←  Isaiah (5/66)  →
1. Ka grep huon duot chungchang thu,Hlain ka'n zawt ding a nih:Tlang pang hnuoi thatna hmunah,Ka hmangaiin grep huon a nei a.
2. Lung a'n thiel a, khur a cho a,Grep tha tak chi a phun a;Vengbuk insang a bawl a,Grep sawrna ding khur a cho a.A ra thlum tak lo hun a nghak a,Sienkhom grep suok a lo ni si!
3. Nangni Jerusalem mi le,Judai rama chenghai hin,Ka grep huon le kan chungthu hi,Tuhin mi relpek ro khai.
4. Ka huona ka thaw ta po bak kha,Thaw dan ding chuong iem a um a? Grep tha ka beisei zing laiin,Ieng leia a puopa ngotin a ra?
5. Huon chunga ka thaw dan ding chu,Tuhin mi lo ngaithlapek hram ro.A'n zamnahai thiek ka ta,A daihai thiek bok ka ta,Mi pal sopin hung um a tih.
6. Ka grep huon chu sukram ka ta,Tu khomin thum ta naw ni a,A hnuoi cho phit ni ta nawng a ta,Hling le buorin bawm lem an ta,A chunga ruo insurtir lo dingin,Sumhai khom thu pe bok ka tih.
7. Iengkim LALPA grep huon chu,Israel sungkuo hi an na,Judahai hi a huon mawitu an na,An lakah rorelna fel a beisei a,Thisen insuona ngot a hmu a,Felna hmu a'n beisei laiin,Beidong khek ri a hriet lem si.
8. Ram laili lai tak hluo a,In dang inchaw sap pei a,Lohai khom zauh sap pei a,Mi dang hmun inchan lo a,Makhata pumbiltu chu,A chung a va pik ngei de!
9. Iengkim LALPA chun ka hrietah,Hieng ang hin thu a hril a:"A in ropui tak el chu,Rausanin um ngei a ta,In ropui le mawihai chun,Hluotu ding hrim nei naw nih.
10. Grep huon pari nga velah,Uoiin litar sawmhni chauh,Thlai chi tin sawm tunaah,Tin khat chauh inthar an tih" tiin.
11. Zu dawn ding ringot hnot a,Zing inhma taka tho hlak,Uoiin inrui hma khat a,Zan sawt tak tak meng hlak chu,An chung a va pik de aw!
12. Ruoi an kilna hmuna chun,Tingtang, perkhuong le khuongte,Theihle le uoiin an nei a,Sienkhom LALPA thilthawhai chu,An ngaisak hrim hrim naw a,A kut suok thilhai khom chu,An ngaituo chuong ngai bok nawh.
13. Hriet thiemna an tlaksam leiin,Ka mihai chu salah intang an ta,An mi lienhai chu phingtamin,An mipuihai chu dangcharin,An la thi tawl ding a nih.
14. Seol phing a suktam zuol a,Inkhi ruol loa lienin,A bau chu a ka huou a,An mi ropuihai le mipuihai,Inrui puom le hlimhlop chenhai,Chu chun lut thla diel an tih.
15. Chu ni a hung tlung pha chun,Mihai chu thum hnuoi a ta,Mihriemhai suktlawm a ta,Chapo meng insanghai khom,Sukhnuoiin um tang an tih.
16. Sienkhom Iengkim LALPA chu,A'n diknain chawisang a ta,Pathien thienghlim chu a felnain,A thienghlimzie inlangtir a tih.
17. Chu pha chun beramhai chu,An tlatna hmunah tla nawk an ta,Hausahai rausan hmuna chun,Beramte ruolin tuolchai an tih.
18. Inhlemna hruola suol hnuktu,Tawlailir anga ritlona hmangtu chu,An chung a va pik de aw!
19. "Ei hmu ve theina dingin,Pathien chun thaw inhmaw sien,Ama chun mi hung hnaiin,Ei hriet ve theina dingin,Israelhai Mi Thienghlim chun,A remruot intlungtir raw se"Tituhai chung chu a va pik ngei!
20. Thil tha lo thil tha ti a,Thil tha thil tha lo titu dam,Thim chu vara ngai tlattu,Var chu thima ngaitu dam,Khakna thlumnaa ngai a,Thlumna khaknaa ngaitu chu,An chung a va pik de aw!
21. Mani ngaia vara insietu,Mani mithmua thiema inngai chu,A chung a va hang pik de aw!
22. Uoiin dawna mi hnebantuhai,Zu pol thiema mi chungchuonghai,
23. Thamna an fak ruk leia,Mi suol thiem inchangtir a,Mi fel thiem naw inchangtirtuhai,An chung a va hang pik de aw!
24. Meiin bu pawl a kang ang le,Hlo tawl a kang ral angin,An zunghai hung hmon a ta,An parhai chu pilvut angin,Len hmangin la um a tih,Iengkim LALPA dan hnawl a,Israel Mi Thienghlim thu an hnawl leiin.
25. Chuleiin, LALPA lungsenna chu,A mihai chungah a chok a,A kut hlangin a vuok a,Tlanghai an inthin dur dur a,Kotthlera hmunhnok ang elin,Ruong an inthal rem rum a.Chuong khom chun a lungsenna,A la lak kir chuong naw a,A kut khom a la hlang zing.
26. Hla taka um hnamhai kuomah,Inhriettirna thon suok a ta,Kawl kil tawpa um hnamhai chu,Faifukin ko khawm a ta,Inrang takin hung nghal an tih.
27. Tu khom chauin tlu naw ni a,In innghil bok naw ni a,An kawng inthep naw ni a,An pheikhok se bok naw nih.
28. An thal zumhai a ngei a,An thalngul kuoi sa a na,An sakor tinhai khom chu,Lungthir angin a chang a,An tawlailir ke invir khom,Thawngaleivir ang a nih.
29. Keipui angin an inrum a,Sakeibaknei vanglai angin,An sa se an inngur khum a,Tu khomin san ngam loin,An sa se chu an fen hmang.
30. Chu ni chun tuifinriet inrum angin,Anni chun inrum khum an ta,Mihan ram hang thlir an ta,Thimna le beidongna naw chu,Thil dang hmu nei naw ni a,Var khom sumin hlieng a tih.
←  Isaiah (5/66)  →