←  James (2/5)  →

---

1.

Ka unauhai, ei Lalpa ropui tak Isu Krista ringtu ei ni leiin thlei bik nei naw ro.

2.

In inkhawmah rangkachak kutsebi bun, thuom mawi taka inchei hung lut sien la, chun, mi rethei, zakuo top tak hak hung lut bok sien la,

3.

zakuo tha hak chu lo ngaisaka, "Nang chu thungna thaa hin inthung rawh" ti a, mi rethei kuoma chun, "Nang chu saw taka son ngir rawh" amanih, "Ka ke bul tuonga hin inthung rawh" amanih in ti si chun,

4.

thlei bik nei a, ngaituona suol putin ro in rel an naw ding maw?

5.

Ka unau dittakhai, ngaithla ro, khawvel ngaia mi retheihai hi ringnaa hausa ding le ama hmangaituhai kuoma a ram tiem chang dinga Pathienin a thlang an ni naw maw?

6.

Nangni ruok chun mi retheihai hi in hmusit si a. Mi hausahai hi nangni hnuoisietu le rorelna ina hnuk lut hlaktu cheu an ni naw maw?

7.

Ama hming ditum tak in put chu hrilsetu an ni naw maw?

8.

"Nangma i'n hmangai angin i venghai i hmangai ding a nih" ti Lekha Thua chuong, Dan poimaw tak hi in zawm chun in thaw tha;

9.

thlei bik in nei ruok chun suol in thaw a na, Dan bawsetu in nih.

10.

Tu khomin dan po po laia pakhat chauh khom a bawsiet chun a rengin a bawsiet a nih.

11.

"Ui re naw rawh" titu chun " Tuol that naw rawh" a ti bok si a; uire naw la khom tuol i that si chun Dan i bawsiet tho tho a nih.

12.

Chuongchun mi sukzalentu Dan chu hmanga relpek ding ei nizie chu hre zingin thu hril hlak unla, thil thaw bok ro.

13.

Zangaina thang loa thil thawtu chu zangaina thang loa a chungthu relpek ning a tih. Zangaina chu rorelna chunga l�ng a nih.

14.

Ka unauhai, miin "Ringna ka nei" ti sien la, a thilthawah suklang bok si naw sien, iem a tangkai a? Chuong ang ringna chun sandam thei a tim?

15.

Unaupa amanih farnu amanih saruok le phingtamin um sien la,

16.

nangni laia tuin amanih "Thlamuong takin fe la, lum tak le khop takin um rawh" ti sien la, a taksa ta dinga mamaw a pek si naw chun ieng am a tangkai a?

17.

Chuong ang bokin, thilthaw thang lo chun ringna ringot chu thil thi a nih.

18.

"A thenin an ring a, a thenin thil an thaw a ni el annawm" tia thang an um el thei. An leh, thilthawa suklang si loa ringna i nei thei dan chu mi'n entir la, keiin ringna ka nei a nih ti ka thilthawin inentir ka ti che.

19.

Pathien pakhat chauh a um ti i ring maw? I thaw tha ie, ramhuoihai khomin chu chu an ring a, an inthin hlak an sonnaw.

20.

Mi invet, ringna hi thilthaw thang lo chun ieng khom a ni nawh ti i hriet fie nuom maw?

21.

Ei thlatu Abrahamin maichama a naupa Isak a'n hlan khan, a thilthaw leia mi fela ngai a ni naw am a ni?

22.

A ringna le a thilthaw chu an thang kop a, a thilthaw chun a ringna chu a sukfamkim tah ti i hriet.

23.

Pathien Lekha thu, "Abrahamin Pathien a ring a, a ringna chu a felnaa ruot a nih" ti chu a hung tlung kim a, Pathien ruolpaa inbuk a hung ni tah a nih.

24.

A ringna lei chauh ni loin, a thilthaw leiin miin thiem a chang ti in hriet tah.

25.

Chuong ang chun nawchizor Rahabi khom khan enthlatuhai kha a lo lawm a, lampui dangah a'n kirtir a, a thilthaw lei khan thiem a chang a ni naw am a ni?

26.

Taksa hi thlarau thang naw chun mithi a ni angin, ringna khom thilthaw thang lo chun thil thi a nih.

---

←  James (2/5)  →