Isaiah (41/66)  

1. "Aw nangni thlierkar tinhai,To tok tokin mi ngaithla ro.Hnam tinin tha thar insuoin,Ka rorelna hmaah hungin,In chungthu hung hril unla,Hang inhmu tlang ei tiu khai.
2. "Khawsak tienga mi pakhat,Felna leia rongbawla a ko,Sir tina hnena changtu hi,Tuin am a ko suok a na?A kutah hnamhai a pek a,A hmaa lalhai a tukdol a,A kawlhnam chun pilvut angin,A thal chun bu si inleng angin,Anni chu a'n changtir a.
3. Kea a la sir lo ram chenin,Anni chu a hnot thlur a,Him takin hma a tawn pei a.
4. Hieng hi thaw a, inhlentirtu,Mihriemhai um dan ding rel a,Suon peihai ko suoktu chu,KEIMA, LALPA ngei ka na,Kei hi a bul le tawp ka nih."
5. Thlierkarhan hmuin an ti a,Kawl kil chenin an inthin a,Hung panin an hung hnai a.
6. "Hrat takin um rawh" tiin,Mi tin an inthangpui tuo a,An unauhai an infui phur a.
7. Thil ser le sung thiem mi chun,Rangkachak sungtu a'n fui phur a,An milem siem vaw namtu chun,Thirsu chu a'n fui phur a,Thir chartu kuomah "A tha ie" a ta,Mi lem chu tlu lo dingin,A char a, a kil nghet a.
8. "Nang chu aw ka siehlaw Israel,Ka mi thlang Jakob nauhai,Ka ruolpa Abraham thla in nih.
9. Ka rong in bawl theina dingin,Hnuoi tawpa inthoka thuoi suokin,Pei thla loin ka thlang cheu hi.
10. Ti naw ro, kei in kuomah ka um,Chi-ai naw ro, kei in Pathien ka ni si. Sukhratin thangpui ka ti cheu a,Ka felna kutin tungding ka ti cheu.
11. "Nangni theidatuhai chu,Muolpho takin um an ta,Nangni khingtuhai po po chu,Iengma loin bohmang an tih.
12. In hmelmahai zong inla khom,Tu khom hmu zo ta naw ti niu.Nangni hung dotuhai po chu,Iengma lo inchang an tih.
13. In kut chang tiengah chela,'Ti naw, thangpui ka ti cheu'Titu LALPA in Pathien ka nih.
14. Aw Israel, mi hmusit ni la khom,Ti naw rawh, thangpui ka ti che"Tiin nangni intlantu LALPA, Israel Mi Thienghlim chun a hril.
15. "Bu chilna khawl thar tha tak,Ha nei chi angin siem ka ti che a,Tlanghai chu chil dar i ta,Muolhai chu bu si angin siem i tih.
16. Hang zap in ta, thliin len a ta,Thawngaleivirin fen hmang a tih.Chuongchun LALPA-ah lawm in ta,Israel Mi Thienghlim ropui a tih.
17. "Retheihai le tlasamhaiin,Tui an zong a, an hmu naw a,An dangcharin a'n hil a nih.Kei, LALPA chun ngaisak ka ta,Kei, Israel Pathien ngei chun,Anni chu maksan naw ning.
18. Tlang chara inthok khomin,Vadung inluongtir ka ta,Ruomah tui hnar suok a taThlaler chu dilah siem ka tih,Ram char khom tuihnar hmunah.
19. Sidar thing le sitim thing dam,Inhmui le oliv thing dam,Far thing chi hrang hranghai lehThlalera chun phun ka ta;
20. Chu chu miha'n hmung an ta,LALPA kutin chuong po po chu,A thaw a niziehai ngaituoin,Israel Mi Thienghlimin a'n umtir,A nizie hung hre tang an tih.
21. "In thu hung put lut unla,In thiemthu hung hril ro khai"LALPA, Israelhai lal chun a tih.
22. "In milemhai hung chawi unla,Thil tlung ding hril lawk unla,Thil tlung ta sa hril bok unla,Chu chu lo ngaituong kan ta,Thu tawpna hre thei ei tih.Chuong an naw leh thil tlung ding,Iemani bek hung hril ro khai.
23. Thil tlung ding hril lawk unla,Pathien in ni am lo hrieng kan tih.Maktia kan inthin hawpna dingin,A tha a sie iemani bek thaw ro.
24. Sienkhom ieng khom ni lo a,Hmangna bo der in lo ni chun,A thlangtu cheu chu tirdak a um.
25. "Khawsaka inthokin mi ka ko a,Ama chun ka hming lam a tih;Hmar tienga inthokin hung a ta,Ama chun roreltuhai chu,Bu rawt lung angin rawt a ta,Belhemtun bepil a sir hriel angin,Anni chu sir hriel a tih.
26. Ei hriet lawk theina dingin,Tu'n am a tir khan a lo hril hlak?"Hi hi a'n dik" ei ti theina dingin,Tu'n am a mi lo hril lawk hlak?Tu khomin an hril ngai naw a,Tu khomin an hril lawk naw a,In thu hrie an um der nawh.
27. Keiin Jerusalem kuomah,"En tu, in mihai an hung saw" tiin,Chanchin lawmum tlung ding chu,Ka lo hril lawk a ni kha.
28. Milemhai ka en vel a,Thurawn pe thei an um naw a,Ka zawna an don thei bok nawh.
29. En ro, milem vong an ni hi!Ieng khom thaw thei an nei nawh;An milem sunghai po po hi,Buoina thli ang chauh an nih.

  Isaiah (41/66)