←  Isaiah (44/66)  →
1. "Aw ka siehlaw Jakob thlahai,Aw, ka mi thlang Israelhai,Tu hin ka thu hi lo ngaithla ro.
2. Sula inthoka indintu cheu,Nangni thangpuitu LALPA chun,Hieng thu hi a hril a nih:Aw ka siehlaw Jakob thlahai,Ka thlang Jesurunhai,t ti naw ro.
3. Ram tawlah tui buok ka ta,Hnuoi charah vadung inluongtir ka ta,I suonhai chungah ka Thlarau buokin,I tu le tehai malsawm ka tih.
4. Phul zawla hlobet hring dup leTui luongna bula phahram angin,Hung inthang tuol tuol an tih.
5. Pakhatin, 'LALPA ta ka nih' ting a ta,Mi dangin Jakob hming chu put a ta,Mi dang nawk chun a kutah,'LALPA ta ka nih' tiin ziek a ta,Israel hming chu hnam hmingah,Hung hmang tang a tih" tiin.
6. Lalpa, Israelhai Lal le Tlantu,Iengkim LALPA chun a hril:A hmasatak le nuhnung tak ka nih;Keima naw Pathien dang an um nawh.
7. Tu am a na, keima hril angaThil tlung ding hril lawk theitu chu?An thei chun puonghai sien la,An thawtheizie suklang raw hai se.Tiena inthoka ka thaw hlak angin,Thil tlung ding le hung um dinghai,Hung hril lawk ve raw hai se.
8. Zam naw ro, ti bok naw ro.Tiena inthok khan hieng thil hi,Hrilin ka'n hriettir cheu an naw maw?Nangni hi ka thu hretuhai in nih.Keima naw Pathien dang an um maw?An um nawh, Lungpui dang hrim,Pakhat khom an um ka hriet nawh"
9. Milem siemtuhai chu an rengin mi hmang lo an ni a, an thil ngaihlut zawnghai chu thathnempui tlak a ni naw a, an milemhaiin an hmu thei nawzie le hriet thei nawzie hrepuitu khom anni ngei an nih. Chuleiin, la muolpho an tih.
10. Tuin am pathien lem indinin, tangkaina nei lo milem chu a sung ding a na?
11. Ngai ta u, milem betuhai po po le milem siemtu, pathien siem theia inngaihai, mihriem ve el ni sihai chu LALPA hmaah an rengin ti tak le muolpho takin la ngir an tih.
12. Thirsu chun milem a sut a, meilingah a rol lut a, tuboin a sut a, a ban tha hrat chun a vuok den a, a ser a. A phing a hung tam a, a tha a hung zoi a, tui hrim hrim a dawn naw chun a hung chau hlak.
13. Mistiri chun inkhina hruiin thingtum chu a'n khi, a ruongam ding pensilin a'n chik a, haver le thing nawtna hmangin a mawi thei dan ang takin mihriem lim a ker a, tempula inthut dingin a siem a.
14. Sidar thing dam, inse thing dam, saisuo thing dam a phur a, a hung chang theina dingin ram hnuoiah a sie tawl phot a. Sidar thing a phun a, ruotuiin a hung chawm lien a.
15. Thinga ti thei a ni pha chun a then meia ti dingin a lak a, mei a sem a, a awi a, bei dam siemin a ur a. A thing lak a thena inthokin pathien lem a siem a, a biek a, a milem ker hmaa ngei chun a bokkhup a.
16. Thing zatve chu meiah a ti a, sa a raw a, a fak a, a khop a. Mei chu awiin, 'Tuhin chu ka lum tawk tah. Mei awi chu a manhla ie" a ta.
17. Meia a ti bang po chun pathien a siem a, a hmaah a kun a, a biek a; a kuoma chun tongtaiin, "Mi sanhim rawh, ka pathien i ni si" a ti hlak.
18. An hriet naw a, an man phak nawh. An hmu thei nawna dingin an mit a'n del tlat a, an hriet thiem thei nawna dingin an lungril mit a'n del sa bok a.
19. "A zatve meiah ka ti a, meilingah bei ka hlieu hmin a, sa ka em a, ka fak a. A dang po hi thil tirdakumah siemin, thing tum hmaah ka kun el ding am a ni?" hang ti nachang hre dingin hriet thiem theina an nei si nawh.
20. An lungril dawi veta a um leia fe suol le vut bar an ni tlat leiin, "Ka chang tienga ka chawi hi inhlemna thil meimei a ni naw maw?" tia hang intal suok nachang an hriet hrim hrim nawh.
21. Hieng hi hre ro, Jakob thlahai,Israelhai khomin hre zing ro,Ka siehlaw in ni si a.Ka'n din cheu a, ka siehlawhai in nih,Israelhai, theinghil naw ning cheu.
22. In bawsietnahai chu sum angin,ka lak kiengpek ta cheu a,In suolnahai khom tieusum angin,Ka lak kiengpek vong ta cheu.Ka kuom tieng hung kir ta ro,Ka'n tlan suok ta si cheu a.
23. Aw vanhai, hlimin khek ro,LALPAN a thaw ta si a;Piellei thuo riet khom hlimin,Inring takin khek raw se.Aw tlanghai, hlimin khek ro,Rampui le thing tinreng khomin;LALPAN Jakob thlahai chuA hung intlan suok ta a,Israelhai lai a'n chawimawi.
24. Sula inthoka indintu che,Nangma intlantu LALPA chun,"Kei hi iengkim siemtu LALPA,ani chaua van kei phartu,Hnuoi phek zartu chu ka nih.
25. Zawlnei khelhliphai hril lawkhai,Suktloltu chu kei ka na,Aisan thiemhai inveta siemtu,Mi varhai khom sukvet a,Thurawn indik lo inpektirtu;
26. A siehlaw thu suknghet a,A mi tirhai thu hlenpek a,Jerusalem chungchang thua,"Hluoin la um nawk a tih" titu le,Judai ram khuohai chungthua,'Indin thatin um nawk a ta,A sietna lai siem nawk ka tih' titu,
27. Lipui ril kuoma, "Kang rawh,Vadunghai sukkang ka tih" titu,
28. Kura khom, "Ka berampu a nih,Ka tum angin hlen a tih" titu,Jerusalem chungthua, "Indin tharin um nawk a tih" titu,Tempul chungthua,"I lungphum remin um nawk a tih'Titu ngei chu ka nih" tiin.
←  Isaiah (44/66)  →