Isaiah (42/66)  

1. En ta, ka siehlaw, ka cheltlat,Ka mi thlang le ka lawmna hi;A chungah ka Thlarau ka buok a,Ama chun hnamhair chungah,Indik takin ro rel a tih.
2. Khekin rau khawng naw ni a,Vantlang hmaah rawl ki insang,Hmang ngai hrim hrim bok naw nih.
3. Hrat nawhai pal zut naw ni a,An beisei sukthlawn naw ni a,sThudik tanin ro rel a tih.
4. Hnuoi chungah rorelna indik,A'n din hma khat chawl naw ni a,A lung hnuolin beidong naw nih.A dan thu chu thlierkar tinhai,Beisei innghatna ni zing a tih.
5. Van inumtira kei phar duoitu,Hnuoi le a sunga umhai indintu,Hringna thuok le thlarau petu,LALPA chun hieng hin a tih:
6. "Kei hi LALPA chu ka nih.Indik taka ro rel dingin,Nang hi ka ko suok che a,Kuta chelin hum ka ti che.Hnam tin ta dinga thuthlung le,Jentelhai el var ding dam,
7. Mitdelhai mit sukvar ding dam,Ripa intang le thima thunghai,Insuoa thuoi suok ding damin,Nang hi ka ruot che a nih.
8. Kei hi LALPA chu ka nih,Chu ngei chu ka hming a nih.Tu khomin ka ropuina,An mi'n tawmpui thei naw a,Chawimawia an mi'n pakna khom,Milem ka'n tawmpui thei nawh.
9. Ngai ta u, hril lawka umhai kha,A hung tlung kim tawl ta a,Tu hin thu thar ka puong a,Chu chu a hung tlung hmain,In kuomah ka puong a nih.
10. LALPA chu hla thar rempekin,Kawl kil tawp chenin sak ro,Tuipuia inzin le a sunga umhai,Thlierkara chenghai khomin,LALPA inpakin zai hla rem ro.
11. Thlaler le a sunga khuohan,An hla chu lo zawm ve unla,Kedara khuohai chu hlim sien,Sela mihan lawm hla rem sien,Tlang sip a'nthokin khek raw hai se.
12. Tuipui kama thlierkarhai chun,LALPA chu chawimawi hai sien,'n pakna hla sak raw hai se.
13. Indonaa mi hrat khawkheng,Lungsena inthok suok angin,LALPA a hung inthok suok a,Mi ralhrang anga inseruin,A hmelmahai tukdol dingin,Inring takin a khek suok
14. "Sawt tak el ka to zing a,Insumin ka'n kei dei a;Tuhin nuhmei nau hase angin,Inrumin ka khek suok a,Ka'n thuok hlop hlop el a nih.
15. Tlang le muolhai sukram ka ta,Hna hringhai suktawl ka ta,Vadunghai khawmuolah siemin,Dilhai khom sukkang ka tih.
16. An hraw ngai lo lam tharahMitdelhai chu thuoi ka ta,An hriet lo lampuiah thuoi ka tih.An hma zawna inthimna chu,Varah inchangtir ka ta,An lam hraw ding sukruol ka tih.Chuong ang tak chun thawng ka ta,Anni chu thlathlam naw ning.
17. Sienkhom milemhai ringsana,'Kan pathienhai in nih' titu chu,Inzakin inkirtir ka tih.
18. "Aw nasethai, lo ngaithla ro, Aw mitdelhai, enin hmu ta ro!
19. Ka siehlaw naw, tu am mitdel?Ka tirko naw, tu am naset? LALPA siehlaw le thlang ang hrima,Mitdel hi tu'm an um a?
20. Thil tam tak a hmu ta a,Sienkhom, a uksak si nawh.A na a daw ve ngeia chu,Ieng khom a hriet der si nawh."
21. A'n dikzie suklangtu dinga,A Dan chawimawi le sukropui hi,LALPA lawm zawng tak a nih.
22. Sienkhom hi mihai ruok hi chu,Mi rok le suomin an um a,Mihai tlakkhurah an tla a,Tang inah an intang a,Suom le rok takah an thang a,San suoktu ding an nei naw a,"Kir ta ro" ti ding an um nawh.
23. Chuong thila chun nangni lai,Hun la hung tlung dinga khom,Tu am ngaithlaa bengkhon cheu?
24. Tuin am suomhmang kutah,Jakob thlahai a pek suok a?Tuin am roktuhai kutah,Israelhai a'n hlan a na?Ei suol hmangsan LALPA ngei chu,A pe suoktu a ni naw maw?A lampui an zui nuom naw a,A dan an zawm nuom bok nawh.
25. Chuleiin a lungsenna chu,An chungah a bun thlak a,Indona a hung intlungtir a,Chu meichok chun a tuom vel a,Chu chun anni chu a kang a,Sienkhom an bengkhon chuong nawh.

  Isaiah (42/66)