←  Isaiah (38/66)  →
1. Chuong hun lai chun Hezekia chu thi ngamin a na a. Chun, Amoz naupa zawlnei Isai chun a hung kan a, a kuomah, "LALPA chun hieng hin a tih: 'Dam suok loin i thi ding a na, i sungkuo um dan ding rel fel rawh' a tih" a ta.
2. Hezekia chu bang tieng a ngha a, LALPA kuomah,
3. "Aw LALPA, i hmaah ringum tak le inpe fai thakin kal ka chawi hlakzie le i mithmua thil tha ka thaw hlakzie kha mi hrepek hram rawh" tiin a tongtai a. Hezekia chu namen loin a tap a.
4. Chun, LALPA thu chu Isai kuomah a hung tlung a,
5. "Kir nawk la, Hezekia kuomah hieng hin hril rawh: 'LALPA, i pu Davida Pathien chun hieng hin a tih: I tongtaina kha ka lo hriet a, i mitthli tlak khom ka hmu bok.
6. Ngai ta, i dam sung kum khom kum sawm le kum ngain suksei ka ta, nang le hi khawpui hi Asuria lal lakah san him ka ta, khawpui hi huol him bok ka tih.
7. "Chun, LALPAN a thutiem a hlen ngei dingzie inchikna chu hi hi ning a tih:
8. nisa hlim chu sirbi sawm chen, lal Ahaz-in darkar inher chin inkhina dinga sirbi a bawl chen intawl kir a tih" a ta, chuongchun nisa tla ta hnung chu sirbi sawmin an tawl kirtir nawk a.
9. Judai ram lal Hezekia damnaw hung dam nawk chun hieng hin lekha a ziek a:
10. Hieng ang hin ka lo ti a:"Ka hringnun vanglai tak hin,Thlan muol ka liem el ding maw?Ka nun hmang zo hman loin,Lakpekin ka um ding maw?
11. Hringmi lengna rama hin,LALPA hmel hmu ta loin,Hringmi tu khom hmu ta loin,Hringmi khawvela chenghai lai,Ka um ta naw el ding a na maw!
12. Berampuhai puon in angin,Ka hringnun puon in chu thiekin,A lak hmang el ta si a.Puonkhawngtu puonkol angin, Ka nunkol chu a zuol a,Puonkol a'nthok mi tan thlain,Sun le zan a mi suklungdong.
13. Zan khawvarin ka nghak a,Sienkhom sakeibaknei ang elin,Ka ru le chang a pot nawi a,Sun le zan a mi suklungdong.
14. Vamur le kanghlai angin,Inhramin ka kiu vel a,Zingkar vathu ang elin,Inrumin ka'n kuk bok a.Van tieng ka thlirna leiin,Ka mithai a'n thim zo tah.Aw LALPA mi hung san rawhKa bei a dong a ni hih," tiin.
15. Iengtin am hril tang ka ta?Ama chun a mi biek a,Hi natna hi ama hung tir a ni si!Ka lungzingnahai lei chun,Ka dam sung la um poah,Fimkhur takin kal chawi ka tih.
16. LALPA, chuong thilhaia chun,Mihan damna an hmu hlak a;Ka thlarau khomin damna a hmu a,Chuleia mi sukdam nawkin,I mi'n hringtir nawk a ni hi.
17. Lungzingna ka lo tuor kha,Ka thatna ding a lo nih.Sietna khura inthokin,I hmangainan mi humin,Ka suolhai i ngaidam tah.
18. Mithi khuoa inthokin,Lawmthu an hril thei naw che,Khuorkhuruma tla tahai chun,I ringumna an beisei thei ta nawh.
19. Hring le dama umhai chauin,Voisuna ka thaw ang bok hin,An inpak thei che a nih.Paha'n an nauhai kuomah,I ringumna thuhai hi,An inhlan sawng pei a nih.
20. LALPAN a mi sukdam a,Tingtang rimawi leh remin,Ka dam sung po poin lawm hla,LALPA inah sak tang ka tih.
21. Chun, Isai chun, "Theichang kha hmet hlawm unla, a hnak kha hung la un la, a khuoihliah bel sien la, hung dam suok el a tih" a ta.
22. Hezekia chun, "Tempulah ka kai nawk ngei dingzie hrietna dingin inchikna ieng am ning a ta?" tiin a lo indon tah hrim a nih.
←  Isaiah (38/66)  →