←  Isaiah (9/66)  →
1. Nisienlakhom, beidonga umhai khom lungzing zing ta naw ni hai. Kha hma khan Zebulun ram le Naftalia ram chu a suktlawm a, sienkhom hun la hung dinga ruok chu Jordan vadunga inthoka tuipui panna lampuia um Jentelhai chengna Galili ram chu ropui taka chawimawiin um a tih.
2. Thim hnuoia kalchawihai chun,Var ropui tak an hmu a,Thina hlima chenghai chungah,Zing khaw mawi a hung var a.
3. Hnamhai chu i siemlien a,An hlimna i sukpung a,Bu sik huna an hlim angin,Rallak sum insem changa,Nasa taka an hlim angin,I hmaa chun an hlim a.
4. Midianhai i hne ni ang khan,An rikphurna ringkolhai,An thil inkotna liengkothai,Neksawrtuhai hmoltumhai,Nangin i suktliekpek tah.
5. Indonaa sipaihai pheikhok bun dam,Thisen kai hnuong an thuomhai dam,Meiin la raw hmang an ta,Thing angin la ti'ng an tih.
6. Ei ta dingin nau a pieng a,Nau pasal pekin ei um a,A liengkoa chun rorelna,Innghatin kengkawng a ta,A hming chu Remruottu Mak,Pathien Hrat, Chatuon Pa,Remna Lal la ti'ng an tih.
7. A ram lien zuol pei a ta,A ramah inremnain,Tawpintai nei ngai naw nih.Davida lalthungphaah,Thungin ro hung rel a ta,Indik tak le fel takin,Chu hun le chatuon chenin,A ram chu suknghet a tih.Iengkim LALPA thahnemngainan,Chuong po po chu thawng a tih.
8. Israel chunga thil tlung ding chu,LALPAN Jakob sungkuo a hril a.
9. Israel ram le Samaria chenghaiin,An rengin la hrieng an tih.Anni chun chapo tak leLungril uongthuong tak elin,
10. "A teklei chim tahai chu,Lung ser namin thlak ei ta;Theichang tluon an hmanghai khom,Sidar thingin thlak ei tih"Tiin an hril hlak si a.
11. Sienkhom anni bei dingin,An hmelma Rezin kut chu,LALPAN a sukhratpek a.
12. Sak tieng pangah Aramha'n,Thlang tieng pangah Filistinha'n,Israelhai fak zo tumin,An bau an ka tuou a nih.Chuong ang hiel chu ni sienkhom,A lungsen a re naw a,A kut a hlang zing a nih.
13. Chuonga a hrem tawl khomin,Iengkim LALPA kuom tieng chun,Simin an hung kir chuong nawh.
14. Chuleiin, Israel lu le mei chu,Tum kau le phairuong angin,LALPAN ni khat thilthuin,A fik bong vong ding a nih.
15. Mi lien le upahai chu,A lu tieng pang ning an ta,Khel hriltu zawlneihai chu,A mei tieng pang ning an tih.
16. Hnam thuoituhan an mihai,An thuoi suol a, an boral zo.
17. Pathien poisakna nei lo,Mi rilo le khel hril hmang, Anni tawl vong tlat leiin,Thangtharhai chungah Pathien,A lungni thei ta naw a,Fahra le hmeithaihai khom,A lunginsiet thei ta nawh.Chuong ang hiel chu ni sienkhom,A lungsen a re naw a,A kut a hlang zing a nih.
18. Meiin buor le hlo hling nei,A kang hmang vong hlak angin,Suolna khomin mei angin,Ram a kang dur dur hlak a,Rampuihai khom a kang a,A khu a tung ngut ngut hlak.
19. Iengkim LALPA lungsenin,Ram po po raw hawp a ta,Mihai chu meia ti din,Thing herah inchang an ta,Mani unauhai chen khom,Tu khomin hla naw ni hai.
20. Chang tienga mi an dol a,An tam a re chuong naw a,Voi tienga mi an fak nawk a,Khop tik an nei chuong si nawh.Mi tinin mani nauhai sa,Intim loin fang an tih:
21. Manase le Efraimhai inbei an ta,An pahni'n Judahai beihron an tih.Chuong thil hiel chu tlung sien khom,A lungsen a re naw a,A kut a la hlang zing tho.
←  Isaiah (9/66)  →