| ← James (3/5) → |
| 1. | Ka unauhai, nangni lai mi tam rak lo chauh zirtirtu hung ni ro, zirtirtuhai hi mi danghai neka khir lem daia ro relpek kan la ni ding ti in hriet si a. |
| 2. | Ei rengin thaw suol chang ei nei seng. Tu khom thu hril suol ngai der lo chu mi puitling a na, chuong ang mi chun a taksa pum khom a thunun hlak. |
| 3. | Sakor bauah thirbar ei inbuk chun an taksa pum khom nuom nuomin ei kei her thei a. |
| 4. | Thli na takin long lien a nuoi leng lai khom, a long herna chikte chun a khaltuin a nuomna tieng tieng a'n fetir thei a nih. |
| 5. | Chuong ang bokin, lei hi taksaa peng chikte a nia chu uong thei tak a nih. Mei si hlekin rampui a kang dur dur thei dan dam hi ngaituo ro. |
| 6. | Lei khom hi mei a na, taksa peng laia thang, ritlona hlawm a na, taksa pumpui a sukporche a, hremhmun meia hringnun tawlailir hlieu zingtu a nih. |
| 7. | Sa tinreng, va tinreng, boka invak chi tinreng, tuipuia cheng thilhring tinreng hai hi vai ngam thei an ni a, mihriemin an vai ngam hlak. |
| 8. | Lei ruok hi chu tu khomin an khawi ngam thei nawh; suol um tok tok thei lo le thina tura sip a nih. |
| 9. | Leiin ei Pa, Lalpa chu ei inpak a, ei mihriempui, Pathien angpuia siemhai chu tongsie ei inphur bok a. |
| 10. | Bau pakhata inthokin inpakna le tongsie ei phu suok hlak. Ka unauhai, chuong ang ding chu a ni nawh. |
| 11. | Tui hnar pakhata inthokin tui inhnik le inhnik lo a suok hlak am a ni? |
| 12. | Ka unauhai, theichang kungah oliv a ra hlak am a ni? Grep kungah theichang a ra hlak am ? Chuong ang bokin chi khura inthokin fiertui thieng a suok ngai nawh. |
| 13. | Nangni lai varna le hriet thiemna nei an um am? Chet dan mawi le varnaa inthoka suok thuhnuoirolna neiin, thil tha thawin inlangtir raw se. |
| 14. | In lungrilah thikna kha tak le mani hmasielna in nei chun, chu chu uongpui naw unla, thutak hnawl naw ro. |
| 15. | Chuong ang 'varna' chu chung tienga inthoka suok ni loin ramhuoia inthoka suok a ni lem a, a khawvel a, a thlarau bok nawh. |
| 16. | Thikna le mani hmasielna a umna hmuna chun buoina le suolna chi tinreng a um hlak. |
| 17. | Chung tienga inthoka varna hung suok chu a hmasa takin a fim inthieng a, a dotah inremna a zong a, mi hmakhuo a ngai a, thu a awi a, zangaina le ra thain a sip a, thlier bik a nei naw a, a lemder bok nawh. |
| 18. | Remna siemtuhaiin inremna chi an tu chu felnain a par suok hlak. |
| ← James (3/5) → |