropui tak a thaw thei a nih.
17. Elija chu eini anga mihriem ve el a nia chu, ruo sur nawna dingin thahnemngai takin a tongtai a, kum thum le thla ruk sung hnuoi chungah ruo hrim a sur nawh.
18. A tongtai nawk a, vanin ruo a'n surtir a, hnuoiin thlai thar a'n suo nawk tah a nih.
19. Ka unauhai, nangni lai thutaka inthoka pet hmang in um chun tuin amanih thuoi kir raw se.
20. Hi hi hre zing ro, mi suol an indik nawnaa inthoka hung thuoi kir nawktu chun thinaa inthokin a thlarau a sandam bakah a suol tam tak a'n khumpek ning a tih.
←  James (5/5)