←  Isaiah (63/66)  →

---

1.

Edom rama inthoka hung,Bozra khuoa inthoka mi,Thuom sen hak saw tu am a na?Lal thuom mawi tak inbel a,Hrat taka hung saw tu'm a na?"Keima, indik taka thu hril hlak,Ropui taka sandamtu ka nih."

2.

Iengti leia i thuom khom chu,Grep sawrna khura thokhai anga,A sen hneng hnuong am a na?

3.

"Keima chauin hnam danghai chu,Grep ra angin ka sir sawr a,Keima chauin ka chil tawl a,Tu khomin an mi thangpui nawh.Lungsenin ka sir sop a,Lung chokin ka chil rak a,An thisenin a mi chik khum a,Ka thuomah a kai a nih.

4.

Phuba ka lak ni ding chu,Ka lungrilah a um tlat a,Ka mihai intlanna dinga,Ka kum ruot a tlung ta si.

5.

Thangpuitu an nei am tiin,Ka hei ngha vel ruoia chu,Mi tu khom an hung si nawh.Santu an nei hlol naw el chu,Mak khom ka ti em em a.Chuleiin ka banin sandamna chu,Keima ngeiin ka hlen suok a,Ka lung chokin a mi sukthatho a.

6.

Ka lungsen chokin hnamhai chu,Sukruiin ka sir sop neng a,Hnuoiah an thisen ka bun thlak a."

7.

LALPA ngilneizie hril ka tih;Ka ta dinga a thilthawhai dam,A lungsietna le ngilneina zara,Israel sungkuo ta dinga thil tha,A thawpek zozaihai dam leiin,Ama inpakin hla sak ka tih.

8.

LALPAN, "Ka mihai ngei an na,Mi hlemtu nau an ni nawh" a ta,Anni sandamtuah a thang a,

9.

An lungzingna a lungzingpui a,An beidong ni po poah,A vantirkohai chu hmangin,Anni chu a san suok a,A hmangaina le zangainain,Anni chu a'n tlan suok a,Tiena tlanga inthok ta khan,Pom kangin a puok tawl hlak.

10.

Sienkhom a lakah an hel a,A Thlarau Thienghlim an suknuor a.Chu lei chun a lungril thlakin,An hmelmaah a thang a,Anni chu a do let tah a nih.

11.

Chu phing leh a mihai chun,Mosie hun laia thil tlung tahai,Tien lai thilhai chu an sui kir a,An ran ruolhai le an vengtu,Tuipui a'nthoka thuoi suoktu kha,Khaw lai am a um ta le?Anni laia a Thlarau Thienghlim,Sietu kha khaw lam a um ta a?

12.

Mosie ban chang tienga thang,Ban mak le hrat hung tirtu kha,Kumkhaw hrilfak tling hiel khop,An hmaa tui vaw tantu kha,

13.

Li ril inhraw thlengtirtu,Hmun rema sakor thuoi anga,Insui thlu loa in kantirtu kha,Khaw lai am a um ta a? an ta.

14.

Phaia ran ruol tla dem dem angin,LALPA thlarauin an chawl hadamtir a,Chuong ang chun a hming ropuina din,A mihai chu a thuoi tawl si.

15.

I hmun thienghlim le ropui,I chengna van sanga inthok khan,Zuong thlirin mi zuk en ta,I thahnemngaina le hratna kha,Khaw lai am a um zo ta a?I mi'n voina le lainatnahai kha,Kan lakah i lak kir vong an ta?

16.

Nang chu kan Pa i nih;Abrahamin a mi hriet phak nawh,Israelin a mi hmu phak bok nawh.LALPA, nang ruok chu kan Pa i na,Tiena inthokin i hming hi,Kan Tlantu a ni kumkhuo.

17.

Aw LALPA, i lampui a'nthok,Ieng dinga i mi'n vak hmangtir?Ieng dinga nangma ti lo dinga,Kan lungril i sukngar hlak am?I siehlaw, i rochan hnamhai leiin,Hung ngha kir nawk hram raw khai!

18.

I mihai hin sawt nawte chauh,I hmun thienghlim an hluo hman a,Tu hin kan hmelmahai chun,I hmun thienghlim an chil siet zo tah.

19.

Tiena inthoka i ta kan na,Sienkhom kan lal ni ngai lo,I hming put ngai lohai ang el,Kan lo inchang zo ta si a.

---

←  Isaiah (63/66)  →