James (1/5)  →
1. Pathien le Lalpa Isu Krista siehlaw Jakob chun hnam sawm le pahnih khawvela inpem darhai chu chibai ka buk.
2. Ka unauhai, fiena tinreng in tuok pha leh lawmum vongah ngai ro,
3. in ringna fiena chun nangniah tuorselna a siem ti in hriet si a.
4. In tuorselna chun matheiloa sukpuitling le sukfamkimin, ieng khom baksam nei loin siem a ti cheu.
5. Nangni lai tu khomin varna a tlasam chun hal lo le inro loa mi po po kuoma pe hlaktu Pathien kuomah hni sien, pekin um a tih.
6. Amiruokchu, ringna neiin, ringhla der loin hni raw se; ringhlatu chu thliin tuipui a mut fawn le tawm leng ang hi a ni si a.
7. Chuong ang mi chun Lalpaa inthokin ieng khom hmu inring naw raw se;
8. ama chu lungril phir nei a na, a thilthaw taphota mi nghet lo a nih.
9. Unau rethei tak chu ngirhmun insanga hl�ngk�i a ni leiin lawm raw se.
10. Mi hausa khom suktlawma a um leiin lawm bok raw se, ama chu hlo par anga ral el ding a ni si a.
11. Nisa intal ruiin a hung suok a, hlo chu a em vuoi a, a par chu a til a, a mawina a chuoi el hlak. Chuong ang bokin mi hausa khom sum a buoipui zing laiin bohmang a tih.
12. Fiena tuoka ngir nghet tlattu chu a hamtha, fiena a tuor muolsuo pha Lalpan ama hmangaituhai pek a tiem, hringna lallukhum chu a chang ding a ni si a.
13. Tu khomin thlemna a tuokin, "Pathienin a mi thlem" ti naw raw se. Pathien chu suol thlem ruol a ni nawh, ama khomin mi a thlem ngai bok nawh.
14. Mi tin hi mani chakna suola thlem an ni seng lem a, chu chakna suol chun mi a hip a, a zawr hmang hlak.
15. Chu chakna chun te a pai a, suol a hring a, suol chu a puitling pha thina a'n tlun hlak.
16. Ka unau dittakhai, hlemin um naw ro.
17. Thilpek tha le famkim taphot chu chung tienga var po po Paa inthoka suok vong a ni a, ama chu hlimthla anga danglam thei a ni nawh.
18. A tum chu sukpuitling dingin, a thilsiemhai laia ra hmasa ni dingin thutakah a mi hring a nih.
19. Ka unau dittakhai, hieng hi hre ro. Mi tinin a hril tieng inchu loin ngaithlak tieng uor inla, lung suk-uoi raw se;
20. mihriem lungsenna hin Pathienin nun fel nei dinga a mi ditna chu a dal hlak si a.
21. Chuleiin, nangni laia tuolleng nun tirdakum chi tin le suol tinreng chu pei hmangin, nangnia tua um thu kha thuhnuoirol takin pom ro, chu chun a sandam thei cheu a nih.
22. Thu ngaithlak ringot thawa mani inhlem loin, a taka thilthawa zawmtu ni tum seng ro.
23. Tu khom, thu ngaithlatu nia zawm si lo chu, darthlalanga mani hmel inentu ang a nih.
24. Ngun takin a'n en a, a fe hmang a, ieng ang hmel am a put ti a theinghil nawk nghal el si.
25. Amiruokchu, tu khom dan famkim, a mi sukzalentu chu bi ngun a, chuong anga thaw rop a, a thu hriethai chu theinghil el loa thilthaw ngeia zawmtu chu, a thilthaw taphotah hmuingil a tih.
26. Tu khom sakhaw mi tak nia inngaia a lei veng hne si lo chu, mani inhlemtu a ni a, a sakhuo chu hmangna bo a nih.
27. Pathien mit hmua sakhaw biek dan thienghlim le suol thang lo chu hi hi a nih: fahra le hmeithaihai an beidong lai kan a, khawvel tirdakum kai loa invong that hi.
      James (1/5)  →