Isaiah (64/66)  

1. Van kei thlerin hung tum la,Ka va hang ti ngei de aw!I hma bulah tlanghai chu,An inthin dur dur awm si!
2. Thukah thing tawl ei ti a,Tui ei suong so bor bor anga, hmelmahai hin i hming,An hung hriet theina ding leHnamhai chu i hma bulah,An inthin hlop hlopna dingin,Hung tum la ka nuom a nih.
3. Tien lai khan i hung tum a,Kan beisei neka nasain,Thil rapthlakhai i thaw a,Tlanghai chu i hma bulah,An inthin dur dur hlak kha.
4. Tiena tlanga inthok khan,Nang Pathien chauh naw hi chu,Anni nghaktuhai ta dinga,Hieng ang thil thawpek hlak hi,Tu khom an hriet ngai naw a,Nain an la hriet ngai naw a,Mitin an hmu ngai bok nawh.
5. Lawm taka thil fel thaw a,I lampui hrawtuhai chu,Nangman i thangpui hlak a.Sienkhom i lampui hraw loa,Kan hung suol zui pei hnungin,Kan chungah i lungsen a.Iengtin am keini rawi hi,Sandam ni thei tang kan ta?
6. Kan reng el hin mi porche,Kan lo ni tawl ta vong a,Felna thil kan thawhai khom,Suontiek bal ang chauh a na,Hnatawng angin kan rop a,Kan suolna chun thli angin,A mi len hmang hlak a nih.
7. I hming kan lam ta naw a,Nangma chel tuma bei hrim,Tu khom kan um ta bok nawh;Kan lakah i hmel i thup a,Kan khawlonaa zur hmang dingin,I mi lo pek suok tah a nih.
8. Chu khom chu ni sien LALPA,Nang kan Pa i ni tlat si.Keini hi bepil kan na,Nang chu belhemtu i na,I kutsuok vong kan ni hi.
9. Aw LALPA kan chunga hin,I lung sen taluo naw sien,Kan suolnahai kumkhuoin,Mi hre zing pek naw hram rawh.Mi zuk en nawk hram rawh khai,I mihai kan ni si a.
10. I khawpui thienghlimhai chu,Thlaler an inchang zo a,Zion khom thlaler inchangin,Jerusalem chu rausan khawpui,A lo inchang der tah hi!
11. Kan thlatuhan an inpakna che,Tempul ropui le thienghlim chu,A lo kang ram vong ta a,Kan hlut rosum po po khom,A kang ram ta vong a nih.
12. Hieng sa khom hin aw LALPA,Kut i kei tim zing ding maw?To zingin, tawp nei loin,I mi hrem zing tawl ding maw?

  Isaiah (64/66)