←  Isaiah (60/66)  →

---

1.

"Tho la, i eng insuo rawh,I var chu a hung tlung ta a,LALPA ropuina i chungah,A hung suok tah a ni hi.

2.

En ta, thimin hnuoi a'n khum a,Thim sain mipui a tuom a,Nisienlakhom, i chungah,LALPA eng a hung suok a,A ropuinan a'n khum che.

3.

Hnamha'n i eng pan an ta,I hung var suokna tieng chu,Lalhai khomin pan an tih.

4.

"Ngha velin hang thlir vel la,An renga inhui khawmin,I kuom tieng an hung pan ie.Ram hla taka inthokin,I naupahai an hung a,I naunuhai an hung thuoi.

5.

Chu huna chun i hmel chu,Hlimin hung eng suok a ta,Um ngaina hre lo khopin,Hlimnain sip tang i tih.Tuifinrieta sumdawnghaiin,Hausakna hung phur an ta,Hnam tinhai hausakna chu,I kuomah hung lut a tih.

6.

"I ramah sanghawngsei ruol,Midian le Efaa inthoka,Sanghawngsei tuoihai le chun,Hmun tinah tla khawm an ta,Seba rama inthokin,Rangkachak le rimtui phurin,Hung pan duol duol an ti che a,LALPA inpakna thu puong an tih.

7.

Kedarhai ran ruol po po khom,I kuomah hung thuoi an ta,Nebaiothz beramchalhai khom,Ka maichama inthawina dingin, Pumraw thilhlanah hmang i ta,Chuonghai chu pom ning an ta,Ka tempul chawimawi ka tih.

8.

"Sum anga intawl duol duol,Mani buzawl seng pana,Vathu ruol anga vuong saw,Tuhai am an ni ta le?

9.

Thlierkar hla taka inthoka,Israel thlahai hung phurtu,Tarsis long ruol an ni saw!Israelhai Mi Thienghlim,LALPA in Pathien ropuina di'n,An rangkachak le tangkaruo leh,An hung phur tawl a ni saw.Ama chun ropui takin,A'n thuom mawi cheu a ni hih.

10.

"In kul bang chim tahai chu,Ram danghan rem nawk an ta,An lalhan in rong bawl an tih.Lungsenin ka vuok cheua chu,Ditsakin lunginsiet tang ka ti cheu.

11.

In kul kotkharhai sun le zanin,Khar loin inhong tang a ta,Hnam tin lalhan an rosumhai,Hung tol lut zut zut an ta,An lalhan hung zui lut an tih.

12.

Tu khom i rong bawl nuom lo,Ram le hnamhai hrim hrim chuSein bohmang letder an tih.

13.

Lebanon tlang sukropuitu,Far thing chi hrang hranghai chu,Ka hmun thienghlim cheimawina di'n,Hung tol thla hum hum an ta,Ka ke nghatna hmun ngei chu,Ka sukropui ding a ni si.

14.

Neksawrtu che thlahai chu,In hmaah hung bokkhup an ta,A hmusittu che po po khom,I ke bulah bokkhup an ta,'Israel Mi Thienghlim Zion,LALPA Khawpui' ting an ti che.

15.

"Rausan le theida changin,Tu sir hlaw naw ni la khom,Kumkhuoa khawpui suongum,Suon tin lawmah siem ka ti che.

16.

Hnam tin nenetui tlan i ta,Lalhai nenetui dawn i tih.Chu hun a hung tlung pha chun,Kei LALPA hi, i Sandamtu,Tlantu le Jakob Mi Thienghlim chu,Ka nizie hung hre tang i tih.

17.

Dar aiah rangkachak pein,Thir aiah tangkaruo pein,Thing aiah dar thir pe lemin,Lung aiah thir peng ka ti che.Thlamuongna chu inlal a ta,Felna chun ro rel tang a tih.

18.

Inpawngnekna ri hrim hrim,A ramah hriet ni ta naw nih.Rauna le sietna ri hrim hrim,A ramah hriet ni bok naw nih.In kul hming chu 'Sandamna'Kotkhar hming chu 'Inpakna'Tiin ko ta lem in tih.

19.

Suna nangma entu dingin,Ni khi hmang ta nawng i ta,Thla var ngai ta nawng i ta,LALPA chu kumkhawtluonga,I var hung ni tang a ta,Pathien chu kumkhawtluonga,I ropuina ning a tih.

20.

I nisa chu tla ta naw nih,I thla mang ta bok naw nih.LALPA chu kumkhawtluonga,I var hung ni tang a ta,I lungngaina nihai chu,Kumkhuoin tawp tang a tih.

21.

Chu pha chun i mihai chu,Mi fel ni vong tang an ta,A ram chu kumkhawtluongin,An hluo song ta ding a nih.Ka mawina tar lang dinga,A zung inder ka phun an na,Ka kutsuok lieu lieu an nih.

22.

In laia chin tak khom hi,A sangin la pung a ta,In laia hnam chin tak khom,Hnam ropui la ning a tih.Kei hi LALPA chu ka na,Hienghai hi a hun takah,Inrang takin hlen ka tih" tiin.

---

←  Isaiah (60/66)  →