James (4/5)  

1. Nangni laia insel inhalna hi khaw laia inthoka hung suok am a na? Nangni sunga chakna thil insuol zinga inthoka hung suok an naw maw ?
2. Thil dit in nei a, in nei thei si naw a, tuol in that pha a. Thil in inhnar a, in nei thei si naw a, inhalin in indo pha a. In nei nawna san chu Pathien in hni naw lei a nih.
3. In hni khomin in hmu nawh, in hnina san a'n dik naw a, mani inhoitirnaa hmang dingin in hni hlak.
4. Uirehai, khawvel ruol tha ni hi Pathien hmelma nina a nih ti in hriet naw am a ni? Khawvel ruol tha ni nuom taphot chun Pathien hmelmaah an insiem a nih.
5. Einia a thlarau a sie hi a thikthu a sie ti Pathien lekha thua a hril hi a hril mei mei in sawn am a ni?
6. Sienkhom, zangaina nasa lema vur ei ni hi. Pathien Lekha thuah,"Pathienin mi chapohai a dodal a,Inngaitlawmhai a lunginsiet hlak"ti a ni kha.
7. Chuleiin, Pathien kutah intuklut unla, Diebol ruok chu dodal ro, chuongchun tlansan a ti cheu.
8. Pathien hnai ro, ama khomin hnai a ti cheu. Mi suolhai, in kut sawp fai unla; lemderhai, in lungril sukthienghlim ro.
9. Beidong unla, lungngai unla, tap ro; in innui ri chu lungngainain inchang sien la, in hlimna chu nguinaah inchang raw se.
10. Lalpa hmaah inngaitlawm unla, chuongchun chawisang a ti cheu.
11. Unauhai, inhrilse tuo naw ro. Tu khom a unau soisel amanih dem amanih chun Dan a hrilsiet a, a soisel a nih. Dan i soisel chun Dan zawmtu i ni naw a, roreltu i ni lem.
12. Dan petu le Roreltu pakhat chauh a um- sandam theia sukboral theitu chu. Sienkhom, nang tu am i ni a mani khuo le venghai chungthu reltu chu?
13. Ngaithla ro, nangni, "Voisun amanih zing amanih, chu khuoa chun feng ei ta, chu taka chun kum khat va sumdawng ei ta, sum tam tak lam ei tih" tituhai,
14. zinga chun in hringna ieng tin am a um ding ti in hriet si nawh. In hringna chu iem a na? Sum sawt naw te hung inlanga bo nawk el ang chauh a ni si a.
15. "Lalpan rem a ti chun dam ei ta, chu chu kha kha thawng ei tih" in ti lem ding a nih.
16. Tu hin chu chapo takin in uong a. Chuong anga chapo chu suol a nih.
17. Tu khomin thil tha thaw dinga a hriet a thaw si naw chun suol a thaw a nih.

  James (4/5)