←  Isaiah (65/66)  →

---

1.

LALPA chun hieng hin a tih:"Mi lam ngai nawtu kuomah,Keima chu inpuong ka ta,Mi zong ngai nawtu khomin,Mi hmu thei ve tang an tih.Ka hming lam ngai lohai kuomah,'Hi takah ka um, hi takah ka um'Tiin keiman ka hril tawl a.

2.

Mi lululhai ta dingin,Ni tin tinin ban ka phar a,Lam tha naw tieng an hraw a,An suongtuona an hnot a.

3.

Chuong mihai chu chawl loa,Hmai sana mi cho phawktu,Huonah pumraw thilhanhai,Lung rem chungah rimtuihaiInhlan hlaktuhai an nih.

4.

Thlan muola hai chun thungin,Hmun fienrielah an riek a,Voksa dam an fak hlak a,Sa thieng lo belah suongin,A tuihang dam an sie a;

5.

Mi kuomah, 'Mi hnai naw rawh,Kei chu mi thienghlim ka nih'Ti hlak sihai chu an nih.Chuonghai chu ka hnar urtu,Rimsie ang char an ni si a.

6.

"Ngai ta, ka hmaah ziekin a um:To zing loin thungrul ka ta,A nih, a kimin thungrul ka tih-

7.

Anni suolna chauh ni lo,An pi le puhai suolna khom.Tlangahai chun inthawiin,Muol tin an sukporche a,An thil suol thaw tahai chu,A kimin thungrul ka tih"Tiin LALPA chun a hril.

8.

Hi hi LALPA chun a hril:"Grep ra bawr luoi lai chun,A tha a la um lei a,'A reng khan dehawn naw rawh,A tha thenkhat a la um'An ti hlak ang deu bok khan,Ka siehlawhai zar chauin,An rengin sukse naw ning.

9.

Jakob thlaa inthokin,Chi pakhat indin ka ta,Juda thlaa inthokin,Ka tlang hung hluotu ding chu,La hung indin suok ka ta,Ka thlanghan rochung an ta,Ka siehlawhai cheng an tih.

10.

Ka mi, mi zongtuhai ta dingin,Saron phai chu an beram ruolhai,Tlatna hmun hung ning a ta.Akor ruom chu an bawng ruolhai,Chawldamna hmun ning a tih.

11.

Sienkhom LALPA maksantu,Ka tlang thienghlim theinghiltu,Vangnua ta dinga dawkan buotsaia,Khuorel ta dinga uoin chokpoltu chu,

12.

In chanah kawlhnam be ka ruot a,Sukhlumtu hmaah kun in tih;Ka ko cheu a, in mi don nawh,Ka biek cheu a, in ngaithlak nawh;Ka mitah thil suol in thaw a,Ka theida zawng in thlang si a

13.

Chuleiin, LALPA Pathien chun hieng hin a tih:Ka siehlawhaiin fang an ta,Nangni chu phingtamin um i tih;Ka siehlawhaiin dawn an ta,Nangni chu dangcharin um i tih;Ka siehlawhai chu hlim an ta,Nangni ruok chu inzak i tih.

14.

Ka siehlawhan lungril takin,Hlimin lawm hla sak an ta,Nangni ruok chu lungzinga tapin,In thlarau beidongna leiin,Inrumin tap khek in tih.

15.

Ka thlanghaiin in hming chu,Tongsie inphurnan hmang an ta,Kei LALPA Pathien ngei hin,Nangni chu sukhlum ka ti cheu a,Ka siehlawhai kuoma ruok chu,Hming thar ka pek ding a nih.

16.

A ram sunga malsawmna hni photin,Thutak Pathien kuomah hning an ta,A ram mi intiemkamtu taphotin,Thutak Pathien hmingin intiem an tih.An buoina nihai kha theinghil an ta,Tong nawk tah ngai naw ni hai.

17.

"Ngai ta u, van thar le hnuoi thar,Ka hung inumtir ding a nih.Thil hmasahai kha an liem ta a,Hriet fuk ni ta naw ni hai.

18.

Ka thil thar inumtira chun,Lawmin hlim kumkhuong in tih.Jerusalem chu ditum takin,A mi chenghai khom lawm takin,Ka siem ding a ni si a.

19.

Jerusalem chungah lawm ka ta,Ka mihai chungah hlim ka tih.Chu hmuna chun tap ri hrim hrim,Hriet ni nawk ta ngai naw nih.

20.

Chu taka pieng nautehai chu,Hlamzuia thi um naw ni hai a,Tarkunin dam tang an ta,Kum za tling chauha thihai chu,Tleirawla thiah ngai an ta,Kum za khom dam tling lo chu,Tongse phura ngai ning an tih.

21.

An in bawla chun cheng an ta,Grep phunin a ra tlan an tih.

22.

Mi dang hluopek el dingin,A thlawnin in bawl ta nawng an ta,Mi danghai fakpek el dingin,A thlawnin grep ching ta bok naw nih.Thing dam kum zat zet dam an ta,Ka mi thlanghai chun an thaw ra,Tarkun chenin tlan tang an tih.

23.

Sin inrim thlawn ta naw ni a,Vangduoi ding nau nei bok naw nih;An tu le tehai chen khomin,LALPA malsawmna dong an tih.

24.

An mi ko hmain don ka ta,An hril laiin ngaithlang ka tih.

25.

Satene le beram tla khawm an ta,Sakeibaknei khomin bupawl,Bawngchal angin fa ve tang a ta,Rulin pilvut buah ring a tih.Insuknat le insuksiet hrim,Ka tlang thienghlimah um naw nih,LALPA chun a ti a nih.

---

←  Isaiah (65/66)  →