←  Isaiah (8/66)  →
1. LALPA chun ka kuomah, "Thil
2. chun, ka ta dinga hrepuitu ringum dingin thiempu Uria le Jaberekia naupa Zekaria hai chu ko ka tih" a ta.
3. Chu hnungah zawlneinu, ka nuhmei chu ka umpui a, nau a hung pai a, nau pasal a nei a. LALPA chun ka kuomah, "A hmingah Maher-Shalal-Hash-Baz i sak ding a nih.
4. Hi nau hin 'Pa, Nu' a ti thei hmain Damaska hausakna po po le Samaria ral lak sumhai po po chu Asuria lalin tol hmang vong a tih" a ta.
5. Chun, LALPAN a mi biek nawk a,
6. "Hi mihai hin Siloa tui luong dam diei chu hnawlin, Rezin le Remalia naupa Peka hai chu an hlimpui lem a.
7. Chuleiin, kei LALPA hin Eufretis vadungpui khauh tak le tam tak el, Asuria lal le a sipaihai chu tui angin hung inlientir ka ta, a kuong liem zuoi zuoiin a kama chun let a tih.
8. Judai ram chenin luong lut hum hum a ta, ring chena insangin chim a tih. I thla zar chun, Aw Immanuel, i ram zar khum duoi a tih.
9. Asuria-hai chun, "Aw hnam tinhai, indo dingin tlang insam ro, hang nuoi hmat kan ti cheu. Ram hlaa mihai khomin lo ngaithla un la, indo dingin inpuocha ro, hang nuoi hmat tak tak kan ti cheu.
10. Thang khaw dan ding phan inla khom, ieng bar ni chuong naw ti niu. Thaw dan ding rel inla khom, ieng khom sawt naw nih, Pathien kan kuomah a um si a" tiin vaukhawng an tih.
11. LALPA chun hieng mihai lampui hi ka zui ve nawna dingin khau takin thu a mi pek a:
12. "Hienghai thu phiernaa hin,Nang chu thang ve der naw rawh;An tihai hi ti ve naw la,An pangzat pangzat naw rawh.
13. Iengkim LALPA chauh a nih,Thienghlima i ngai ding chuh.Ama chauh chu a nih ti ding,Ama chauh chu a nih pangzat ding.
14. Ama chu i himna ding a nih;Israel sung hni ta ding ruok chun,Tlukna le dalna lungpui,Jerusalema chenghai ta din,An bil le chang ni lem a tih.
15. Tam tak insui thlung an ta,Tluin koi dar phung an ta,Awkin man tawl bok a tih" tiin.
16. Inhriettirna thuhai chu,Ziek thlain kol diem ka ta,Ka thuoihruoihai lungrilah,Inhlanin tunghet ka tih.
17. Jakob sungkuohai laka,A hmai thuptu LALPA chu,Kei ruok chun nghak zing ka ta,Amaah innghat tlat ka tih.
18. En ta, kei le LALPA mi pek ka nauhai hi, Zion tlanga cheng, Iengkim LALPAN Israel rama inchikna thil maka a hmanghai chu kan nih.d
19. Dawi hla thum bul bula insam hlak aienthiem le rau ko thiemhai rawn dinga mihaiin an hril pha cheu chun, "Mihaiin Pathien an rawn lem ding a ni naw am a ni? Dam lai nekin mithi hnung an rawn lem hlak am a ni?" tiin don hlak ro.
20. Dan Thu le Inhriettirna Thu chu zawm lem ding a nih. Hi thu anga an hril a ni naw chun an ta dingin khawfing chat ngai naw nih.
21. Beidong le phingtamin ram tinah invak kuol an ta, an tamsawl pha leh lungsen em emin chung tieng en an ta, an lal le an Pathien chu tongsie inphur an tih.
22. Chu zoah hnuoi tieng en an ta, beidongna le thim, thimpui tium chauh hmung an ta, thim sa mupah hnaw hmangin um an tih.
←  Isaiah (8/66)  →