←  Isaiah (7/66)  →
1. Juda lal Uzia naupa Jotham naupa Ahaz inlal laiin, Aram lal Rezin le Remalia naupa Israel lal Peka hai chu Jerusalem run dingin an hung inthok a, sienkhom an hne el thei naw a.
2. Chu phing leh Davida sunghai kuoma chun, "Aram lal le Efraimhaia an thang ruol a nih" tiin an va hril a, lal Ahaz le a mipuihai lungril chu thliin ram thing a mut hning ang elin a'n hning a.
3. Chuongchun, LALPAN Isai kuomah, "I naupa Sear-Jasub thuoi la, Ahaz va hmu rawh. Dil sakhnung lema tui lakna lampui tawpa puon sawptuhai hmun panna lampuiah a um.
4. A kuomah, 'Fimkhur la, ti loin muong takin um rawh. Aram lal Rezin le Remalia naupa lungsen inhrawk chu thingthu hring rem hnung khu lui lui ang chauh a na, thlaphangna ding ieng khom a um nawh.
5. Aram hai, Efraim hai le Remalia naupa hai chun i sietna ding an phier ruk a,
6. Judai ram hang run ei ta, khoi dar vong ei ta, insem ei ta, lal Tabeel naupa chu lalah sieng ei tiu" an ti a nih.
7. Lalpa PATHIEN ruok chun hieng hin a hril:"An thil phier puitling naw ni a,Hlawtling ngai bok naw ni hai,
8. Aram khawpui chu Damaska a na,Damaska lu chu Rezin el hi a nih.Kum sawmruk le panga sungin,Efraim hnam khom se vong an ta,Hnamin dam khawsuok naw nih.
9. Efraim lu chu Samaria a na,Samaria lu chu Remalia naupa el a nih.Ringnaah in ngir nghet naw chun,Dingchang thei ngai naw ti niu"tiin.
10. LALPA chun Ahaz a biek nawk a,
11. "Seol inthuk tak amanih le van insang taka inthokin amanih inchikna inentir dingin LALPA i Pathien kuomah hni rawh," a ta.
12. Ahaz chun, "Hni naw ning, LALPA chu fie naw ning" a ta.
13. Chu phing leh Isai chun, "Davida sunghai, tuhin lo ngaithla ro. Mihriemhai dawtheizie fie hi huntawk in la ti naw rop a ni maw? Ei Pathien dawtheizie chen khom fie pei in tum am a ni?
14. LALPA ngei chun inchikna inhmutir a ti cheu: Nunghak thienglam chun nau pai a ta, nau pasal nei a ta, a hmingah Immanuel sak an tih.
15. Ama chun a sie le a tha a thlier thei pha chun bawngnene khal le khuoizu ring a tih.
16. Chu naupang chun a sie hnawl a, a tha a thlang thei tak tak hma khomin i ti em em hlak lal pahnihai ram chu sukramin um a tih.
17. Efraim-in Juda a theab inthoka la tlung ngai lo thil chu LALPAN nangma le i khuo le tuihai le i pa sungkuohai chungah hung intlungtir a ta, Asuria lal chu hung thuoi a tih.
18. Chu ni chun LALPAN Aigupta vadung tawp reta thohai le Asuria rama khuoihai chu faifukin ko a ta,
19. ruom khokroka hai, lungpui kak kara hai, hling buk le tui lakna hmun po poah fu sip vong an tih.
20. Chu ni chun Eufretis vadung khela LALPA hmul vawna haw Asuria lal chu hmangin in lu le ke vaw kol vong a ta, in khakhmul chen khom ziet fai a tih.
21. Chu ni chun bawng tuoi pakhat le kel pahni bak chang nei naw ti niu.
22. A rama cheng la um sunhai chun bawngnene khal le ram khuoizu ring an tih.
23. Chu ni chun tangka buk sangkhat man grep kung sang umna hmunhai kha hling le buorin bawm sip a tih.
24. A ram chu hling le buorin a bawm sip tak leiin chu taka chun sapelin mihai chu thalngul le thal chawiin ramsuok an tih.
25. Tuthlaw hmanga tlang lo in neina hlakhai chu hling le buorin bawm khum a ta, fe ta ngai nawng in ta, bawng ruol le beram ruol tlatna hmun inchang tang a tih.
←  Isaiah (7/66)  →