←  Isaiah (54/66)  →

---

1.

"Aw nang ching, nau nei ngai lo,Hlim takin hla sak rawh;Nang, nau hase tuor ngai lo nu,lim takin zai hla rem rawh.Pasal nei nu nek daiin,Rausan nu chun nau a hau lem"Tiin LALPA chun a hril.

2.

I puon in hmun chu zauh la,I puon in chu zar lien la,A keina hruihai suksei la,A thlungphun vaw nghet sauh rawh.

3.

Chang tieng le voi tieng pangah,Hung indar zau pei i ta;I thlahaiin hnam danghai,La hung hnot suok pei an ta,An khaw rausan hnunga hai,Umhmun la khuor nawk an tih.

4.

"Ti naw, muolpho naw ti nih, Hmingsiet inlau hrim hrim naw,Hmaimawkin um naw ti nih.I tleirawl lai muolphona kha,Theinghilin um tang a ta,I hmeithai hmaimawkna khom,Hre zing ta naw bok i tih.

5.

I pasal chu nangma Siemtu,A hming chu Iengkim LALPA,I Tlantu chu Israel Mi Thienghlim,Khawvel po po Pathien a nih.

6.

Tleirawlte laia pasal nei,Sienkhom hnawl le maka um,Lungril beidong taka khawsa,A pasalin a ko nawk ang elin,Pathienin ko nawk a ti che.

7.

"Sawtnawte ka maksan che a,Sienkhom lungsietna inthuk takin,Ka ko nawk ding che a nih.

8.

Ka lungsen phulin sawtnawte,I lakah ka hmel ka thup a,Sienkhom kumkhaw ngilneinain,Ka lunginsiet ding che a nih"Tiin LALPA, i Tlantu'n a hril.

9.

"Tuiin hnuoi chim pil ta lo dingaNova kuoma ka'n kham ang khan,I chungah ka lung sen ta naw ni a,Zilhau ta bok naw ning cheng,Tiin thu ka'n kham a nih.

10.

Tlanghai inhning dur durin,Muolhai son hmang ni sien khom,Ka ngilneina chu i lakah,La hmang ta ngai nawng ka ta,Ka remna thuthlunghai kha,Sonin um ngai der naw nih"Hmangaitu LALPAN a tih.

11.

"Aw, nang khawpui rimsi,Tui fawn vor anga vor leng,Muongna hmu ngai lo, khawpui,Indin thar nawk ka ti che.Lung tha chiin rem ka ti che a,A kil thutah safir lung,

12.

I vengbukah rubi lung,Kotkharah lung chang tle chi,Bangah lung tha ngot hmang ka tih.

13.

In nauhai LALPAN zirtir a ta,Nasa takin thlamuong an tih.

14.

Felnain suknghet ka ti che a,Neksawrtu leh inhlat in ta,Ti ding hrim nei naw ti nih.Titum la hmangpek ka ti che a,I kawl hnaiah hung naw nih.

15.

Bei ding chea hung inthok chu,Ka thua hung ni naw ni a,A beitu taphothai che chu,I hmaah tlawm vong an tih.

16.

Ngai ta, thirsu chu ka siem a na,Pumah meihol zap lingin,Indona hriemhrei a ser a.Hriemhrei suksetu ding khom,Keima siem tawl tho an nih.

17.

Nangma beina dinga ser,Hriemhrei chu tangkai naw nih;Nangma hektuhai po po khom,Thiem naw inchangtir ka tih.Chu chu LALPA siehlawhai chan a na,Hnena petu chu kei ka nih,"Tiin LALPA chun a hril.

---

←  Isaiah (54/66)  →