←  Isaiah (46/66)  →

---

1.

An pathien Bel le Nebou hai chu,An va tlawm ta rong rong de!Sabengtung ruolin an phur a,Milemhai chu an rik leiin,A phurtu ran khom an sawl hle.

2.

Phurtuhai le an thil phurhan,Inkhup lupin hnuoi tieng an en.A betuhan an hum thei naw a,An biekhan an hum thei bok naw a,An pahnin salah an thuoi diel a.

3.

Aw, nangni Jakob sungkuo,Israel sungkuo la um sunhai,Ka thu hi lo ngaithla ro.Sula inthoka tungdingtu cheu,In pienga keitleitu cheu ka nih.

4.

Tar kun lu tuok in ni chenin,Keima, keima ngei el hi,Nangni tungdingtu ni zing ka tih.Ka siem cheu a, pom ka ti cheu,Tungdingin san suok ka ti cheu.

5.

A tu le am mi tekhiin,Tu am ka tlukpuiah in sie?Tu am ka ang nia hrein,Tu le'm in mi tekhi ding?

6.

Thenkhatin an ipa inthokin,Rangkachak an bun suok a,An tangkaruo an buk suok a,Thil ser thiemhai an ruoi a,Pathien lem an insungtir a, Kunin chibai an buk a.

7.

Liengkoah an inchuon a,A hmunah an inthut a,Chu chun che son thei loin,Milem chu a ngir zing a,An ko khomin a don nawh;An buoiin a san thei bok nawh.

8.

Nangni lungril helhmanghai,Chu chu hre zinga ngaituoin,In lungrilah vong zing ro.

9.

Tiena tlanga thil tlung tah,Thil um dan kha hre zing ro.Keima hi Pathien chu ka nih,Keima naw tu khom an um nawh.Keima hi Pathien chu ka nih,Keima ang tu khom an um nawh.

10.

Kei chun a tawp dan dinghai,Atira inthokin ka'n hriettir a,Thil la hung tlung dinghai khom,Tiena inthokin ka hriet vong.Ka tum chu dingchang a ta,Ka nuom angin thawng ka tih.

11.

Khawsak tienga inthokin,Vate hnukrawl ko ka ta,Ram hla taka inthokin,Ka mi ruot chu ko ka tih,Ka thil tum hlentu dingin.Ka hril angin thawng ka ta,Ka tum angin hlen ka tih.

12.

Nangni lungril ngar le khauh,Felna le inkarkikhai,Ka thu hi lo ngaithla ro.

13.

Tu hin hun sawt riel loin,Ka sandamna hung hnai a ta,Zion chu san suok ka ta,Israel sukropui ka tih.

---

←  Isaiah (46/66)  →