←  Isaiah (43/66)  →
1. LALPA chun hieng hin a tih:"Jakob, nang hi ka siem che a,Israel, keima indin suok i nih.lTi naw, nangma intlantu ka nih;I hming lamin ka ko che a,Ka ta i nih.
2. Tui inthuk i pal laiin,I kuomah um zing ka ta,Vadung i pal kai laiin,Tuiin chim pil naw ni che;Meipui i hraw tlang laiin,Meiin hlieu na naw ni che.
3. LALPA i Pathien ka na,Israelhai Mi Thienghlim,Nangma Sandamtu ka nih.Nangma intlanna dingin, Aigupta ram ka pek a,Nangma ka thlengna aiah,Ethiopia le Seba ka pek.
4. Ka ngaihlu em em che a,Ngaisanga ka hmangai che leiin,I aiah mi dang pe suok ka ta,I hringna aiah mi dang tam tak.
5. Ti naw rawh, i kuomah ka um;I thlahai chu khawsak a'nthokin,Keiin hung thuoi khawm ka ta,Khawthlanga inthok khomin,Ka hung thuoi khawm ding a nih.
6. Hmar tieng kuoma chun keiin,Hung inthla di'n hril ka ta,Chuong ang chun sim tieng kuomah,Chel tang lo din hril ka tih:Ram hla taka inthokin,Ka naupahai hung thuoi la,Kawl kil tawpa inthokin,Ka naunuhai hung thuoi rawh.
7. Ka hming puttu taphothai chu,Ka ropuina inlangtirtu dinga,Indina ka siem an nih, tiin.
8. Mit nei si, indel tlat si,Na nei si, set tlat bok sihai chu,Hung thuoi khawm tawl ro.
9. Hnam tinreng thuoi suok unla,Mi tin um khawm raw hai se.Thil hung tlung ding hril lawk thei,Thil tlung ta sahai hril thei bok,An milem lai an um a ni?An indikzie hrietna dingin,Hrepuitu hung thuoi raw hai se.Chuongchun, mihaiin chu chu hre a,"A'n dik" an ti theina dingin.
10. LALPA chun hieng hin a tih:"Aw nangni Israelhai,Ka thu hretu, ka siehlaw in nih.Kei chauh hi Pathien ka nizieHre a, ring a, hre thiem dingin,Nangni ka thlang cheu a nih.Ka um hmaa um Pathien,Ka um hnunga um Pathien,Tu khom an um ngai der nawh.
11. Kei chauh hi LALPA chu ka nih,Kei chauh hi Sandamtu chu ka nih.
12. Keima ngeiin ka hril cheu a,Sandamtu chu kei ngei ka nizie,Keiman ka'n hriettir cheu a,Kei anga thaw hnam dang pathien,Tu khom an um ngai hrim hrim nawh.Kei chauh hi Pathien ka nih,Ka thu hrepuituhai in nih,Tiin LALPA chun a puong.
13. A nih, chatuona inthok chatuonin,Kei hi Pathien chu ka nih.Ka kuta inthoka inchu thla thei,Tu khom an um hrim hrim nawh.Ka thaw tah chu tu am sut thei?" tiin.
14. Nangma Tlantu, Israel Mi Thienghlim,LALPA chun hieng hin a hril:"Nangni leiin Babulon runtu ding,Sipai ruol ka tir ding a nih.Kaldaihai chu mi tlan hmang angin,An uongpui hlak an long lien chun,Ka hung thuoi tawl ding a nih.
15. Kei hi LALPA, in Mi Thienghlim,Israelhai Siemtu, in Lal chu ka nih.
16. LALPA chun hieng hin a hril:Tuipuia lampui relpektu ka nih,Tui fawn laia lampui sieltu chu;
17. Sipai ruol tam tak ko suok a,An tawlailirhai le sakorhai thuoi a,Tho nawk ta lo dinga sukpiltu leKhawnvar phita anga hmet mittu chu.
18. Tuta hma thilhai kha theinghilin,Tien lai thil kha ngaituo ta naw ro.
19. Ngai ro, thil thar ka thaw mek a,Chu chu a hung tlung tep a nih.In man fuk thei naw a ni maw?Thlalerah lampui ka siem mek a,Ram tawlah vadung luong a tih.
20. Ka mi thlanghai dawn dinga,Tuihnara thlaler ka chawm pha,Ram tawla tui ka'n luongtir leiin,Ram saha'n mi chawimawi an tih,Sihal le simbu hai chen khomin.
21. Ka ta dinga ka siem an na,An mi la chawimawi ding a nih.
22. Nisienlakhom aw Jakob,Nangin i mi ko ta naw a,Aw ka mi Israelhai,In mi nghok ta lem a nih.
23. Pumraw thilhlan beramhai,In mi hung chawipek ta naw a,Inthawinahai hung inhlanin,In mi chawimawi ta bok nawh.Bu le bal le rimtuihai,Inhlana inthawi dingin,Ka phut ngai hlak bok naw cheu.
24. Ka ta dingin mafu rimtui,In hung chawi ta ngai naw a;Inthawina ran thau inhlanin,In mi hung suktlai ta bok nawh.In suolna hin a mi ngei a,In bawsietnahai ka khop tah.
25. Keima hi, keima ngei hi,Keima le keima zar lei chauaIn bawsietnahai thai bo a,In suolhai theinghiltu ka nih.
26. Hun liem tah suikir unla,Poi in tawk le tawk naw hril unla,Hang ngaituo tlang ei tiu khai.
27. In thlatu bul khan thil suol a thaw a,In thuoituhan ka dan an bawsiet a.
28. Chuleiin, in tempula hotuhai chu,Muolpho takin siem tawl ka ta,Jakob thlahai chu sietin nel a ta,Mi nuizatbur hung inchang an tih.
←  Isaiah (43/66)  →