←  Isaiah (66/66)    
1. LALPA chun hieng hin a tih:"Van khi ka lalthungpha a na,Hnuoi hi ka ke nghatsan a nih.Khaw lai am ka in ding chu,In mi bawlpek ta ding a na?Khaw lai hmun am cheng ka ta?
2. Thil iengkim hi ka kuta siem,Ka'n umtir vong a ni naw maw?" Hi hi ka ngaihlut zawng a nih:Lungrila inngaitlawm hlak mi, Lungrila insir ngawi ngawi mi,Ka thu inzaa inthin hlak mi.
3. "Sienkhom hienghai ngaia chu,Bawngchal thata inhlan amanih,Mihriem thata inthawi amanih,A danglamna a um chuong nawh.Beramte inhlan amanih,Ui rek hlum inhlan amanih,Bu le bal inhlan amanih,Vok thisen inhlan amanih,Rimtui an raw amanih,Milem an biek amanih,Thil danglamah an ngai nawh.An nuom nuomin thil an thaw a,Thil porche an thawhai chun,An lungril a suklawm hlak.
4. Ka koin an mi don naw a,Ka biekin an mi uksak nawh.Ka mithmuah thilsuol thaw a,Ka theida zawng an thaw leiin,Kei khomin indoi loin,Na takin soisak tawl ka ta,An lo tithawng tak thil chu,An chungah intlungtir ka tih."
5. A thu tia inthin hlakhai,LALPA thu hi lo ngaithla ro:"Ka hming leia theidatu le,Hnawltu cheu in unauhai chun,'LALPA chu ropuina leh,Hung inlang mol raw se chu,In lawm chie am hang en ei tih'Tiin an tong khum cheu kha.Sienkhom la muolpho an tih.
6. Khawpui buoi ri chu ngai ro,Tempula an rihau chu!An suol dan ang phu pei a,A hmelmahai thungrultu,LALPA chet ri a ni chu!
7. "Nau hase tuor hman lo a,Nau nei ta thut ang elin, A nat hung intan hmain,Nau a hring a ni chu tie!
8. Chuong ang thil chu tuin am,Hrein an hmu hlak hrim a?Ni khat sung thilthu chauin,Ram a pieng hlak am a ni?Mit khap kar khom tling loin,Hnam a pieng hlak am a ni?Nisienlakhom Zion chun,Nau hase a tuor tan chauin,A nauhai a hring tlat si!
9. Nau nei hun chen thuoi tlungin,Nau ka'n hringtir naw ding maw?A hring hun a tlung phing leh, A sul ka kharpek ding maw?"Tiin LALPA chun a hril.
10. "A hmangaitu po po chun,Jerusalem chu hlimpuiin,Ama suntu po poin,Nasa takin lawmpui ro.
11. A tangah inbeitirin,A nene'n chawm tlei a ti cheu;Fawpin ne kuong kuong in ta,A tui tam chu lawm in tih"Tiin in LALPA chun a hril.
12. Hi hi LALPA chun a hril:"Remna chu vadung angin,A kuom tieng luong lut a ta,Vadungte let ang elin,Hnam tinhai hausakna chu,A kuongah luong liem a ta;Chuonghai chu tlan tang in ta,A kutin pom a ti cheu a,A mal chungah chuong in tih.
13. Nuin nau a'n awi angin,Kei khomin inawi ka ti cheu; Jerusalema chun muong takin,In um ta ding a ni si" tiin.
14. Chu thil chu in hmu pha chun,In lungril lawm tang a ta,In ruhai khom hlobet angin,Hung inno dur dur a tih.A siehlawhai chunga chun,LALPA kut chu um a ta,A hmelmahai chunga chun,A lungsen suklang a tih.
15. A lungsen hrik thla ding leMeichoka zilhau tawl dingin,En ta, mei leh LALPA chu a hung;A tawlailirhai khom chu,Thawngaleivir ang a nih.
16. A meichok le kawlhnamin,Mihriemhai chungah rorelna,LALPA chun hung chelek a ta,Mi tam tak sukhlum a tih.
17. "Inthawi le insukthienghlim dinga huona fehai le voksa le mazu sa le sa porche fatuhai chu an rengin bohmang tlang an tih," tiin LALPA chun a hril.
18. "An thilthawhai le an suongtuohai ka hriet a, hnam tin le tong tina mihai chu lawr khawm dingin ka hung tep a nih; chuongchun hung an ta, ka ropuina hmung an tih.
19. "Chun, anni lai inchikna inentir ka ta, hlaa la um sunhai chu hnam tin- Tarsis mihai, Libia mihai, thal kap thiem Lydia mihai, Tubal le Grik mihai le thlierkar hla taka um, ka hming inthangzie la hre ngai lo le ka ropuizie la hmu ngai lohai- kuoma chun tir ka ta, hnamhai kuoma chun ka ropuizie puong dar an tih.
20. Israel thlahaiin an thil inhlanhai chu bur le bel thienghlim taka LALPA tempula an hung lak lut hlak ang hin, LALPA kuoma thilhlan dingin hnam tin laia inthokin in unauhai po po chu sakor chunga dam, tawlailira dam, thuomhnaw phurna tawlailira dam, sabengtung le sanghawngsei chunga dam chuongin, ka tlang thienghlim, Jerusalemah ka hung thuoi khawm ding a nih..
21. Chuonghai laia mi thenkhat chu thiempu ding dam le Levi chia ding damin ruot ka tih," LALPA chun a tih.
22. "Chun, van thar le hnuoi thar ka siem ding chu ka hmaah um zing a ta, in thlahai le in hminghai khom um zing bok a tih.
23. Thla thar ni zat le Sabat ni zatin mi po po chu chibai mi buk dingin ka hmaah hung zut zut an tih.
24. Chun, fe suok an ta, ka laka helhai ruong chu en an tih; an ngehai chu thi naw ni a, mei khom chu sukmitin um bok naw ni a, mi po poin tirdakum ting an tih" tiin LALPAN a hril.
←  Isaiah (66/66)