Isaiah (45/66)  

1. A hmaa hnamhai tukdol a,Lalhai ralthuom hlippek a,An kul kotkharhai nor hong a,Khar ta loa inumtirtu dingaA mi thlang le a kut a sukhrat,Kura chungthua LALPA hril chu:
2. Kei i hmaah feng ka ta,Tlanghai rawt cham vong ka ta,Dar kotkharhai suksieng ka ta,A kalna thir tluonhai sukbong ka tih.
3. Kei hi LALPA, Israelhai PathienI hming ngeia kotu che chu,Ka nizie i hriet theina dingin,Pindan rila an rohlu sie khawl,An thup rukhai chu peng ka ti che.
4. Ka siehlaw Jakob thlahai leKa thlang Israelhai leiin,Hming suot meuin ka ko che a,I mi hriet ngai nawa chu,Hming inzaum ka pek che.
5. Keima hi LALPA chu ka nih,Tu dang khom an um nawh,Keima naw Pathien dang an um nawh.I mi hriet ngai nawa chu,Ka sukhrat ding che a nih,
6. Khawsak a'nthok khawthlang chenin,Keima naw chu Pathien dang hrim,An um nawh ti mihaiin,An hung hriet theina dingin,Keima naw Pathien dang an um nawh.
7. Var ka siem, thim ka siem bok,Malsawmna petu ka na,Sietna intluntu ka ni bok a,Keima, LALPA ngei el chun,Chuong thil chu ka thaw a nih.
8. Aw nangni chung van sanghai,elna hung insurtir unla,Sum kha hung te thla raw se.Hnuoi khom lo inhong lien sien,Sandamna le felna chu,A ruolin hung to raw se.Chuong thil inumtirtu chu,Kei, LALPA ngei el hi ka nih.
9. Siemtu inkhingpuitu chu,A chung a va hang pik ngei de!Chu mi chu belhemtu dehawn,Bel koi har ang chauh a nih.Bel chun a hemtu kuomah,'Iem a na i siem kha?' tiin,A'n don hlak hrim am a ni?I thilsiem khan i kuomah,'I mi siem ka ni teu nawh'A ti hlak hrim am a ni?
10. Mani nu le pa kuomah,'Iengti leia hieng anga,In mi nei hrim hrim am a na?'Titu chung chu a pik ie!
11. Israelhai Mi Thienghlim,Anni Siemtu LALPA chun,Thil la um ding chungchang thu,Hieng ang hin a hril a nih:Ka thilthaw in soisel maw?Ka thaw dan dinghai chenin,Thu in mi pek hlaka maw?
12. Kei hi hnuoi siemtu ka na,Mihriem khom ka siem a nih.Ka kutin van ka kei phar a,Van lengruolhai po po khi,Ka thu hnuoia um an nih.
13. Ka felnan Kura chawm ka ta,A lampui sukngilpek ka tih.Sum le lawmman beisei loin,Ka khawpui indin nawk a ta,Ka saltanghai insuong a tih,Iengkim LALPA chun a tih.
14. LALPA chun hi hi a hril:'Aigupta mihai, Ethiopia mihai,Mi dung sei Seba mihai chu,I thu hnuoiah sie vong ka ta,An ram thil nei po po lehI hmaah hung tlu lut an ta,I ta hung ni vong a tih. Thir khaidieta thlung khawmin,Zui dul dul an ti che a,I hmaah dingthathuonin,'Pathien i kuomah a um,Ama chauh Pathien a nih'Tiin chibai buk an ti che.
15. Israelhai Sandamtu Pathien chu,Pathien inthup hlak i lo ni ngei el!
16. Milem siemtuhai po po chun,Inzakna la tuok an ta,Muolpho takin liem hmang an tih.
17. Israelhai ruok chu LALPAN,A chatuon sandamnain,Kumkhuoin sandam a tih.Inzak le muolpho takin,Kumkhuoin siem ngai naw nih.
18. LALPA chu Pathien a na,Vanhai siemtu Pathien a na,Leihnuoi hi chengna dinga,A ruoka sie ding ni loa,Indintu chu ama a na,Ama chun hieng hin a hril:"Keima hi LALPA chu ka na,Keima naw tu khom an um nawh.
19. Hmun inthima inthokin,A rukin thu ka hril ngai nawh.Jakob thlahai kuoma khom,'Mi zong thlawn ro'Tiin ka hril ngai der nawh.Kei, LALPA hin thutak ka hril a,Thu indik tak ka puong hlak.
20. Inko khawm unla, hung ro.Hnam tina mi saltanghai,Inko khawmin hung hnai ro.Thing milem zawntuhai le,Mi sandam thei hlei lo milem,Pathiena betuhai chun,Hrietna an tlasam a nih.
21. Inrawn khawm tawl unla,Milem biek hlawk inti dan,Mi hang hril reng reng ta u.Hieng ka thu inhriettirhai hi,Tiena tlanga inthok khan,Tuin am an hril ta hlak a?Kei, LALPA hi ka ni naw maw?Kei naw Pathien an um nawh,Pathien fel le sandamtu,Kei naw tu khom an um nawh.
22. Khawvel kil tina chenghai,Ka kuom tieng hung kir unla,Keiin lo sandam ka ti cheu.Kei hi Pathien chu ka na,Kei naw tu khom an um nawh.
23. Keima salin ka'n kham a,Ka bau suok thu a'n dik a,Ka thu ka lak kir ngai nawh.Ka hmaah hnam tinrenghai,Kunin la bokkhup an ta,Ka hmaah lei tinrengin,Ka hming salin inkham an tih.
24. Indikna le hratna chu,LALPA-a chauh a um' tiin,Mihaiin la hril an ta,A chunga lungsenhai chu,Muolpho takin la um an tih.
25. Israel thlahai po po chu,LALPA-ah thiem chang an ta,Ama chu chawisang an tih" tiin.Babulon pathienhai

  Isaiah (45/66)